ଡେସ୍କ: ଜଗତସିଂପୁର, କଟକର ନିଆଳି ଓ ଗୋବିନ୍ଦପୁର ଭଳି ତଳିଆ ଅଂଚଳ ଏବଂ ପୁରୀ ଜିଲ୍ଲାର ତଳିଆ ଅଂଚଳ ଦେଇ ଏବେ ବନ୍ୟାଜଳ ଅତିକ୍ରମ କରୁଛି ଓ ଏହା ଆଗାମୀ ୩ରୁ ୪ ଘଣ୍ଟା ମଧ୍ୟରେ ସେହି ସବୁ ଅଂଚଳ ଦେଇ ଅତିକ୍ରମ କରିଯିବ। ଆସନ୍ତାକାଲି ସକାଳ ସୁଦ୍ଧା ସମସ୍ତ ଅଂଚଳରୁ ଜଳ ସ୍ଥର ହ୍ରାସ ପାଇବ। ସ୍ୱତନ୍ତ୍ର ରିଲିଫ କମିଶନର ପ୍ରଦୀପ ଜେନା କହିଛନ୍ତି ଯେ ଏ ପର୍ଯ୍ୟନ୍ତ ରାଜ୍ୟର ବନ୍ୟାଞ୍ଚଳଗୁଡିକରେ ମୋଟ ୫ଟି ଘାଇ ସୃଷ୍ଟି ହୋଇଛି। ଜଗତସିଂପୁର ଜିଲ୍ଲାର କୁଜଙ୍ଗ ଅଂଚଳର ପାଇକା ନଦୀର କାଠକୋଟରେ ଘାଇ ସୃଷ୍ଟି ହୋଇଥିବା ବେଳେ ପୂର୍ବରୁ ପୁରୀ ଜିଲ୍ଲାର ମକରା ନଦୀ, ଖୋର୍ଦ୍ଧା ଜିଲ୍ଲା ରାଜୁଆ ନଦୀର ଡାହାଣ ପାର୍ଶ୍ୱ ବନ୍ଧ, କୁଶଭଦ୍ରା ଗୋପ ବ୍ଲକ ଗଣେଶ୍ବରପୁର ପଂଚାୟତ ଖଣ୍ଡୁଆକୁଦ ଗାଁ ପାଖରେ ଏବଂ ଅନ୍ୟଟି ରାହାମା ବ୍ଲକର ତେରମାଣପୁର ଘେରିବନ୍ଧରେ ଘାଇ ସୃଷ୍ଟି ହୋଇଛି। ସେଠାରେ ଏବେ ଲୋକମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତରଣ କରାଯାଉଥିବା ଶ୍ରୀ ଜେନା କହିଛନ୍ତି।
ଅନ୍ୟସବୁ ବନ୍ୟା ପ୍ରଭାବିତ ଜିଲ୍ଲାଗୁଡିକରେ ପରିସ୍ଥିତି ଗମ୍ଭୀର ଥିଲେ ମଧ୍ୟ ନିୟନ୍ତ୍ରଣାଧୀନ ରହିଥିବା ଶ୍ରୀ ଜେନା ସୂଚନା ଦେଇଛନ୍ତି। ତେବେ ଆଜି ରାତି ସମୟଟି ଗୁରୁତ୍ୱପୂର୍ଣ୍ଣ ଓ ସେଥିପାଇଁ ସମସ୍ତେ ସତର୍କ ରହିବାକୁ ସେ ପରାମର୍ଶ ଦେଇଛନ୍ତି। ସୂଚନା ଅନୁଯାୟୀ, ସବୁ ଜିଲ୍ଲାର ତହସିଲ ଗୁଡିକରେ ପର୍ଯ୍ୟାପ୍ତ ପରିମାଣର ପଲିଥିନ ମହଜୁଦ ଅଛି ତେଣୁ ଆବଶ୍ୟକ ସ୍ଥଳେ ତାହା ଯୋଗାଇ ଦିଆଯିବ। ଇତିମଧ୍ୟରେ ବନ୍ୟା ପରିଚାଳନା ରଣନୀତିରେ ସାମାନ୍ୟ ପରିବର୍ତ୍ତନ କରାଯାଇଛି ଓ ତଦନୁଯାୟୀ ପୁରୀ, କେନ୍ଦ୍ରାପଡା ଓ ଜଗତସିଂପୁର ଜିଲ୍ଲାକୁ ୩ଟି ଲେଖାଏଁ ଓ କଟକ ଜିଲ୍ଲାକୁ ଗୋଟିଏ ପିଇବା ପାଣି ପ୍ୟାକିଂ ବ୍ୟବସ୍ତା ଦିଆଯାଇଛି।
