ଭୁବନେଶ୍ବର (ବ୍ୟୁରୋ) : ଏଣିକି ଆଉ ଲୋଡ଼ାନାହିଁ ନର୍ସ, ଆଟେଣ୍ଡାଣ୍ଟ । ସେମାନଙ୍କ ସ୍ଥାନରେ କରୋନା ରୋଗୀଙ୍କ ନିକଟରେ ଔଷଧ ଓ ଖାଦ୍ୟ ପହଞ୍ଚାଇବ ରୋବଟ୍ (ରୋବୋ) । କଟକ ଖପୁରିଆ ଆଇଟିଆଇରୁ ପ୍ରସ୍ତୁତ ହୋଇଛି ପ୍ରଥମ ସର୍ଭିସ୍ ରୋବୋ ‘କୋ-ବଟ’ (କରୋନା କମ୍ବାଟ୍ ରୋବୋ) । ରୋବୋ ‘କୋ-ବଟ’ ବର୍ତ୍ତମାନର କରୋନା ସଂକ୍ରମଣ ସମୟରେ କୋଭିଡ ହସ୍ପିଟାଲ ଏବଂ ସଂଗରୋଧ କେନ୍ଦ୍ରରେ ରୋଗୀ ସେବା କରିବାରେ ପ୍ରମୁଖ ଭୂମିକା ଗ୍ରହଣ କରିବ ବୋଲି ନିର୍ମାତାମାନେ କହିଛନ୍ତି। ଖପୁରିଆ ଆଇଟିଆଇର ଷ୍ଟେମ ଲ୍ୟାବ(ସାଇନ୍ସ, ଟେକ୍ନୋଲୋଜି, ଇଞ୍ଜିନିୟରିଂ ଓ ମ୍ୟାଥ୍ମେଟିକ୍ସ ପରୀକ୍ଷାଗାର)ରେ ପ୍ରସ୍ତୁତ ହୋଇଛି ଏହି ରୋବୋ । ସମ୍ପୂର୍ଣ୍ଣ ଦେଶୀୟ ଜ୍ଞାନକୌଶଳରେ ନିର୍ମିତ ରୋବୋ ‘କୋ-ବଟ’ ଓଡିଶାର ଷ୍ଟାଟ୍ ଅପ୍ ଲ୍ୟାବ ସ୍ୟାକ୍ ରାବୋଟିକ୍ସର ବୈଷୟିକ ସହାୟତା ଏବଂ ଖପୁରିଆ ଆଇଟିଆଇର ଦକ୍ଷ ଟିମ ଦ୍ବାରା ନିର୍ମାଣ କରାଯାଇଛି । ତେବେ ପ୍ରତିଷ୍ଠାନରେ ଏକକାଳୀନ ଦୁଇଟି ରୋବୋ ପ୍ରସ୍ତୁତ କରାଯାଇଛି ।
ଏହି ପ୍ରଥମ ସର୍ଭିସ୍ ରୋବୋ ‘କୋ-ବଟ’ କରୋନା ସହ ଲଢିବାକୁ ଏକଦମ୍ ଜାଗତିଆର । ମଣିଷ ଶରୀର ଆକାରର ଏହି ରୋବୋରେ ଚାଲିବାକୁ ଚକ ଲାଗିଛି । ହାତରେ ଏକ ଟ୍ରେ ଜରିଆରେ ଏହା ୨୦ କେଜିର ଭାର ବହନ କରିବା କ୍ଷମତା ରଖିଛି । ଏହା କୋଭିଡ-୧୯ ଡାକ୍ତରଖାନାରେ ରୋଗୀଙ୍କ ପାଖକୁ ଖାଦ୍ୟ, ପାନୀୟ ତଥା ଔଷଧ ନେବାଆଣିବା କରିପାରିବ, ଯାହା ରୋଗୀର ସେବା କରୁଥିବା ସହାୟକମାନଙ୍କୁ ଖୁବ୍ ସାହାଯ୍ୟ କରିବା ସହ ସିଧାସଳଖ ସମ୍ପର୍କ ରୋକି ସଂକ୍ରମଣ କମ୍ କରିପାରିବ । ଏହି ରୋବୋରେ ୱେରଲେସ୍ କମ୍ୟୁନିକେସନ ପ୍ରୋଟୋକଲ ବ୍ୟବହାର କରାଯାଇଛି । ଏହାକୁ ନ୍ୟାଭିଗେସନ ଓ ମ୍ୟାପିଂ ଆଦି ଦ୍ୱାରା ଆହୁରି ଅଧିକ ବିକଶିତ କରାଯାଇପାରିଲେ ଡାକ୍ତରଖାନାର କୈାଣସି ୱାର୍ଡରେ ଏହା ସ୍ୱଂୟଚାଳିତ ହୋଇ କାର୍ଯ୍ୟକ୍ଷମ ହୋଇପାରିବ ।
