ନୂଆଦିଲ୍ଲୀ: ଭାରତରେ କରୋନା ସଂକ୍ରମଣ ଉତ୍କଟ ହୋଇଥିବାବେଳେ ଅନେକ ରାଷ୍ଟ୍ର ସହାୟତାର ହାତ ବଢ଼ାଇଛନ୍ତି ଓ ସମବେଦନା ପ୍ରକାଶ କରୁଛନ୍ତି। ଏହା ଏକ ସାମୂହିକ ସମସ୍ୟା ଓ ସମସ୍ତେ ମିଳିମିଶି ଏହା ବିରୋଧରେ ଲଢ଼େଇ କରିବା ଉଚିତ ବୋଲି ବିଭିନ୍ନ ରାଷ୍ଟ୍ରମୁଖ୍ୟ ମତବ୍ୟକ୍ତ କରିଛନ୍ତି। ଏ କ୍ଷେତ୍ରରେ ସେମାନେ ଭାରତ ସହିତ ଅଛନ୍ତି ବୋଲି କହିଛନ୍ତି। ଆମେରିକା, ୟୁରୋପୀୟ ସଙ୍ଘ, ପାକିସ୍ତାନ, ଚୀନ୍, ଫ୍ରାନ୍ସ, ବ୍ରିଟେନ୍, ଅଷ୍ଟ୍ରେଲିଆ, ଭୁଟାନ, ରୁଷ୍, ଜର୍ମାନୀ, ୟୁଏଇ ପ୍ରମୁଖ ଚିନ୍ତା ପ୍ରକଟ କରିଛନ୍ତି। ଭାରତ ମଧ୍ୟ ଅନେକଙ୍କ ସହାୟତା ଲୋଡ଼ିଛି। ଏଭଳି ସଙ୍କଟଜନକ ସମୟରେ ନୂଆଦିଲ୍ଲୀ ‘ଅମ୍ଳଜାନ ମୈତ୍ରୀ’ ଅଭିଯାନରେ ବିଦେଶରୁ ଅମ୍ଳଜାନ ସିଲିଣ୍ଡର ଆଣିବା ଉଦ୍ୟମ ଆରମ୍ଭ କରିଛି। ସିଙ୍ଗାପୁର ଓ ୟୁଏଇ ସହିତ ଉଚ୍ଚ କ୍ଷମତାସଂପନ୍ନ ଅମ୍ଳଜାନ ଟ୍ୟାଙ୍କର ଭାରତୀୟ ବାୟୁସେନାର ପରିବହନ ବିମାନରେ ଆଣିବାକୁ ପଦକ୍ଷେପ ନିଆଯାଉଛି।
I want to express our solidarity with the people of India as they battle a dangerous wave of COVID-19. Our prayers for a speedy recovery go to all those suffering from the pandemic in our neighbourhood & the world. We must fight this global challenge confronting humanity together
— Imran Khan (@ImranKhanPTI) April 24, 2021
ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରନ ଭାରତକୁ ସମର୍ଥନ ଜଣାଇଛନ୍ତି। ବ୍ରିଟେନର ସ୍ୱାସ୍ଥ୍ୟ ଓ ସାମାଜିକ ଯତ୍ନ ଦାୟିତ୍ୱରେ ଥିବା ବୈଦେଶିକ ମନ୍ତ୍ରୀ ମାଟ୍ଟ ହାନ୍କକ ସହଯୋଗ ପାଇଁ ପ୍ରସ୍ତୁତ ଥିବା କହିଛନ୍ତି। ଚୀନ ବୈଦେଶିକ ମନ୍ତ୍ରଣାଳୟ ମୁଖପାତ୍ର ଝାଓ ଲିଜିଆନ୍ କହିଛନ୍ତି ଯେ ଭାରତର ବର୍ତ୍ତମାନ ପରିସ୍ଥିତିକୁ ନେଇ ଚୀନ ଦୁଃଖିତ। ଚୀନ ସରକାର ଏବଂ ଦେଶର ଜନସାଧାରଣ ଭାରତ ସରକାର ଓ ଭାରତୀୟଙ୍କ ସହିତ ଏହି ଦୁର୍ଦିନରେ ଦୃଢ଼ ଭାବେ ରହିଛନ୍ତି। ପାକିସ୍ତାନର ଇଧି ଫାଉଣ୍ଡେସନର ଅଧ୍ୟକ୍ଷ ଫଇସଲ ଇଧି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନିକଟକୁ ପତ୍ରଲେଖି ନିଜର ସ୍ୱେଚ୍ଛାସେବୀ ଏବଂ ୫୦ଟି ଆମ୍ବୁଲାନ୍ସ ସହିତ ଭାରତକୁ ପ୍ରବେଶ କରିବାକୁ ଅନୁମତି ମାଗିଛନ୍ତି। ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାଁ ଓ ତାଙ୍କ ମନ୍ତ୍ରିମଣ୍ଡଳ ସଦସ୍ୟମାନେ ମଧ୍ୟ ଭାରତ ପାଇଁ ଚିନ୍ତା ପ୍ରକଟ କରିଛନ୍ତି। ଏହା ଏକ ବିଶ୍ବ ସମସ୍ୟା ବୋଲି କହିଛନ୍ତି ଇମ୍ରାନ। ଭାରତବାସୀଙ୍କ ସୁସ୍ଥତା ପାଇଁ ସେ ପ୍ରାର୍ଥନା କରୁଥିବା କହିଛନ୍ତି। ତାଙ୍କ ମନ୍ତ୍ରୀମାନେ ସାମାଜିକ ଗଣମାଧ୍ୟମରେ ନିଜର ପ୍ରତିକ୍ରିୟା ପ୍ରକାଶ କରୁଛନ୍ତି। ପାକିସ୍ତାନରେ ଏବେ ଭାରତ ପ୍ରତି ସମବେଦନାର ସୁଅ ଛୁଟୁଛି। ଦେଶର ସାମାଜିକ ଗଣମାଧ୍ୟମ ଏ କ୍ଷେତ୍ରରେ ସକ୍ରିୟ ହୋଇ ଉଠିଛନ୍ତି।
