ଭୁବନେଶ୍ବର: ୨୦୨୪-୨୫ ବଜେଟରେ ଓଡ଼ିଶାକୁ ଅଣଦେଖା କରାଯାଇଛି। ଓଡ଼ିଶାର ବିପର୍ଯ୍ୟୟ ମୁକାବିଲା ପାଇଁ ସ୍ବତନ୍ତ୍ର ଅନୁଦାନ ମିଳିନା ନାହିଁ। ଆନ୍ଧ୍ର ପ୍ରଦେଶ ଓ ବିହାରକୁ ସ୍ବତନ୍ତ୍ର ପ୍ୟାକେଜ ଦିଆଗଲା, କିନ୍ତୁ ଓଡ଼ିଶାକୁ କିଛି ନାହିଁ। ଆନ୍ଧ୍ର ପ୍ରଦେଶ ଓ ବିହାର ରାଜ୍ୟକୁ ହଜାର ହଜାର କୋଟିର ପ୍ୟାକେଜ ଦିଆଯାଇଛି। ବନ୍ୟା ସହାୟତା ନେଇ ଅନ୍ୟ ରାଜ୍ୟକୁ ଅନୁଦାନ, ଓଡ଼ିଶାକୁ ଅଣଦେଖା କରାଯାଇଛି ବୋଲି ନବୀନ ପଟ୍ଟନାୟକ ପ୍ରକାଶ କରିଛନ୍ତି।
ବଜେଟକୁ ନେଇ ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ପ୍ରତିକ୍ରିୟା ରଖି କହିଛନ୍ତି ଯେ ଓଡ଼ିଶା ପାଇଁ ବଜେଟ ନୈରାଶ୍ୟଜନକ। ଦରଦାମରେ ହନ୍ତସନ୍ତ ହେଉଛନ୍ତି ଜନତା। ତେବେ ବଜେଟରେ ଦରଦାମ ବୃଦ୍ଧିରେ ନିୟନ୍ତ୍ରଣ ଓ ବେକାର ସମସ୍ୟା ଦୂର ପାଇଁ ବ୍ୟବସ୍ଥା ନାହିଁ। ସ୍ବତନ୍ତ୍ର ରାଜ୍ୟ ପାହ୍ୟା ଦାବିକୁ ବିଚାର କରାଯାଇନି। ପୋଲଭରମ ପ୍ରସଙ୍ଗରେ ଆମେ ଲଢ଼େଇ କରିଆସିଛୁ। ପୋଲାଭରମ ପ୍ରସଙ୍ଗରେ ଓଡ଼ିଶାର ଦାବିକୁ ଅଣଦେଖା କରାଯାଇଛି। କୃଷି, ଏମଏସଏମଇ ଓ ଶିଳ୍ପକ୍ଷେତ୍ରରେ ଦିଆଯାଇଥିଲା ବଡ଼ ପ୍ରତିଶ୍ରୁତି, ତାହା ପୂରଣ ହୋଇନାହିଁ।
ଏପରିକି ଓଡ଼ିଶାରେ ବନ୍ୟା ନିୟନ୍ତ୍ରଣ ପାଇଁ ସ୍ବତନ୍ତ୍ର ପ୍ୟାକେଜ ବି ଦିଆଯାଇନାହିଁ। ୧୦ ବର୍ଷ ହେଲା ସବୁ କ୍ଷେତ୍ରରେ ଓଡ଼ିଶାକୁ ଅବହେଳା କରୁଛି ଏନଡିଏ। ନିର୍ବାଚନବେଳେ ଓଡ଼ିଶା ପାଇଁ ବଡ଼ ବଡ଼ ପ୍ରତିଶ୍ରୁତି ଦେଇଥିଲା ବିଜେପି କିନ୍ତୁ ଗୋଟିଏ ହେଲେ ପ୍ରତିଶ୍ରୁତି ପୂରଣ କଲାନି ବିଜେପି। ଅପରପକ୍ଷରେ ପର୍ଯ୍ୟଟନ କ୍ଷେତ୍ରର ବିକାଶ ପାଇଁ ଘୋଷଣା କରାଯାଇଥିବାରୁ ମୁଁ ଖୁସି ବୋଲି ଶ୍ରୀ ପଟ୍ଟନାୟକ ପ୍ରକାଶ କରିଛନ୍ତି।
