ନୀଳଗିରି: ନୀଳଗିରି ସମେତ ବାଲେଶ୍ୱର ଜିଲାର ବିଭିନ୍ନ ଅଞ୍ଚଳରେ ଜାଲ୍ନୋଟ କାରବାର ହେଉଥିବା ଅଭିଯୋଗ ଆସିଛି। ଏହି ରାକେଟରେ କାମ କରୁଥିବା ଅଭିଯୁକ୍ତମାନେ ଛୋଟ ବଜାର, ହାଟ ଓ ଖୁଚୁରା ବ୍ୟବସାୟୀଙ୍କୁ ଟାର୍ଗେଟ କରି ଜାଲ୍ନୋଟ କାରବାର କରୁଥିବା ଜଣାପଡ଼ିଛି। ଏହି କାରବାରରେ ସମ୍ପୃକ୍ତ ଥିବା ୨ଜଣଙ୍କୁ ନୀଳଗିରି ପୁଲିସ ଗିରଫ କରିଛି।
ନୀଳଗିରି ଥାନା ସନ୍ତରାଗଡ଼ିଆ ନିକଟସ୍ଥ ନୟାପାଟଣା ଗାଁର ପୂର୍ଣ୍ଣଚନ୍ଦ୍ର ନାୟକ(୫୫) ଗତ ୨୨ତାରିଖରେ ଏକ ବିଦେଶୀ ମଦ ଦୋକାନକୁ ଯାଇ ଜାଲ ନୋଟ କାରବାର କରିଥିଲେ। ଏହାପରେ ସେହି ଅଞ୍ଚଳର ପାନ ଓ ମାଛ ଦୋକାନରେ ମଧ୍ୟ ଏହି ଜାଲନୋଟ କାରବାର କରିଥିବା ଜଣାପଡ଼ିଥିଲା । ଏ ସମ୍ପର୍କରେ ନୀଳଗିରି ପୁଲିସ ଜାଣିବା ପରେ ଏସଡିପିଓ ସରୋଜ ଉପାଧ୍ୟାୟ ଓ ଆଇଆଇସି ଗୋପାଳ ଚନ୍ଦ୍ର କର୍ଣ୍ଣ ମିଳିତଭାବେ ରାକେଟକୁ ଧରିବା ପାଇଁ ୨ଟି ସ୍ୱତନ୍ତ୍ର ଟିମ ଗଠନ କରିଥିଲେ । ଅଭିଯୁକ୍ତ ପୂର୍ଣ୍ଣଚନ୍ଦ୍ରଙ୍କୁ ପ୍ରଥମେ କାବୁ କରାଯାଇଥିବା ବେଳେ ପରବର୍ତ୍ତୀ ସମୟରେ ଏହି ରାକେଟରେ କାମ କରୁଥିବା ଖଇରା ବ୍ଲକ ସେରପୁର ଅଞ୍ଚଳର ବୀଣାପାଣି ମୁଖୀ(୫୦) ନାମକ ଜଣେ ବିଧବାଙ୍କୁ ସୋରସ୍ଥିତ ତାଙ୍କ ଭଡ଼ାଘରୁ ଗିରଫ କରିଥିଲେ। ଏହି ରାକେଟରେ ମୁଖ୍ୟଅଭିଯୁକ୍ତ ଜଣକ ଯାଜପୁର ଅଞ୍ଚଳର ବୋଲି ସୂଚନା ମିଳିଛି । ଜାଲନୋଟ କାରବାରର ବ୍ଲ୍ୟୁ-ପ୍ରିଣ୍ଟ ସମ୍ପର୍କରେ ଏକ ସାମ୍ବାଦିକ ସମ୍ମିଳନୀରେ ବାଲେଶ୍ୱର ଏସ୍ପି ସାଗରିକା ନାଥ ପ୍ରକାଶ କରିଛନ୍ତି । ସେହିପରି ମୁଖ୍ୟ ଅଭିଯୁକ୍ତକୁ ଖୁବଶୀଘ୍ର ଧରାଯିବ ଏବଂ ଏନେଇ ଅଧିକ ତଦନ୍ତ ଜାରି ରହିଛି ବୋଲି ସାମ୍ବାଦିକ ସମ୍ମିଳନୀରେ ଏସପି ସୂଚନା ଦେଇଛନ୍ତି । ଗିରଫ ହୋଇଥିବା ଦୁଇ ଅଭିଯୁକ୍ତଙ୍କଠାରୁ ମୋଟ ୩୨ହଜାର ୭ଶହ ଟଙ୍କା ଜାଲ୍ନୋଟ ସହ ୨ଟି ମୋବାଇଲ ଫୋନ ଜବତ କରାଯାଇଛି ।
ନୀଳଗିରିରେ ୩୨ହଜାର ୭ଶହ ଜାଲ ନୋଟ ଜବତ, ୨ ଗିରଫ
Popular Categories
Previous article
Next article