Govt ITI Cuttack has developed two robots, COVOT and Megabot in collaboration with SAK Robotic Lab start-up to prevent #COVID19 contamination. Appreciation for @skilled_odisha for using their skill innovation to strengthen #Odisha’s fight against the pandemic. #OdishaFightsCorona pic.twitter.com/wRGunqZ4xl
— CMO Odisha (@CMO_Odisha) April 28, 2020
ସେହିଭଳି ରୋବୋ ‘ନିଗା-ବଟ’ ହେଉଛି ଏକ ‘ଟେଲି ପ୍ରେଜେନ୍ସ ରୋବୋ’ । ଏହା ମାଧ୍ୟମରେ ଡାକ୍ତରମାନେ ରୋଗୀମାନଙ୍କ ଉପରେ ନିଘା ରଖିବା ସହ ନିଜ ଚାମ୍ବରରେ ବସି ସେମାନଙ୍କ ସହ ସିଧାସଳଖ କଥାବାର୍ତ୍ତା ହୋଇପାରିବେ । ଏଥିରେ ସଂଯୁକ୍ତ ଲାଇଭ୍ ଭିଡିଓ ଦ୍ୱାରା ଏହା ସମ୍ଭବ ହୋଇପାରୁଛି । ଏଥିରେ ମଧ୍ୟ ଏକ ଚକ ସଂଯୁକ୍ତ ହୋଇଛି। ନିଜସ୍ୱ ସୁରକ୍ଷା ଚିନ୍ତା କମାଇବା ସହ ବାରମ୍ବାର ସଂକ୍ରମିତ ରୋଗୀଙ୍କ ଖବର ଜାଣିବାକୁ କେହି ୱାର୍ଡ ମଧ୍ୟକୁ ନ ଯାଇ ମଧ୍ୟ ଏହି ରୋବୋ ମାଧ୍ୟମରେ ରୋଗୀର ସମସ୍ତ ଖବର ଡାକ୍ତରମାନେ ଜାଣିପାରିବେ । ଏହାଦ୍ୱାରା ରୋଗୀ ସେବା ସମୟରେ ନର୍ସ ଓ ସ୍ୱାସ୍ଥ୍ୟ କର୍ମୀଙ୍କୁ କରୋନା ସଂକ୍ରମଣରୁ ରୋକାଯାଇପାରିବ । ଏ ସମ୍ପର୍କରେ ପ୍ରତିଷ୍ଠାନର ଅଧ୍ୟକ୍ଷ ଡ. ହୃଶିକେଷ ମହାନ୍ତି କହିଛନ୍ତି ଯେ, ସ୍ୱୟଂକ୍ରିୟ ଶିଳ୍ପ ୪.୦ ବୈଷୟିକ ଜ୍ଞାନ ବୃହତ୍ତର ସମାଜ ଓ ସାଧାରଣ ମଣିଷଙ୍କ ପାଇଁ କାମ ଦେବ । ଏହି ରୋବୋ ଡ. ମହାନ୍ତିଙ୍କ ପ୍ରୋତ୍ସାହନ ବେଶ ଗୁରୁତ୍ବପୂର୍ଣ୍ଣ ଥିଲା । ତେବେ ଏ ସମ୍ପର୍କରେ ସ୍ୟାକ୍ ରାବୋଟିକ୍ସର ପ୍ରତିଷ୍ଠାତା ଶାକ୍ୟସିଂହ ମହାପାତ୍ର କୁହନ୍ତି, ଏହି ରୋବୋ ପ୍ରକଳ୍ପରେ ଟେକ୍ନୋଲୋଜି ପାର୍ଟନର ରହି ଆମେ ଗର୍ବିତ । ସରକାର ଯଦି ଏ କ୍ଷେତ୍ରରେ ସହଯୋଗ କଲେ ଆମେ ଡାକ୍ତରମାନଙ୍କ ଆବଶ୍ୟକତାକୁ ଦୃଷ୍ଟିରେ ରଖି ଏଥିରେ ଆଉ କିଛି ବିକାଶ ଘଟାଇପାରିବୁ ।
