ସମାଜ ଡିଜିଟାଲ ଡେସ୍କ: ଆଜି ସକାଳ ୯ଟା ୩୦ମିନିଟରେ ପୁଣି ଆରମ୍ଭ ହେବ ରଥଟଣା । ଗତକାଲି ଗୁଣ୍ଡିଚା ଯାତ୍ରାରେ ମାତ୍ର ୧୦୦ମିଟର ଗଡିଥିଲା ମହାପ୍ରଭୁ ଶ୍ରୀଜଗନ୍ନାଥଙ୍କ ରଥଟଣା । ଶୁକ୍ରବାର ରାତି ୭ଟା ୪୬ମିନିଟରେ ନନ୍ଦିଘୋଷ ପାହୁଣ୍ଡେ ଗଡି ଅଟକି ରହିଥିଲା । ପରେ ରଥଟଣାକୁ ବନ୍ଦ କରାଯାଇଥିଲା । ତିନି ରଥ ତିନୋଟି ସ୍ଥାନରେ ଅଟକି ରହିଛି । ବଡଠାକୁର ବଳଭଦ୍ରଙ୍କ ତାଳଧ୍ୱଜ ରଥ ବଳଗଣ୍ଡି ଛକରେ ଅଟକି ରହିଥିବା ବେଳେ ଦର୍ପଦଳନ ରଥ ମରୀଚିକୋଟ ଛକରେ ରହିଛି । ସେପଟେ ମହାପ୍ରଭୁଙ୍କ ରଥ ନନ୍ଦିଘୋଷ ବଡଦାଣ୍ଡରେ ଅଟକିଛି ।
ଚଳିତ ଥର ଅନୁକୂଳ ପାଗ ଯୋଗୁଁ ଶ୍ରଦ୍ଧାଳୁଙ୍କ ସଂଖ୍ୟା ଯଥେଷ୍ଟ ବୃଦ୍ଧି ପାଇଛି । ରଥାରୁଢ ପରଂବ୍ରହ୍ମଙ୍କୁ ଦର୍ଶନ କରି ତୃତାର୍ଥ ହୋଇଛନ୍ତି ବିଶ୍ୱର କୋଟି କୋଟି ଜନତା । ତେବେ ରାତି ପ୍ରାୟ ୮ଟା ବେଳେ ନନ୍ଦିଘୋଷ ରଥଟଣା ଆରମ୍ଭ ଯୋଗୁଁ ଶହ ଶହ ବର୍ଷର ପରମ୍ପରା ଉଲ୍ଲଘଂନ ହୋଇଥିବା ଅଭିଯୋଗ ହୋଇଛି । ତିନୋଟି କାରଣ ପାଇଁ ରଥଟଣା ବିଳମ୍ବ ହୋଇଥିବା କୁହାଯାଉଛି । ପ୍ରଥମତଃ ବାରମ୍ବାର ଶ୍ରୀ ବଳଭଦ୍ରଙ୍କ ରଥ ମୋଡ ନେବା, ରଥ କର୍ଡନ ଭିତରେ ଅଧିକ ସଂଖ୍ୟାରେ ପାସ୍ ଧାରୀଙ୍କ ପ୍ରବେଶ ଏବଂ ଅନୁକୂଳ ପାଗ ଯୋଗୁ ଶ୍ରୀକ୍ଷେତ୍ରରେ ଆଶାତୀତ ଶ୍ରଦ୍ଧାଳୁଙ୍କ ସମାଗମ ପାଇଁ ରଥଟଣା ବିଳମ୍ବ ହୋଇଥିବା ଆଲୋଚନା ହେଉଛି ।
