ଲକ୍ଷ୍ମୀପୁର: ମଣିଷର ସବୁ ଯାତ୍ରାର ଶେଷରେ ହେଉଛି ମଶାଣି ଯାତ୍ରା। ତେବେ କୋରାପୁଟ ଜିଲା ଲକ୍ଷ୍ମୀପୁର ବ୍ଲକରେ ଅନେକ ଗାଁର ଶ୍ମଶାନ ଘାଟକୁ ଯିବା ପାଇଁ ରାସ୍ତା ନଥିବା କାରଣରୁ କୌଣସି ବ୍ୟକ୍ତିଙ୍କ ପରଲୋକ ହେଲେ ସେମାନଙ୍କ ପରିଜନ ମାନେ ବିଲ ହିଡ଼ ଦେଇ ମୃତ ଦେହକୁ ନେଇ ଯିବାକୁ ପଡୁଛି। ଏହି ଭଳି ଘଟଣା ସୋମବାର ଗୌଡଗୁଡା ପଞ୍ଚାୟତର ପରଜା ଅଳଚି ଗ୍ରାମରେ ଦେଖିବାକୁ ମିଳିଛି। ଜୋମି ଯାନୀ ନାମ୍ନୀ ଜଣେ ବୃଦ୍ଧାଙ୍କ ସୋମବାର ପରଲୋକ ହୋଇଥିଲା। ପରିଜନ ମାନେ ତାଙ୍କ ମୃତ ଦେହକୁ ଧାନ ବିଲ ହିଡ଼ରେ ବହୁତ ଅସୁବିଧାରେ ନେଇକରି ଯିବାକୁ ପଡିଛି। ଏହି ଘଟଣା ଯେ କେବଳ ପ୍ରଥମ ଥର ପାଇଁ ତାହା ନୁହେଁ, ଗ୍ରାମର ଯେକୌଣସି ବ୍ୟକ୍ତିଙ୍କ ପରଲୋକ ପରେ ଶବ ଶତ୍କାର କରିବା ପାଇଁ ଲୋକ ମାନଙ୍କୁ ଏହି ଭଳି ଅସୁବିଧାର ସମ୍ମୁଖୀନ ହେବାକୁ ପଡ଼ୁଛି। ସରକାର ଗାଁ ଠାରୁ ଆରମ୍ଭ କରି ମନ୍ଦିର, ଚର୍ଚ୍ଚ ଓ ଗିର୍ଜା ପର୍ଯ୍ୟନ୍ତ ସବୁଆଡ଼େ ରାସ୍ତା ନିର୍ମାଣ କରୁଥିବା ବେଳେ ପରିତାପର ବିଷୟ ଏହି କି ମଣିଷର ଶେଷ ଠିକଣା ଭାବେ ପରିଚିତ ମଶାଣିକୁ ରାସ୍ତା ନଥିବା କାରଣରୁ ଲୋକେ ବିଲ ହିଡ଼ରେ ମୃତ ଦେହକୁ ନେଇ ଯିବାକୁ ପଡୁଛି। କେବଳ ପରଜା ଅଳଚି ନୁହେଁ ବ୍ଲକର ଅନେକ ଗ୍ରାମରେ ଏହିପରି ଅବସ୍ଥା ଦେଖିବାକୁ ମିଳୁଛି।
କେଉଁଠି ରାସ୍ତା ନାହିଁ ତ କେଉଁଠି ନଦୀରେ ପୋଲ ନଥିବା କାରଣରୁ ବର୍ଷା ଦିନେ ଭରା ନଈରେ ମର ଶରୀରକୁ ନେଇଯିବା ପାଇଁ ପରିଜନଙ୍କ ଠାରୁ ଆରମ୍ଭ କରି ଗ୍ରାମବାସୀ ମାନେ ବିପଦ ସଙ୍କୁଳ ଭାବେ ଯିବାକୁ ପଡୁଛି। ଏହି ସମସ୍ୟା ପ୍ରତି ଦୃଷ୍ଟି ଦେବାକୁ ଦାବି ହୋଇଛି।
