ବିନା ବୀମାରେ ଗାଡି ଚଳାଉଛନ୍ତି ନିଖିଲ କାମଥ, ଭିଡିଓ ଭାଇରାଲ ପରେ ମଜା ଉଡାଇଲେ ଲୋକେ

ନୂଆଦିଲ୍ଲୀ : ଜିରୋଧାର ସହ-ପ୍ରତିଷ୍ଠାତା ନିଖିଲ କାମଥ ଓ ବଲିଉଡ ଅଭିନେତ୍ରୀ ରିୟା ଚକ୍ରବର୍ତ୍ତୀଙ୍କ ଭିଡିଓ ସାମାଜିକ ଗଣମାଧ୍ୟମରେ ଖୁବ୍ ଭାଇରାଲ ହେଉଛି । ଏହି ଭିଡିଓରେ ନିଖିଲ କାମଥ ସୁଜୁକି ଇଣ୍ଟ୍ରଡର ଭିଜେଡଆର ୧୮୦୦ ଜେଡଏଲ୨ ବାଇକ ଚଳାଉଥିବା ନଜର ଆସୁଛନ୍ତି । କାମଥ ଜ୍ୟାକେଟ ଓ ସର୍ଟ୍ସ ପିନ୍ଧିଛନ୍ତି । ମୁହଁରେ ମାସ୍କ ଓ ହେଲମେଟ୍ ମଧ୍ୟ ପିନ୍ଧିଛନ୍ତି କାମଥ । ସାମାଜିକ ଗଣମାଧ୍ୟମରେ ଭାଇରାଲ ହେଉଥିବା ଏହି ଭିଡିଓରେ ଖୁବ୍ କମେଣ୍ଟ କରୁଛନ୍ତି ୟୁଜର୍ । ତେବେ ଜଣେ ୟୁଜର ବାଇକର ନମ୍ବର ପ୍ଲେଟ ତଥ୍ୟ ସର୍ଚ୍ଚ କରିବା ପରେ ଜଣାପଡିଛି କି ବାଇକର ଇନସ୍ୟୁରାନ୍ସ ଗତ ବର୍ଷ ସମାପ୍ତ ହୋଇଯାଇଛି । ଏହି ବାଇକର ଦାମ୍ ପ୍ରାୟ ୧୮ ଲକ୍ଷ ଟଙ୍କା ।

Guess is this bike purchased or on rental? 😅#iykyk pic.twitter.com/buZYIbUc0O

— Shantanu Goel (@shantanugoel) August 18, 2024

କାରଇନଫୋ ଆପ୍ ମାଧ୍ୟମରେ ଏହା ଜଣାପଡିଛି ଯେ ଏହି ବାଇକ କାମଥଙ୍କ ନାଁରେ ରହିଛି । ୨୦୧୨ ମସିହାରେ ଏହି ବାଇକ ବେଙ୍ଗାଲୁରୁରୁ କିଣିଛନ୍ତି କାମଥ । କିନ୍ତୁ ୨୦୨୩ରୁ ଏହାର ବୀମା ସମାପ୍ତ ହୋଇଯାଇଛି । ମଜା କଥା ହେଉଛି ଲୋକେ ସାମାଜିକ ଗଣମାଧ୍ୟମରେ ପ୍ରତିକ୍ରିୟା ରଖି ତାଙ୍କୁ ଗାଡିର ବୀମା କରାଇବାକୁ ପରାମର୍ଶ ଦେଉଛନ୍ତି । ସୁଜୁକି ଇଣ୍ଟ୍ରଡର ଭିଜେଡଆର ୧୮୦୦ ଜେଡଏଲ୨ରେ ୧୭୮୩ ସିସିର ଇଞ୍ଜିନ୍ ମିଳିଥାଏ ।  ଏହି ବାଇକ ୧୨୭ ବିଏଚପିର ପାଓ୍ବର ଦେଇଥାଏ । ୫ ସ୍ପିଡ୍ ମାନୁଆଲ ଟ୍ରାନ୍ସମିଶନ ବିଶିଷ୍ଟ ଏହି ବାଇକର ସର୍ବାଧିକ ସ୍ପିଡ ୨୦୯ କିଲୋମିଟର ପ୍ରତି ଘଣ୍ଟା । କହିରଖୁଛୁ ନିଖିଲ କାମଥ ନିଜ ଭାଇ ନୀତିନ କାମଥଙ୍କ ସହିତ ମିଶି ୨୦୧୦ରେ ଜିରୋଧା ଆରମ୍ଭ କରିଥିଲେ । ଏହା ପରେ ନିଖିଲ କାମଥ ଦେଶର ସବୁଠାରୁ କମ୍ ବୟସ୍କ ଅରବପତି ପାଲଟିଯାଇଥିଲେ ।