ନବରଙ୍ଗପୁର: ମିଶନଶକ୍ତି ହଲ ଠାରେ ଜିଲା ଧାନ କ୍ରୟ ବୈଠକ ଅନୁଷ୍ଠିତ ହୋଇଥିଲା। ଏଥିରେ ଜିଲାପାଳ ଡ଼ଃ.କମଳ ଲୋଚନ ମିଶ୍ର ଅଧକ୍ଷତା କରିଥିଲେ। ଡାବୁଗାଁ ବିଧାୟକ ମନୋହର ରନ୍ଧାରୀ, ଉମରକୋଟ ବିଧାୟକ ନିତ୍ୟାନନ୍ଦ ଗଣ୍ଡ, ସାଂସଦ ପ୍ରତିନିଧି ପ୍ରମୋଦ କୁମାର ପାଢୀ ଯୋଗ ଦେଇଥିଲେ। ଜିଲା ଯୋଗାଣ ଅଧିକାରୀ ବେଣୁଧର ପାଣିଗ୍ରାହୀ ଗତ ବର୍ଷର ବିବରଣୀ ପାଠ କରିଥିଲେ। ଗତ ବର୍ଷ ଜିଲାର ଧାନ ମଣ୍ଡିରେ ଅବ୍ୟବସ୍ଥା ନେଇ ଉଦବେଗ ପ୍ରକାଶ ପାଇଥିଲା। ସାଂସଦ ପ୍ରତିନିଧି ଶ୍ରୀ ପାଢ଼ୀ ଆରଏମସି ଦ୍ୱାରା ମଣ୍ଡିରେ ଚାଷୀଙ୍କ ପାଇଁ କୌଣସି ସୁବିଧା କରାଯାଉନଥିବା ନେଇ ତୀବ୍ର ଅସନ୍ତୋଷ ପ୍ରକାଶ କରିବା ସହ ଆରଏମସି ସମ୍ପାଦକଙ୍କୁ ମଣ୍ଡିରେ ଆଣ୍ଠେଇ ଦେବେ ବୋଲି ଧମକ ଦେଇଥିଲେ।
ଚଳିତ ବର୍ଷ ମଣ୍ଡିରେ ୨,୦୮,୨୦୯ ମେଟ୍ରିକ ଟନ ଧାନ କିଣାଯିବାକୁ ଟାର୍ଗେଟ ଆସିଛି। ପରବର୍ତ୍ତୀ ସମୟରେ ଏହା ବୃଦ୍ଧି ପାଇବ ବୋଲି ଜିଲାପାଳ ଡ଼ଃ. ମିଶ୍ର କହିଥିଲେ। ପ୍ରତି ମଣ୍ଡିରେ ଚାଷୀଙ୍କ ସୁବିଧା ପାଇଁ ଦରି, ଚୌକି, ଲାଇଟ, ପିଇବା ପାଣି ଯୋଗାଇ ଦିଆଯିବ। ସିସି କ୍ୟାମେରା ମଧ୍ୟ ଲାଗିବ। ଚଳିତ ବର୍ଷ ୧୩ ଟି ଲ୍ୟାମ୍ସ, ୪୫ ଟି ମହିଳା ଏସଏଚଜି ଓ ୨ଟି ପାଣିପଞ୍ଚାୟତ ଧାନ କିଣିବ। ମୋଟ ୪୫୮୦୯ ଜଣ ଚାଷୀ ନାମ ପଞ୍ଜୀକରଣ କରିଛନ୍ତି। ଜିଲାର ୮୬ଟି ମିଲ ଧାନ କିଣିଥିବା ବେଳେ ୪୭ଟି ମିଲ ଶତ ପ୍ରତିଶତ ଚାଉଳ ଦେଇଛି। ୨୦ଟି ମିଲ ୮୦ରୁ ଅଧିକ ପ୍ରତିଶତ ଦେଇଛି। ଅନ୍ୟ ୧୪ଟି ମିଲ ୭୦ ପ୍ରତିଶତରୁ କମ ଦେଇଛି। ତେଣୁ ଯେଉଁ ମିଲ ଶତପ୍ରତିଶତ ଚାଉଳ ଦେଇ ନ।ହାନ୍ତି, ସେମାନଙ୍କ ବିରୋଧରେ ସରକାର କାର୍ଯ୍ୟାନୁଷ୍ଠାନ ନେବେ ବୋଲି କୁହାଯାଇଛି।
