ନର୍ଲା/ଭବାନୀପାଟଣା : ଦନ୍ତା ଆକ୍ରମଣରେ ଗୁରୁତର କଳାହାଣ୍ଡି ନର୍ଲା ରେଞ୍ଜର ପ୍ରଶାନ୍ତ କୁମାର ପାଲୋ (୫୮)ଙ୍କ ଚିକିତ୍ସାଧୀନ ଅବସ୍ଥାରେ ରବିବାର ମୃତ୍ୟୁ ଘଟିଛି। ରବିବାର ପୂର୍ବାହ୍ନ ୧୦: ୩୦ରେ ପ୍ରଶାନ୍ତ କୁମାର ପାଲୋ ହାତୀ ଆକ୍ରମଣରେ ଗୁରୁତର ହୋଇଥିଲେ।ଆମପଡା ଗ୍ରାମ ନିକଟସ୍ଥ ଜଙ୍ଗଲରେ ଦନ୍ତା ହାତୀ ରେଞ୍ଜରଙ୍କୁ ଆକ୍ରମଣ କରିଥିଲା। ଉକ୍ତ ଅଞ୍ଚଳରେ ହାତୀ ରହିଥିବାରୁ ଅଞ୍ଚଳରେ ଭୟର ବାତାବରଣ ଲାଗି ରହିଛି। ବନ ବିଭାଗ ଘଟଣା ସ୍ଥଳରେ ଉପସ୍ଥିତ ରହିଛନ୍ତି। ସ୍ଥାନୀୟ ଲୋକେ ଭୟଭୀତ ଅବସ୍ଥାରେ ରହିଛନ୍ତି।
ସୂଚନା ଯୋଗ୍ୟ, ସକାଳେ ନର୍ଲା ରେଞ୍ଜର ଆମପଡା ନିକଟ ଜଙ୍ଗଲରେ ହାତୀ ପଲ ଥିବା ଖବର ପାଇ ଶ୍ରୀ ପାଲୋ ସହକର୍ମୀ ମାନଙ୍କ ସହ ଘଟଣା ସ୍ଥଳରେ ହାତୀ ପଲ ଉପରେ ନଜର ରଖିଥିଲେ। ଏହି ସମୟରେ ଗୋଟାଏ ହାତୀ ତାଙ୍କୁ ଦଳି ଦେଇଥିଲା। ପ୍ରଶାନ୍ତଙ୍କୁ ଗୁରୁତର ଅବସ୍ଥାରେ ନର୍ଲା ଡାକ୍ତରଖାନାକୁ ଅଣାଯାଇଥିଲା।
ଶ୍ରୀ ପାଲୋ ୧୯୮୬ ମସିହାରେ କଳାହାଣ୍ଡି ବନ ବିଭାଗରେ ଫରେଷ୍ଟର ଭାବେ ନିଯୁକ୍ତି ପାଇ ଜିଲ୍ଲାର ବିଭିନ୍ନ ବନଖଣ୍ଡରେ କାର୍ଯ୍ୟ କରିଥିଲେ। ଦିନ ପ୍ରାୟ ୧୦ଟା ବେଳେ ଜାମପଦର ଛକରେ କିଛି ବନ୍ଧୁଙ୍କ ସହ ଖୁସି ଗପ କରିବାର ଅଳ୍ପ ସମୟ ମଧ୍ୟରେ ସେ ହାତୀ ଆକ୍ରମଣର ଶିକାର ହେଇଥିଲେ। ଏହି ଖବର ବିଭିନ୍ନ ମହଲରେ ଶୋକର ଛାୟା ଖେଳାଇ ଦେଇଛି। ମିଷ୍ଟଭାଷୀ ଶ୍ରୀ ପାଲୋଙ୍କର ଛୋଟ ପୁଅ ଏବଂ ସ୍ତ୍ରୀ ଅଛନ୍ତି। ଉଲ୍ଲେଖ ଯୋଗ୍ୟ,ପୂର୍ବରୁ ହାତୀ ଆକ୍ରମଣରେ ନର୍ଲା ରେଞ୍ଜର ଜଣେ କର୍ମଚାରୀ ଆହତ ହେଇଥିବା ବେଳେ ଜୁନାଗଡ଼ ରେଞ୍ଜର ଜଣେ ଅସ୍ଥାୟୀ କର୍ମଚାରୀଙ୍କର ମୃତ୍ୟୁ ଘଟିଥିଲା।
