କଳାପଥର (ବାଙ୍କୀ): ଖୋର୍ଦ୍ଧା ବିଦ୍ୟୁତ ଡିଭିଜନ କଳାପଥର ବିଦ୍ୟୁତ୍ ସେକ୍ସନ ଅନ୍ତର୍ଗତ ଧଳାପଥର ଗାଁ ଖଣ୍ଡିଆ ପୋଖରୀ ନିକଟ ପାଣି ଟାଙ୍କି ପାଖରେ ଥିବା ୧୧ କେଭି ବିଦ୍ୟୁତ୍ ଟ୍ରାନସଫର୍ମର ସଂସ୍ପର୍ଶରେ ଆସି ଗୋଟିଏ ଗାଈର ମୃତ୍ୟୁ ଘଟିଛି। ଟ୍ରାନ୍ସଫର୍ମରଟିର ଚତୁଃପାର୍ଶ୍ଵ ମୁକୁଳା ପଡ଼ି ଘାସ ଲତା ମାଡି ଥିଲା। ସନ୍ଧ୍ୟା ସମୟରେ ଜଣେ ଲୋକର ଗାଈ ଉକ୍ତ ଟ୍ରାନ୍ସଫର୍ମର ସଂସ୍ପର୍ଶରେ ଆସିଥିଲା। ଖବର ପାଇ ବିଦ୍ୟୁତ୍ ବିଭାଗ କର୍ମଚାରୀ ବିଦ୍ୟୁତ୍ ସଂଯୋଗ ବିଚ୍ଛିନ୍ନ କରିବା ସହ ସ୍ଥାନୀୟ କଳାପଥର ଅଗ୍ନିଶମ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ମୃତ ଗାଈକୁ ଉଦ୍ଧାର କରି ସଂସ୍କାର ପାଇଁ ପଠାଇଛନ୍ତି। କଳାପଥର ଅଞ୍ଚଳରେ ଥିବା ଅନେକ ଟ୍ରାନସଫର୍ମର ମୁକୁଳା ପଡ଼ି ଥିବାବେଳେ ସ୍ଥାୟୀ ପ୍ରାଚୀର ନ ଥିବାରୁ ଭବିଷ୍ୟତରେ ଧନ ଜୀବନ ନଷ୍ଟ ହେବାର ଆଶଙ୍କା କରି ସାଧାରଣରେ ଉଦବେଗ ପ୍ରକାଶ ପାଇଛି।
Comments are closed.