କେନ୍ଦୁଝରଗଡ଼ : ସରକାରୀ ମହିଳା ମହାବିଦ୍ୟାଳୟ କେନ୍ଦୁଝରର ଓଡିଆ ଭାଷା ଓ ସାହିତ୍ୟ ବିଭାଗ ପକ୍ଷରୁ ଏକ ଦିବସୀୟ ପାଠଚକ୍ର ଅନୁଷ୍ଠିତ ହୋଇଯାଇଛି । ମହାବିଦ୍ୟାଳୟର ଅଧ୍ୟକ୍ଷ ପ୍ରଫେସର ଡ.ପ୍ରଭାକର ନାୟକ ଏହି ପାଠଚକ୍ରକୁ ଉଦ୍ଘାଟନ କରିଥିଲେ। ପାଠଚକ୍ରର ପ୍ରଥମ ଅଧିବେଶନରେ ‘ଉତ୍ତର ଓଡିଶାର ଆଦିବାସୀ ସଂସ୍କୃତି’ ଶୀର୍ଷକ କାର୍ଯ୍ୟକ୍ରମରେ ମହାରାଜା ପୂର୍ଣ୍ଣଚନ୍ଦ୍ର ସ୍ୱୟଂଶାସିତ ମହାବିଦ୍ୟାଳୟ ବାରିପଦାର ପୂର୍ବତନ ଅଧ୍ୟକ୍ଷ ତଥା ଅବସରପ୍ରାପ୍ତ ପ୍ରଫେସର ପଦ୍ମଶ୍ରୀ ଡ.ଦମୟନ୍ତୀ ବେଶ୍ରା ଆଲୋଚକ ଭାବେ ଯୋଗଦେଇ ନିଜସ୍ୱ ବକ୍ତବ୍ୟ ପ୍ରଦାନ କରିଥିଲେ। ପାଠଚକ୍ରର ଦ୍ୱିତୀୟ ଅଧିବେଶନରେ ‘ଓଡିଆ ପ୍ରବନ୍ଧ ସାହିତ୍ୟ’ ଶୀର୍ଷକ କାର୍ଯ୍ୟକ୍ରମରେ ଗଙ୍ଗାଧର ମେହେର ବିଶ୍ୱବିଦ୍ୟାଳୟ ସମ୍ବଲପୁରର ଓଡିଆ ଭାଷା ଓ ସାହିତ୍ୟ ବିଭାଗ ସହକାରୀ ପ୍ରଫେସର ଡ.ପରୀକ୍ଷିତ ଭୋଇ ବିଷୟବକ୍ତା ଭାବେ ଯୋଗଦେଇ ଆଲୋଚନାରେ ଅଂଶଗ୍ରହଣ କରିଥିଲେ। ମହାବିଦ୍ୟାଳୟର ବିଭାଗୀୟ ଛାତ୍ରୀମାନେ ନିବନ୍ଧ ପାଠ କରିଥିବା ବେଳେ ପ୍ରଥମ ଅଧିବେଶନରେ ଡ.ସୂର୍ଯ୍ୟକାନ୍ତ ନାଏକ ଓ ଦ୍ୱିତୀୟ ଅଧିବେଶନରେ ସହକାରୀ ପ୍ରଫେସର ଡ.ଋଷିନାଥ ନାଏକ ସଂକ୍ଷିପ୍ତ ବିଷୟ ସୂଚନା ପ୍ରଦାନ କରିଥିଲେ । ମହାବିଦ୍ୟାଳୟର ବିଭାଗୀୟ ମୁଖ୍ୟ ଡ.ଧର୍ମବୀର ମୋହନ ସିଂ ପ୍ରାରମ୍ଭରେ ଅତିଥି ପରିଚୟ ପ୍ରଦାନ ସହ କାର୍ଯ୍ୟକ୍ରମକୁ ପରିଚାଳନା କରିଥିଲେ। ଶେଷରେ ଅଧ୍ୟାପକ ଡ.ସୂର୍ଯ୍ୟକାନ୍ତ ନାଏକ ଧନ୍ୟବାଦ ଅର୍ପଣ କରିଥିଲେ। ମହାବିଦ୍ୟାଳୟର ବିଭିନ୍ନ ବିଭାଗର ଛାତ୍ରୀ ଓ ଅଧ୍ୟାପକ ଅଧ୍ରାପିକା ମାନେ ଯୋଗଦେଇ ଏହି କାର୍ଯ୍ୟକ୍ରମକୁ ସାଫଲ୍ୟ କରିଥିଲେ।
Comments are closed.