ଗୋପାଳପୁର: ଗୋପାଳପୁର ଥାନା ଅନ୍ତର୍ଗତ ପାର୍ବତୀ ପୁର ଠାରେ ଆଜି ସନ୍ଧ୍ୟା ବେଳେ ପୂର୍ବ ଶତ୍ରୁତାକୁ କେନ୍ଦ୍ରକରି ଜଣେ ଯୁବକକୁ ଗୋଡ଼ାଇ ଗୋଡ଼ାଇ ଛୁରାମାଡ କରିବା ବେଳେ ଏହାକୁ ପ୍ରତିବାଦ କରିବାରୁ ଅନ୍ୟ ୩ ଜଣଙ୍କୁ ମଧ୍ୟ ଆକ୍ରମଣ ହୋଇଥିବା ଜଣାପଡିଛି। ଘଟଣା ପରେ ପୁଲିସ ପହଞ୍ଚି ୩ ଆହତଙ୍କୁ ବ୍ରହ୍ମପୁର ବଡ ମେଡିକାଲ ନେଇଥିବା ବେଳେ ଅନ୍ୟ ଜଣଙ୍କୁ ସ୍ଥାନୀୟ ମେଡିକାଲରେ ଚିକିତ୍ସା କରିଥିବା ଜଣାପଡିଛି। ଆହତଙ୍କ ମଧ୍ୟରେ ଅଜୟ ଦାସ, ନାରାୟଣ ଦାସ, ମାହାଲି ଦାସ ଏବଂ ବବିତା ଦାସ ରହିଛନ୍ତି।
ଅଭିଯୋଗ ଅନୁଯାୟୀ ଅଜୟ ଓ ତାଙ୍କ ଜଣେ ସାଙ୍ଗ ସହ ମୋଟରସାଇକେଲରେ ଗୋପାଳପୁର ପଟକୁ ଯାଉଥିବା ବେଳେ ଗାଁ ଶେଷ ମୁଣ୍ଡରେ ଥିବା ଏକ ପୋଖରୀ ହୁଡ଼ାରେ ପୂର୍ବ ପ୍ରସ୍ତୁତି ହୋଇ ରହିଥିବା କିଛି ଯୁବକ ଅଚାନକ ଅଜୟକୁ ଆକ୍ରମଣ କରିଥିଲେ। ଏଥିରେ ଅଜୟ ଭୟଭୀତ ହୋଇ ଗାଁ ମଧ୍ୟକୁ ଦୌଡ଼ି ପଳାଇବାକୁ ଚେଷ୍ଟା କରିଥିଲେ। ଏହି ସମୟରେ ଯୁବକ ମାନେ ଅଜୟର ପିଛା କରିବା ସହ ଅଜୟର ଘର ମଧ୍ୟକୁ ପ୍ରବେଶ କରିବାକୁ ଉଦ୍ୟମ କରିଥିଲେ ଏବଂ ଅଜୟକୁ ଇଟା ଫୋପାଡି ଆକ୍ରମଣ କରିଥିଲେ। ଫଳରେ ଅଜୟର ମୁଣ୍ଡ ଫାଟି ଯାଇଥିଲା। ଘଟଣା ଜଣାପଡ଼ିବା ପରେ ଅଜୟର ସମ୍ପର୍କୀୟ ଭାଇ ନାରାୟଣ ଦାସ ଓ ଜେଜେମା ମାହାଲି ଦାସ ଘଟଣାସ୍ଥଳରେ ପହଞ୍ଚିବା ସମୟରେ ଯୁବକମାନେ ନାରାୟଣକୁ ଏକ ଛୁରାରେ ପଛପଟୁ ଆକ୍ରମଣ କରିଥିଲେ ଏବଂ ପଥର ମାଡ କରିଥିଲେ। ଏଥିରେ ନାରାୟଣ ସମେତ ମାହାଲି ସମେତ ଅଜୟର ଖୁଡି ବବିତା ଦାସ ପ୍ରମୁଖ ଆହତ ହୋଇଥିଲେ।
ଘଟଣା ନେଇ ଥାନାରେ ଅଜୟର ଭଉଣୀ ରୂପା ଦାସଙ୍କ ପକ୍ଷରୁ ଲିଖିତ ଅଭିଯୋଗ କରିଥିବା ବେଳେ ଘଟଣାସ୍ଥଳରୁ ପୁଲିସ ଏକ ଛୁରୀ ଜବତ କରିଛି।
