ଫୁଲବାଣୀ: ସମଗ୍ର କନ୍ଧମାଳ ଜିଲ୍ଲାରେ ଗତ ୨ ଦିନ ଧରି ଲାଗି ରହିଛି ଲଗାଣ ବର୍ଷା। ଫଳରେ ଅନେକ ନଦୀରେ ଜଳସ୍ତର ବୃଦ୍ଧି ପାଇବା ସହ ରାସ୍ତା ଓ କଲଭର୍ଟ ଧୋଇ ଯାଇଛି। ଏହି କାରଣରୁ ଅନେକ ଗ୍ରାମକୁ ଯୋଗାଯୋଗ ବିଚ୍ଛିନ୍ନ ହୋଇଛି। ଫିରିଙ୍ଗିଆ ବ୍ଲକ ସଲାଗୁଡ଼ା ପଞ୍ଚାୟତର ମୁଣ୍ଡାସାହିରୁ କାଟ୍ରାମାଲା ପ୍ରଧାନମନ୍ତ୍ରୀ ସଡ଼କର ମାତ୍ର ୩ କିମି ଭିତରେ ୬ଟି କଲଭର୍ଟ ଭାଙ୍ଗିଯିବା ସହ ରାସ୍ତା ମଧ୍ୟ ସମ୍ପୂର୍ଣ୍ଣ ଧୋଇ ହୋଇଯାଇଛି। ଫଳରେ ଏହି ରାସ୍ତା ଦେଇ ଯାତାୟାତ ବ୍ୟାହତ ହୋଇଛି। ସେହିପରି ମୁଣ୍ଡାସାହି-ଗାଡ଼ିପଦର ରାସ୍ତାରେ ଦୁଇଟି କଲଭର୍ଟ ସମେତ ରାସ୍ତା ବର୍ଷା ଯୋଗୁଁ ଧୋଇ ଯାଇଛି।
ଫଳରେ ଖେତାପାଜୁ, ଗାଡିପଦର, କାଶିନିପଡ଼ା, କିଲୁପଙ୍ଗା, ବୁଦାଲି ସମେତ ୧୦ରୁ ଉର୍ଦ୍ଧ୍ବ ଗ୍ରାମ ବାହ୍ୟ ଜଗତରୁ ବିଚ୍ଛିନ୍ନ ହୋଇପଡ଼ିଛି। ତେବେ ଏହି ରାସ୍ତା ମାତ୍ର ୬ ମାସ ତଳେ ନିର୍ମାଣ କରାଯାଇଥିବାରୁ ଏତେ ଶୀଘ୍ର କିଭଳି ଧୋଇ ହୋଇଗଲା ବୋଲି ପ୍ରଶ୍ନ କରିଛନ୍ତି ସଲାଗୁଡ଼ା ସରପଞ୍ଚ ରୋହିତ କହଁର। ଶୁକ୍ରବାର ରାତିରୁ ପ୍ରବଳ ବର୍ଷା ଲାଗି ରହିଥିବାରୁ ଅନେକ ଗ୍ରାମ ଜଳବନ୍ଦୀ ହୋଇଥିବା ଜଣାପଡ଼ିଛି। ବାଘ ନଦୀରେ ଜଳସ୍ତର ବୃଦ୍ଧି ପାଇବାରୁ ଡଙ୍ଗିମେଣ୍ଡି ଓ ଆଖପାଖ ଗ୍ରାମମାନଙ୍କୁ ଯାତାୟାତ ବାଧାପ୍ରାପ୍ତ ହୋଇଛି।
