ବାସୁଦେବପୁର : ପାରିବାରିକ କଳହର କରୁଣ ଚିତ୍ର । ବଚସା ପରେ ସ୍ତ୍ରୀକୁ ନିର୍ମମ ଭାବରେ ହାଣି ହତ୍ୟା କରିବା ପରେ ସ୍ବାମୀ ଫେରାର ହୋଇଯିବା ଘଟଣା ସମଗ୍ର ଅଞ୍ଚଳରେ ଆଲୋଡନ ସୃଷ୍ଟି କରିଛି । ଏମିତି ଘଟଣା କଷିଆ ସାମୁଦ୍ରିକ ଥାନା ଅଧିନ ବିଦେଇପୁର ପଞ୍ଚାୟତ ପାରାପୋଖରୀ ଗ୍ରାମରେ ଦେଖିବାକୁ ମିଳିଛି । ସୂଚନା ମୁତାବକ, ଅଢୁଆଁ ଗ୍ରାମର ଗୋପିନାଥ ଜେନା ପ୍ରଥମ ବିବାହ ପରେ କଷିଆ ସାମୁଦ୍ରିକ ଥାନା ଅଧିନ ପାରାପୋଖରୀ ଗ୍ରାମର ମହେନ୍ଦ୍ର ଜେନାଙ୍କ ଝିଅ ଗୁରୁବାରିକୁ ବିବାହ କରି ଦୀର୍ଘ ବର୍ଷ ଧରି ସେଠାରେ ରହି ଆସୁଥିଲା । ଗୋପିନାଥ ଓ ଗୁରୁବାରିଙ୍କ ଠାରୁ ଗୋଟିଏ ଝିଅ ଓ ଦୁଇପୁଅ ଅଛନ୍ତି । ଝିଅ କୁନିଲତାର ବିବାହ ପରଠାରୁ ଅର୍ଥ ଅଭାବ ପାଇଁ ସ୍ୱାମୀ ଓ ସ୍ତ୍ରୀ ମଧ୍ୟରେ ଝଗଡା ଲାଗି ରହୁଥିଲା । ଆଜି ସକାଳ ସମୟରେ ନାବାଳକ ପୁଅ ଦୋକାନ ଖୋଲିବା ପାଇଁ ମାଆକୁ ଡାକିଥିଲାବେଳେ କିଛି ଉତ୍ତର ନପାଇ ମାଆ ରକ୍ତ ଜୁଡୁବୁଡୁ ଭାବରେ ପଡିଥିବା ଦେଖି ଡାକ ପକାଇଥିଲା । ପାଖ ପଡୋଶୀ ରୁଣ୍ଡ ହେବା ପରେ ଥାନାକୁ ଫୋନ କରି ଜଣାଇଥିଲେ । ପୋଲିସ ଘଟଣାସ୍ଥଳରେ ପହଞ୍ଚି ଶବ ଜବତ କରି ବ୍ୟବଛେଦ ପାଇଁ ଭଦ୍ରକ ପଠାଇ ଘଟଣାର ତଦନ୍ତ କରୁଛି ବୋଲି ଥାନାଧିକାରିଣୀ ସାବିତ୍ରୀ ପଣ୍ଡା ଜଣାଇଛନ୍ତି । ତେଣେ ମୁଖ୍ୟ ଅଭିଯୁକ୍ତ ଗୋପିନାଥ ଫେରାର ଥିବା ଜଣାପଡିଛି ।
Popular Categories
Previous article
Next article