ଶ୍ରୀନଗର: ଦକ୍ଷିଣ କାଶ୍ମୀର ପୁଲୱାମା ଜିଲାର ତିକ୍କେନ ଗ୍ରାମରେ ଶନିବାର ସକାଳେ ଆତଙ୍କବାଦୀ ଓ ସୁରକ୍ଷାକର୍ମୀଙ୍କ ମଧ୍ୟରେ ଗୁଳିବିନିମୟ ହୋଇଛି । ସୁରକ୍ଷାକର୍ମୀଙ୍କ ଗୁଳିରେ ଦୁଇ ଆତଙ୍କବାଦୀ ନିହତ ହୋଇଛନ୍ତି । ମୃତ ଆତଙ୍କବାଦୀଙ୍କ ପରିଚୟ ମିଳିଥିବା ବେଳେ ସେମାନେ ପୁଲୱାମା ଜିଲାର ବୋଲି ଜଣାପଡିଛି ।
ପୁଲିସଙ୍କ ସୂଚନା ଅନୁଯାୟୀ, ମୃତ ଆତଙ୍କବାଦୀ ଦୁଇ ଜଣ ହେଲେ ଲିୟାକତ ଅହମ୍ମଦ ଏବଂ ବାଜିଦ । ଆତଙ୍କବାଦୀ ଲୁଚି ରହିଥିବା ଖବର ପାଇଁ ସିଆରପିଏଫ, ଏସଓଜି ଏବଂ ରାଷ୍ଟ୍ରୀୟ ରାଇଫଲ୍ସ ମିଳିତ ଭାବରେ ସର୍ଚ୍ଚ ଅପରେସନ ଆରମ୍ଭ କରିଥିଲେ । ସର୍ଚ୍ଚ ଅପରେସନ ବେଳେ ଦୁଇ ଆତଙ୍କବାଦୀଙ୍କୁ ସୁରକ୍ଷାକର୍ମୀ ଘେରଉ କରି ନେଇଥିଲେ । ଏହି ସମୟରେ ଆତଙ୍କବାଦୀଙ୍କ ତରଫରୁ ଗୁଳିବର୍ଷଣ ଆରମ୍ଭ ହୋଇଥିଲା । ସୁରକ୍ଷାକର୍ମୀଙ୍କ ପାଲଟା ଜବାବରେ ଦୁଇ ଆତଙ୍କୀବାଦୀ ପ୍ରାଣ ହରାଇଥିଲେ । ମୃତ ଆତଙ୍କବାଦୀଙ୍କ ମୃତଦେହ ଜବତ ହୋଇଛି । ଏହା ସହ ସେମାନଙ୍କ ନିକଟରୁ ଇନସାସ ରାଇଫଲ, ଏକେ ୭.୬୨ ମିମୀ ଅସାଲ୍ଟ ରାଇଫଲ ଏବଂ ଗୁଳି ଜବତ ହୋଇଛି । ମୃତ ଆତଙ୍କବାଦୀ କେଉଁ ସଙ୍ଗଠନର ତାହା ଏଯାବତ୍ ସ୍ପଷ୍ଟ ହୋଇନାହିଁ ।