ତିଗିରିଆ : ଶାରଦୀୟ ଦଶହରା ଦୂର୍ଗାପୂଜା ପାଇଁ ତିଗିରିଆ ବ୍ଳକ ହସ୍ତତନ୍ତ ପ୍ରସିଦ୍ଧ ନୂଆପାଟଣାର ବିଭିନ୍ନ ମଣ୍ଡପରେ ମା’ଙ୍କ ମୃଣ୍ମୟ ମୂର୍ତ୍ତି ନିର୍ମାଣ ପାଇଁ ବୁଧବାର ମାଟି ଅନୁକୂଳ ଆରମ୍ଭ ହୋଇଛି। ପବିତ୍ର ଜନ୍ମାଷ୍ଟମୀ ଅବସରରେ ସ୍ଥାନୀୟ ଚଣ୍ଡୀ ବଜାର ପକ୍ଷରୁ ଚଳିତ ବର୍ଷ ସର୍ବ ପ୍ରଥମେ ମାଟି ଅନୁକୂଳ ହୋଇଛି । ସମସ୍ତ ବୈଦିକ ରୀତିନୀତି ଅନୁଯାୟୀ ନିକଟସ୍ଥ କଳାପାଟଙ୍କ ପୀଠରେ ପୂଜାର୍ଚ୍ଚନା କରାଯାଇ ମାଟି ଅନୁକୂଳ ହୋଇଥିଲା। ଏଥିରେ ବଜାର ସଭାପତି ପ୍ରକାଶ କୁମାର ଦାସ, ସମ୍ପାଦକ ଧୃବ ଚରଣ ଦାସଙ୍କ ସମେତ ସମସ୍ତ ପରିଚାଳନା କମିଟି ସଦସ୍ୟ ଯୋଗଦେଇଥିଲେ। କର୍ତ୍ତା ଭାବରେ ମାୟାଧର ସାହୁ ଓ ପ୍ରଦୀପ ବର୍ଦ୍ଧନ ନିଜ ନିଜର ଦାୟିତ୍ଵ ନିର୍ବାହ କରିଥିବା ବେଳେ ପୂଜକ ମୀନୁ ମିଶ୍ର ସମସ୍ତ ବୈଦିକ କାର୍ଯ୍ୟକ୍ରମ ସମ୍ପାଦନ କରିଥିଲେ। ନଦୀୟା ସଙ୍କୀର୍ତ୍ତନ ଗହଣରେ ଏକ ଶୋଭାଯାତ୍ରାରେ ଅନୁକୂଳ ହୋଇଥିବା ମାଟିକୁ ଆଣି ଚଣ୍ଡୀ ବଜାର ପୂଜା ମଣ୍ଡପରେ ସ୍ଥାପନ କରାଯାଇଥିଲା।
ଚଳିତ ବର୍ଷ ଅକ୍ଟୋବର ମାସ ୨୪ ତାରିଖରେ ଦଶହରା ଉତ୍ସବ ଅନୁଷ୍ଠିତ ହେବାକୁ ଥିବା ବେଳେ ୨୦ ତାରିଖରୁ ବିଭିନ୍ନ ମଣ୍ଡପରେ ମା’ଙ୍କ ମୃଣ୍ମୟୀ ପ୍ରତିମା ପୂଜା ଆରମ୍ଭ ହେବ ବୋଲି ଶ୍ରୀ ଦାସ କହିଛନ୍ତି।
Comments are closed.