କଟକ: ରାଜ୍ୟର ଖ୍ୟାତନାମା ମହିଳା ଫୁଟବଲ ପ୍ରଶିକ୍ଷକ ତଥା ଜାତୀୟସ୍ତରର ଖେଳାଳି ନନ୍ଦକିଶୋର ପଟ୍ଟନାୟକଙ୍କର ମଙ୍ଗଳବାର ପ୍ରତ୍ୟୁଷରେ ଦେହାନ୍ତ ହୋଇଯାଇଛି। ତାଙ୍କୁ ୬୫ ବର୍ଷ ହୋଇଥିଲା। ସେ କରୋନାରେ ଆକ୍ରାନ୍ତ ହୋଇ ଚିକିତ୍ସାଧୀନ ଥିଲେ। ତାଙ୍କ ଘର ବାରିପଦାକୁ ଯାଇଥିଲା ବେଳେ ସେ କରୋନାରେ ଆକ୍ରାନ୍ତ ହୋଇଥିଲେ। ସେଠାରେ ତାଙ୍କ ସ୍ୱାସ୍ଥ୍ୟାବସ୍ଥାରେ ଉନ୍ନତି ନଆସିବାରୁ ଭୁବନେଶ୍ୱରର ଏକ ଘରୋଇ ହାସପାତାଳକୁ ଚିକିତ୍ସା ଲାଗି ଆସିଥିଲେ। ଭେଣ୍ଟିଲେଟରରେ ଥିବା ନନ୍ଦକିଶୋର ସୋମବାର ରାତି ୩ଟାରେ ଶେଷ ନିଃଶ୍ବାସ ତ୍ୟାଗ କରିଥିଲେ। ଏକମାତ୍ର ପୁତ୍ର ଅମିତ, ପତ୍ନୀ ସଞ୍ଜୁ ମହାନ୍ତି ଓ ଝିଅ ଏଲିନାଙ୍କୁ ଛାଡ଼ି ନନ୍ଦକିଶୋର ଚାଲି ଯାଇଛନ୍ତି। ତାଙ୍କ ମୃତ୍ୟୁରେ ଓଡ଼ିଶା ଫୁଟବଲ ମହଲରେ ଶୋକର ଛାୟା ଖେଳିଯାଇଛି।
ନନ୍ଦକିଶୋରଙ୍କ ମୃତ୍ୟୁରେ ବହୁ କ୍ରୀଡ଼ାବିତ୍ ଓ କ୍ରୀଡ଼ାନୁରାଗୀ ଶୋକ ପ୍ରକାଶ କରିଛନ୍ତି। ଓଡ଼ିଶା ଫୁଟବଲ୍ରେ ଟୁଟୁ ସାର୍ଙ୍କ ନାମରେ ଜଣାଶୁଣା ନନ୍ଦକିଶୋର ଓଡ଼ିଶା ଫୁଟ୍ବଲର ଉନ୍ନତି ପାଇଁ ଉଲ୍ଲେଖନୀୟ କାମ କରିଥିଲେ। ନନ୍ଦକିଶୋର ବିଭିନ୍ନ ଜାତୀୟ ଫୁଟ୍ବଲ ଟୁର୍ଣ୍ଣାମେଣ୍ଟରେ ଓଡ଼ିଶାର ପ୍ରତିନିଧିତ୍ବ କରିବା ସହ ରାଜ୍ୟର ନାମୀ ଫୁଟ୍ବଲ କ୍ଲବ୍ ପାଇଁ ଖେଳିଥିଲେ। ଓଡ଼ିଶାରେ ମହିଳା ଫୁଟ୍ବଲର ମୂଳଦୁଆ ପଡ଼ିବା ପରଠାରୁ ସେ ଏହା ସହ ଜଡ଼ିତ ଥିଲେ। ରାଜ୍ୟ ମହିଳା ଫୁଟବଲ ଦଳର ପ୍ରଥମ ଅଧିନାୟିକା ଗୀତାଞ୍ଜଳି ସାମନ୍ତରାୟ, ଭାରତୀୟ ମହିଳା ଫୁଟ୍ବଲ ଦଳର ପୂର୍ବତନ ଅଧିନାୟିକା ତଥା ରାଜ୍ୟର ପ୍ରଥମ ଅନ୍ତର୍ଜାତୀୟ ମହିଳା ଫୁଟବଲ ଖେଳାଳି ଶ୍ରଦ୍ଧାଞ୍ଜଳି ସାମନ୍ତରାୟଙ୍କୁ ଏହି ଶିଖରରେ ପହଞ୍ଚାଇବାରେ ନନ୍ଦକିଶୋରଙ୍କ ଗୁରୁତ୍ବପୂର୍ଣ୍ଣ ଭୂମିକା ଥିଲା। ଭାରତୀୟ ଦଳର ପୂର୍ବତନ ଗୋଲ୍ରକ୍ଷକ ରଞ୍ଜିତା ମହାନ୍ତି, ମମତା ସାମନ୍ତ, ସରିତା ଜୟନ୍ତୀ ବେହେରା, ସୁଦୀପ୍ତା ଦାଶଙ୍କ ପରି ଆନ୍ତର୍ଜାତିକ ଖେଳାଳିଙ୍କୁ ଗଢ଼ିବାରେ ନନ୍ଦକିଶୋରଙ୍କ ବେଶ୍ ଅବଦାନ ଥିଲା। ସେ ଏଜି ଓଡ଼ିଶାରେ କାର୍ଯ୍ୟ କରୁଥିଲେ। ତେବେ ମହିଳା ଫୁଟବଲ ଖେଳାଳିଙ୍କୁ ପ୍ରଶିକ୍ଷଣ ତାଙ୍କ ନିଶା ଥିଲା।
