ମଣିପୁରରେ ପୁଣି ହିଂସା : ୨ ମୃତ, ୭ ଆହତ

ଗୌହାଟୀ: ବିଷ୍ଣୁପୁର ଜିଲାର ସୀମାନ୍ତ ଅଞ୍ଚଳ ପୁଣି ଅଶାନ୍ତ ହୋଇଉଠିଛି। ନାରସେନା ସଂଲଗ୍ନ ଗ୍ରାମରେ ଗୁଳି ବିନିମୟରେ ୨ ଜଣଙ୍କର ମୃତ୍ୟୁ ହୋଇଥିବାବେଳେ ୭ ଜଣ ଆହତ ହୋଇଛନ୍ତି ବୋଲି ମଣିପୁର ପୁଲିସ ସୂଚନା ଦେଇଛନ୍ତି। କୃଷକମାନେ ଚାଷ କରୁଥିବାବେଳେ ଆଖିବୁଜା ଗୁଳି ଚାଳନା ହୋଇଥିବା ଜଣାପଡ଼ିଛି। ଏହି ଅଞ୍ଚଳରେ ନିୟୋଜିତ ଜିଲା ପୁଲିସ, ଆସାମ ରାଇଫଲ୍ସ, ଆର୍ମି ଏବଂ ସେଣ୍ଟ୍ରାଲ ଫୋର୍ସ ଏବେ ପରିସ୍ଥିତିକୁ ନିୟନ୍ତ୍ରଣକୁ ଆଣିବାକୁ ପ୍ରୟାସ ଜାରି ରଖିଛନ୍ତି। ଆଜି ଖୋରେଣ୍ଟାକ୍ ଅଞ୍ଚଳର ଗ୍ରାମରେ ଗୁଳି ଚଳାଇ ଜଣେ ସ୍ୱେଚ୍ଛାସେବୀଙ୍କର ମୃତ୍ୟୁ ଘଟିଛି ବୋଲି ଆଦିବାସୀ ନେତା ଫୋରମ୍ ପକ୍ଷରୁ ଦାବି କରାଯାଇଛି। ଗୁରୁତର ଆହତମାନେ ଇମ୍ଫାଲର ଏକ ଘରୋଇ ଡାକ୍ତରଖାନାରେ ଚିକିତ୍ସିତ ହେଉଛନ୍ତି। ସେମାନଙ୍କ ଅବସ୍ଥା ଗୁରୁତର ଥିବା ଡାକ୍ତର ସୂଚନା ଦେଇଛନ୍ତି।