ଆଠଗଡ଼: ଆଠଗଡ଼-ମୁଣ୍ଡଳି ମୁଖ୍ୟରାସ୍ତାର ସହର ନିକଟବର୍ତ୍ତୀ ରାଧାଗୋବିନ୍ଦପୁର ହନୁମାନ ମନ୍ଦିରଠାରୁ ସ୍କୁଲ ପର୍ଯ୍ୟନ୍ତ ପ୍ରାୟ ୬୦୦ମିଟର କଂକ୍ରିଟ କରାଯାଉଥିବାବେଳେ ଗୋଟିଏ ପାର୍ଶ୍ବରେ ଅଧପନ୍ତରିଆ କଂକ୍ରିଟ ବିଛାଇବା କାମ କରି ଠିକାଦାର ଛାଡିଦେଇଥିବାରୁ ସେହି ରାସ୍ତାରେ ଯାତାୟତ ବାଧାପ୍ରାପ୍ତ ହେଉଛି। ରାସ୍ତାର ଗୋଟିଏ ପାର୍ଶ୍ବରେ ଅନାବଶ୍ୟକ ଭାବେ ୧୦-୧୨ଇଞ୍ଚ ଅଧିକ ଉଚ୍ଚତାର କଂକ୍ରିଟ ବିଛାଯାଇଛି। ଅନ୍ୟପାର୍ଶ୍ବଟି ଖାଲୁଆ ଓ ସଂକୀର୍ଣ୍ଣ ହୋଇ ରହିଥିବାରୁ ସେ ରାସ୍ତାରେ ଚଳାଚଳ କରୁଥିବା ବହୁ ସଂଖ୍ୟାରେ ଗାଡିମଟର ବିପଦଜନକ ଅବସ୍ଥାରେ ଯାତାୟତ କରିବା ବେଳେ ଅଧିକାଂଶ ସମୟ ଟ୍ରାଫିକ ଜାମ ହୋଇ ଦୀର୍ଘ ସମୟ ଗାଡି ଚଳାଚଳ ବନ୍ଦ ହୋଇଯାଉଛି। ତା ଛଡା ପ୍ରତିମୂହୁର୍ତ୍ତରେ ଦୁର୍ଘଟଣାର ଆଶଙ୍କା ରହୁଥିବାବେଳେ ଗତ ୩ଦିନ ମଧ୍ୟରେ ୪ଟି ଗାଡି ରାସ୍ତା ତଳକୁ ଖସିଯାଇଥିବା ରାଧାଗୋବିନ୍ଦପୁର ଗ୍ରାମବାସୀ ପ୍ରକାଶ କରିଛନ୍ତି। ସେଠାରେ ରାସ୍ତା ପୂର୍ବରୁ ବହୁ ଉଚ୍ଚା ରହିଥିବାବେଳେ ପୁଣି କଣ ପାଇଁ ଅନାବଶ୍ୟକ ଭାବେ ଆହୁରି ୧୦ଇଞ୍ଚରୁ ଉର୍ଦ୍ଧ ଉଚ୍ଚତା କରାଯାଉଛି ତାହା ବୁଝା ପଡୁନାହିଁ। ମୁଣ୍ଡଳି-ଆଠଗଡ଼ ରାସ୍ତା ଏବେ ପ୍ରଶସ୍ତିକରଣ ଓ ସୁଦୃଢିକରଣ କରାଯିବା ଏକ ସ୍ୱାଗତଯୋଗ୍ୟ ପଦକ୍ଷେପ। କିନ୍ତୁ ଆବଶ୍ୟକତା ନଥାଇ ଅଯଥାରେ ଅଧିକ ଉଚ୍ଚତା କରିବା ଦ୍ୱାରା ରାସ୍ତାକଡରେ ଥିବା ଘରଗୁଡିକ ବହୁ ନିଚାରେ ରହୁଥିବାରୁ ବର୍ଷାଜଳ ସମାନଙ୍କ ଘରେ ପସିବା ନିଶ୍ଚିତ ଥିବାରୁ ଚିନ୍ତାରେ ରହିଛନ୍ତି। ସେହିପରି ରାଧାଗୋବିନ୍ଦପୁରର ସେହି ୬୦୦ମିଟର ଦୈର୍ଘ୍ୟ ବିଶିଷ୍ଟ କଂକ୍ରିଟ ରାସ୍ତାଟି ଆକଳନ ଅନୁଯାୟୀ ଅଧିକ ଚଉଡା ହେବାକୁ ଥିବାବେଳେ ତାହା କାହିଁକି କରାଯାଉନାହିଁ ତାହା ମଧ୍ୟ ପ୍ରଶ୍ନବାଚୀ ସୃଷ୍ଟି କରିଛି। ଠିକାଦାର ଅଧାରୁ କାହିଁକି କାମ ବନ୍ଦ କରିଛନ୍ତି ସେ ସଂପର୍କରେ ପୂର୍ତ୍ତବିଭାଗ ସହହକାରୀ ନିର୍ବାହୀ ଯନ୍ତ୍ରୀ ଇଂ ଦିନେଶ କୁମାର ସାହୁଙ୍କୁ ପଚରାଯାଇଥିଲା। ଠିକାଦାରଙ୍କର ଅଧିକାଂଶ ଶ୍ରମିକ ମୁସଲମାନ ହୋଇଥିବାରୁ ସେମାନେ ଇଦ୍ ପର୍ବଲାଗି ଛୁଟିରେ ଯାଇଛନ୍ତି ଏବଂ ସେମାନେ ଫେରିବା ପରେ ରବିବାର ବା ସୋମବାର ମଧ୍ୟରେ କାମ ପୁଣି ଆରମ୍ଭ ହେବ ବୋଲି ଇଂ ସାହୁ ପ୍ରକାଶ କରିଛନ୍ତି।
Comments are closed.