କଣ୍ଟାବାଞ୍ଜି : ତୁରେକେଲା ଥାନା ଅନ୍ତର୍ଗତ ଝରଣୀ ଗ୍ରାମପଞ୍ଚାୟତ ଅନ୍ତର୍ଗତ ମହୁଲବାହାଳୀ ଗାଁର ଚେୟାରମେନପଡାରେ ଆଜି ଜଣେ ବିବାହିତା ମହିଳାଙ୍କ ଝୁଲନ୍ତା ମୃତଦେହ ଉଦ୍ଧାର କରିଛି ତୁରେକେଲା ପୁଲିସ । ଉଦ୍ଧାର ମହିଳାଙ୍କ ମୃତଦେହକୁ ବ୍ୟବଛେଦ ପାଇଁ କଣ୍ଟାବାଞ୍ଜି ଡାକ୍ତରଖାନାକୁ ପଠାଯାଇଛି । ମହିଳାଙ୍କ ପିତା ତୁରେକେଲା ଥାନାରେ, ତାଙ୍କ ଝିଅକୁ ଗତକାଲି ବିଳମ୍ବିତ ରାତିରେ ହତ୍ୟା କରାଯାଇଥିବା ଅଭିଯୋଗ କରିଛନ୍ତି ।
ଗତ ୫ ବର୍ଷ ତଳେ କରୋନା ସମୟରେ ମହୁଲପାଟି ଗ୍ରାମ ପଂଚାୟତ ମାଗୁର ଜଙ୍ଗଲ ପଡାର ପୁରନ୍ଦର ମାଝୀଙ୍କ ଝିଅ ସନ୍ତୋଷିନୀ ( ୨୫) ଙ୍କ ଝରଣୀ ଗ୍ରାମ ପଞ୍ଚାୟତ ମହୁଲବାହାଳୀ ଗାଁର ଚେୟାରମେନ ପଡାର ମାଧବ ମାଝୀଙ୍କ ସହ ବୈଦିକ ରୀତିରେ ବିବାହ ହୋଇଥିଲା । ଗତକାଲି ରାତି ପ୍ରାୟ ୪ଟା ସମୟରେ ମାଧବ ମାଝୀଙ୍କ ପଡୋଶୀ, ସନ୍ତୋଷିନୀଙ୍କ ବାପ ଘରକୁ ଫୋନ ଯୋଗେ ଝିଅର ମୃତ୍ୟୁ ନେଇ ଫୋନ୍ କରିଥିଲେ । ସନ୍ତୋଷିନୀଙ୍କ ୨ ପୁଅ ଥିବାବେଳେ ସାନ ପୁଅ ୬ ମାସର ବୋଲି ଜଣାପଡିଛି । ତେବେ ଏହା ପ୍ରକୃତ ହତ୍ୟା କି ଆତ୍ମହତ୍ୟା ତାହା ତଦନ୍ତ ପରେ ଜଣାପଡିବ ବୋଲି ପୁଲିସ ସୂଚନା ଦେଇଛି । ତୁରେକେଲା ପୁଲିସ ସ୍ବାମୀ ମାଧବଙ୍କୁ ଅଟକ ରଖି ତଦନ୍ତ କରୁଛି ବୋଲି ସୂଚନା ଦେଇଛନ୍ତି ଥାନା ଭାରପ୍ରାପ୍ତ ଅଧିକାରୀ ରମାକାନ୍ତ ସାହୁ ।
