କରୋନା ଅପଡେଟ୍ : ଭାରତରେ ଆକ୍ରାନ୍ତଙ୍କ ସଂଖ୍ୟା ୧୭୨କୁ ବୃଦ୍ଧି  

ନୂଆଦିଲ୍ଲୀ : ଦେଶରେ କରୋନା ରୋଗୀଙ୍କ ସଂଖ୍ୟା ୧୭୨କୁ ବୃଦ୍ଧି ହୋଇଛି। ଗୁରୁବାର ୨୧ଟି ରିପୋର୍ଟ ପଜିଟିଭ୍ ଆସିଥିବା ଜଣାପଡିଛି। ସେହିପରି ଛତିଶଗଡରେ ପ୍ରଥମ କରୋନା ରୋଗୀଙ୍କୁ ଚିହ୍ନଟ କରାଯାଇଛି। ଏଥିସହିତ ଲକ୍ଷ୍ନୌରେ ଆଉ ଦୁଇଜଣ ସନ୍ଦିଗ୍ଧଙ୍କ ରିପୋର୍ଟ କରୋନା ପଜିଟିଭ୍ ଆସିଛି। ରାଜସ୍ଥାନର ଗୋଟିଏ ପରିବାରର ତିନି ଜଣ ବ୍ୟକ୍ତି କରୋନା ସଂକ୍ରମିତ ହୋଇଥିବା ଜଣାପଡିଛି।

ଲକ୍ଷ୍ନୌରେ ଅନ୍ୟ ଦୁଇଜଣ କରୋନା ଆକ୍ରାନ୍ତ ସାମ୍ନାକୁ ଆସିଛନ୍ତି। ଉଭୟଙ୍କୁ କେଜିଏମସିରେ ଭର୍ତ୍ତି କରାଯାଇଛି। ବୁଧବାର ଏମାନଙ୍କର ରକ୍ତ ଓ ସ୍ବାବ୍ ନମୁନା ସଂଗ୍ରହ କରାଯାଇ ପରୀକ୍ଷା ପାଇଁ ପଠାଯାଇଥିଲା। ଆଜିର ରିପୋର୍ଟ ଆସିବା ପରେ ଉଭୟ ପଜିଟିଭ୍ ଥିବା ଜଣାପଡିଛି। ସେମାନଙ୍କ ମଧ୍ୟରୁ ଜଣେ ନିଶାଟଗଞ୍ଜର ଏବଂ ଅନ୍ୟଟି ଲାଖିମପୁରର ବାସିନ୍ଦା।

ଛତିଶଗଡରେ ପ୍ରଥମ କରୋନା ରୋଗୀ ଚିହ୍ନଟ

ଲଣ୍ଡନରୁ ଛତିଶଗଡକୁ ଫେରିଥିବା ଜଣେ ୨୪ ବର୍ଷୀୟା ଯୁବତୀ କରୋନା ସଂକ୍ରମିତ ହୋଇଥିବା ଜଣାପଡିଛି। ଛତିଶଗଡ ସ୍ୱାସ୍ଥ୍ୟ ଅଧିକାରୀ ଗୁରୁବାର ଦିନ ଏହି ସୂଚନା ଦେଇ କହିଛନ୍ତି ଯେ, ଏହା ହେଉଛି ରାଜ୍ୟର କରୋନା ସଂକ୍ରମିତ ପ୍ରଥମ ମାମଲା। ସଂକ୍ରମିତ ଯୁବତୀ ଏବଂ ତାଙ୍କ ପିତାମାତାଙ୍କୁ ରାୟପୁରର ଏମ୍ସରେ ନଜରବନ୍ଦୀ ଭାବେ ରଖାଯାଇଛି।