ଭୁବନେଶ୍ୱର: ପ୍ରାକୃତିକ ଶୋଭାରାଜିର ଅପୂର୍ବ ସମ୍ଭାର ଓଡିଶା। ପର୍ଯ୍ୟଟକଙ୍କ ଆଗମନ ନିମନ୍ତେ ରାଜ୍ୟର ପ୍ରମୁଖ ପର୍ଯ୍ୟଟନ କ୍ଷେତ୍ର ଗୁଡିକୁ ବିକାଶ କରିବା ପାଇଁ ରାଜ୍ୟ ସରକାର ବିଭିନ୍ନ ପ୍ରକାର ଯୋଜନା ହାତକୁ ନେଇଛନ୍ତି। ଏହାସତ୍ତ୍ବେ ବିଭିନ୍ନ ଜିଲା ପର୍ଯ୍ୟଟନ ବିଭାଗ ଗୁଡିକରେ ଅଧିକାରୀ ପଦ ଦୀର୍ଘ ଦିନ ଧରି ଖାଲି ପଡିଥିବାରୁ ବିକାଶ କାର୍ଯ୍ୟ ଆଗେଇ ପାରୁନାହିଁ। ସରକାର ପଦ ପୂରଣ କରୁନଥିବାରୁ ରାଜ୍ୟର ପର୍ଯ୍ୟଟନସ୍ଥଳୀ ଗୁଡିକ ଉନ୍ନତି, ରକ୍ଷଣାବେକ୍ଷଣ ଏବଂ ଯୋଜନାକୁ ସଠିକ ଭାବେ କାର୍ଯ୍ୟକାରୀ କରାଯାଇ ପାରୁନାହିଁ। ଫଳସ୍ବରୂପ ପର୍ଯ୍ୟଟନ କ୍ଷେତ୍ର ଗୁଡିକ ଅବହେଳିତ ହୋଇପଡିଛି।
ବର୍ଷବର୍ଷ ଧରି ରାଜ୍ୟର ୧୨ଟି ଜିଲାରେ ପର୍ଯ୍ୟଟନ ଅଧିକାରୀଙ୍କ ପଦ ଖାଲି ପଡିଛି। ରାଜ୍ୟର ପ୍ରମୁଖ ପର୍ଯ୍ୟଟନସ୍ଥଳୀ ଭୁବନେଶ୍ବର, ପୁରୀ, କୋଣାର୍କ, ସମ୍ବଲପୁର, କେନ୍ଦ୍ରାପଡା, ଜଗତସିଂହପୁର ଭଳି ଅନ୍ୟ ଜିଲା ଗୁଡିକରେ ବର୍ଷେରୁ ଉର୍ଦ୍ଧ୍ବ ହେବ ପର୍ଯ୍ୟଟନ ଅଧିକାରୀଙ୍କ ପଦ ଖାଲି ପଡିଛି। ଅନ୍ୟ ଜିଲା ଦାୟିତ୍ବରେ ଥିବା ପର୍ଯ୍ୟଟନ ଅଧିକାରୀଙ୍କୁ ଦୁଇଟି ଲେଖାଏଁ ଜିଲାର ଦାୟିତ୍ବ ଦିଆଯାଇଛି। ସେହିପରି ଖୋଦ ଭୁବନେଶ୍ବର ଓ ପର୍ଯ୍ୟଟନ ବିଭାଗରେ ଥିବା ପର୍ଯ୍ୟଟନ ଅଧିକାରୀ ଅବସର ନେବାପରେ ସେହି ପଦ ବର୍ତ୍ତମାନ ଖାଲି ରହିଛି। ଏଠାରେ କୌଣସି ନୂତନ ଅଧିକାରୀଙ୍କୁ ନିଯୁକ୍ତି ଦିଆଯାଇ ନଥିବାରୁ ଅବସରପ୍ରାପ୍ତ ଅଧିକାରୀ ଏହି ଦାୟିତ୍ବରେ ରହିଛନ୍ତି। ପର୍ଯ୍ୟଟନସ୍ଥଳ ଗୁଡିକର ଉନ୍ନତିକରଣ ଓ ରକ୍ଷଣାବେକ୍ଷଣ କରିବା ପାଇଁ ରାଜ୍ୟରେ ଖାଲି ଥିବା ବିଭିନ୍ନ ଜିଲାର ପର୍ଯ୍ୟଟନ ଅଧିକାରୀଙ୍କ ପଦ ଗୁଡିକୁ ତ୍ବରିତ ପୂରଣ କରିବାର ଆବଶ୍ୟକତା ରହିଛି ବୋଲି ବିଭିନ୍ନ ମହଲରେ ମତ ପ୍ରକାଶ ପାଉଛି।
