ନୂଆଦିଲ୍ଲୀ : ଜାତୀୟ ସଂଗୀତରେ ସଂଶୋଧନ କରିବା ପାଇଁ ସଂସଦରେ ପ୍ରସ୍ତାବ ଆଗତ କରାଯାଇଛି। କଂଗ୍ରେସର ରାଜ୍ୟସଭା ସଦସ୍ୟ ରିପୁନ ବୋରା ଗୃହରେ ଏହି ପ୍ରସ୍ତାବ ଆଗତ କରିଛନ୍ତି। ଆଗତ ବେସରକାରୀ ପ୍ରସ୍ତାବ ଅନୁଯାୟୀ ଜାତୀୟ ସଂଗୀତରେ ଥିବା ଶବ୍ଦ ‘ସିନ୍ଧ’କୁ ପରିବର୍ତ୍ତନ କରାଯାଇ ତା’ ସ୍ଥାନରେ ‘ଉତ୍ତର-ପୂର୍ବାଞ୍ଚଳ’ ଶବ୍ଦକୁ ସାମିଲ କରାଯାଉ। କଂଗ୍ରେସ ସାଂସଦ ତାଙ୍କ ପ୍ରସ୍ତାବରେ ଉଲ୍ଲେଖ କରିଛନ୍ତି ଯେ ଉତ୍ତର ପୂର୍ବାଞ୍ଚଳ ଭାରତର ଏକ ଗୁରୁତ୍ୱପୂର୍ଣ୍ଣ ଅଞ୍ଚଳ। ଏହା ଜାତୀୟ ସଙ୍ଗୀତରେ ସ୍ଥାନ ନ ପାଇବା ଦୁର୍ଭାଗ୍ୟର ବିଷୟ। ଅନ୍ୟପଟେ ଜାତୀୟ ସଙ୍ଗୀତରେ ସ୍ଥାନୀତ ଥିବା ଶବ୍ଦ ‘ସିନ୍ଧ’ ଏବେ ଆଉ ଭାରତର ଅଂଶ ହୋଇ ନାହିଁ। ଏହା ଏବେ ପାକିସ୍ତାନର ଅଂଶବିଶେଷ। ଏହା ପୂର୍ବରୁ ୨୦୧୬ରେ ଶିବସେନା ସାଂସଦ ଅରବିନ୍ଦ ସାୱନ୍ତ ଜାତୀୟ ସଙ୍ଗୀତରୁ ‘ସିନ୍ଧ’ ଶବ୍ଦ ହଟାଇ ଦେବାକୁ ଦାବି କରିଥିଲେ। କାରଣ ସିନ୍ଧ ନାମରେ କୌଣସି ରାଜ୍ୟ ବା ଅଞ୍ଚଳ ଭାରତରେ ଏବେ ନାହିଁ। ସଂସଦ ଜାତୀୟ ସଙ୍ଗୀତକୁ ଅନୁମୋଦନ କରିଛି ଓ ସଂସଦ ଚାହିଁଲେ ଏଥିରେ ପରିବର୍ତ୍ତନ କରିପାରିବ। ନୋବେଲ ପୁରସ୍କାର ବିଜେତା ରବୀନ୍ଦ୍ର ନାଥ ଠାକୁର ଜାତୀୟ ସଙ୍ଗୀତ ଜନ ଗଣ ମନକୁ ଲେଖିଥିଲେ। ୧୯୫୦ରେ ସମ୍ବିଧାନ ସଭା ଏହାକୁ ଅନୁମୋଦନ କରିଥିଲା।
