କାଶ୍ମୀର ବରଫାବୃତ ଅଞ୍ଚଳକୁ ଗଲେ ୧୮୯ କର୍ମଚାରୀ

ଶ୍ରୀନଗର: ଲୋକସଭା ନିର୍ବାଚନ ପରିପ୍ରେକ୍ଷୀରେ ଚଳିତମାସ ୧୯ରେ ପ୍ରଥମ ପର୍ଯ୍ୟାୟ ଭୋଟଗ୍ରହଣ କରାଯିବ। ଏହି ପ୍ରର୍ଯ୍ୟାୟରେ ଜାମ୍ମୁ-କାଶ୍ମୀରର ଉଦ୍ଧାମପୁର-କାଠୁଆ ଆସନ ପାଇଁ ଭୋଟଗ୍ରହଣ କରାଯିବ। ଏଥିପାଇଁ ଶୁକ୍ରବାର ୧୮୯ ନିର୍ବାଚନ ପରିଚାଳନା କର୍ମଚାରୀଙ୍କୁ ହେଲିକପ୍ଟର ଯୋଗେ ବରଫାବୃତ କିସ୍ତୱାଡକୁ ନିଆଯାଇଛି। ଏମାନେ ବରଫରେ ଚାଲି ଚାଲି ମାରୱା ଓ ୱାରୱନ୍‌ ଭଳି ଦୁର୍ଗମ ସ୍ଥାନକୁ ଯିବେ ବୋଲି ଜଣାପଡିଛି। କେନ୍ଦ୍ରମନ୍ତ୍ରୀ ଜିତେନ୍ଦ୍ର ସିଂହଙ୍କ ସମେତ ଏହି ପର୍ଯ୍ୟାୟରେ ମୋଟ ୧୨ ଜଣ ପ୍ରାର୍ଥୀ ଉଦ୍ଧାମପୁର ଆସନରେ ପ୍ରତିଦ୍ବନ୍ଦ୍ବିତା କରୁଛନ୍ତି। ଶୀତଋତୁରେ ପ୍ରାୟ ୪ ମାସ କିସ୍ତୱାଡ୍‌ର ଏହି ଅଞ୍ଚଳଗୁଡିକ ୮/୧୦ ଫୁଟ ଗଭୀର ଘନ ବରଫରେ ଆଚ୍ଛାଦିତ ହୋଇଥାଏ। ପ୍ରଥମ ପର୍ଯ୍ୟାୟ ପାଇଁ ଏହି ଦୁର୍ଗମ ଅଞ୍ଚଳରେ ୩୪ଟି ମତଦାନ କେନ୍ଦ୍ର ସ୍ଥାପନ କରାଯାଇଛି। ପ୍ରତିକୂଳ ପାଣିପାଗ, ଆଭ୍ୟନ୍ତରୀଣ ନିରାପତ୍ତା ଭଳି ପ୍ରସଙ୍ଗକୁ ଦୃଷ୍ଟିରେ ରଖି ନିର୍ବାଚନ ପରିଚାଳନା କର୍ମଚାରୀଙ୍କୁ ଆଗୁଆ ଏହି ଅଞ୍ଚଳକୁ ପଠାଯାଇଥିବା କୁହାଯାଇଛି।