ମୁମ୍ବଇ: ନାଗପୁରର ମାଜିଷ୍ଟ୍ରେଟସ୍ତରୀୟ ଅଦାଲତ ୭ ବର୍ଷ ପୂର୍ବେ ଏକ ଶିୁଶୁକୁ କୁକୁର କାମୁଡ଼ିବା ମାମଲାର ଶୁଣାଣି କରି କୁକୁରର ମାଲିକାଣୀଙ୍କୁ ୬ ମାସ ଜେଲ ଦଣ୍ଡ ଦେଇଛନ୍ତି। ଅପର ପକ୍ଷରେ ବୃତ୍ତିରେ ଡାକ୍ତର ଥିବା ମାଲିକାଣୀ କୁକୁରଟି ତାଙ୍କର ନୁହେଁ ବୋଲି ଦାବୀ କରିଛନ୍ତି। କିନ୍ତୁ ଅଭିଯୋଗକାରୀ ସାକ୍ଷୀ ସହ ଏହା ପ୍ରମାଣ କରିଛନ୍ତି ଯେ, ଡାକ୍ତର ଜଣକ ହିଁ କୁକୁରର ମାଲିକାଣୀ।
ମାଜିଷ୍ଟ୍ରେଟ୍ ଅଦାଲତରେ ଅଭିଯୋଗକାରୀ କହିଛନ୍ତି ଯେ, ୩୦ ସେପ୍ଟେମ୍ବର ୨୦୧୪ରେ ଏକ ମାମଲା ରୁଜୁ କରାଯାଇଥିଲା। ଯେଉଁଥିରେ ଜଣ ମହିଳା ଅଭିଯୋଗ କରିଥିଲେ ଯେ, ସେପ୍ଟେମ୍ବର ୨୯ ତାରିଖରେ ତାଙ୍କ ୯ ବର୍ଷିୟ ପୁଅ ତା’ର ସାଙ୍ଗ ସହ ମିଶି କୁକୁରକୁ ରୁଟି ଦେବା ପାଇଁ ଘର ବାହାରକୁ ଯାଇଥିଲା। ଏହାପରେ ହଠାତ୍ ମହିଳା ଜଣକ ତାଙ୍କ ପୁଅର ଚିତ୍କାର ଶୁଣିଥିଲେ। ମହିଳା ବାହାରକୁ ଆସି ଦେଖିଥିଲେ ଯେ ୨ଟି କୁକୁର ତାଙ୍କ ପୁଅକୁ କାମୁଡ଼ି ଦେଇଥିଲେ। ଏହା ଦେଖି ତାଙ୍କ ମୁଣ୍ଡ ବୁଲାଇ ଦେଇଥିଲା। ତାଙ୍କ ଝିଅ ଏବଂ ଜଣେ ପଡ଼ୋଶୀ ଶିଶୁଟିକୁ ଡାକ୍ତରଖାନା ନେଇଥିଲେ। ଏହାପରେ ନନ୍ଦନବନ ପୁଲିସ ଷ୍ଟେସନରେ ମହିଳା ଅଭିଯୋଗ କରିଥିଲେ। ପରେ ଏହି ମାମଲା ଅଦାଲତରେ ପହଞ୍ଚିଥିଲା।
ଉଭୟପକ୍ଷର ତର୍କ ବିତର୍କ ପରେ କୁକୁରଟି ଉକ୍ତ ମହିଳାଙ୍କର ବୋଲି ପ୍ରମାଣ ହୋଇଥିଲା। ଏହାପରେ ଅଭିଯୁକ୍ତଙ୍କ ବିରୋଧରେ ଧାରା ୨୮୯(ପଶୁମାନଙ୍କ କ୍ଷେତ୍ରରେ ଦାୟିତ୍ବହୀନ ମନୋଭାବ) ଓ ୩୩୮(ଅନ୍ୟର ବ୍ୟକ୍ତିଗତ ସୁରକ୍ଷାକୁ କ୍ଷତି) ଆଧାରରେ ଦୋଷୀ ସାବ୍ୟସ୍ତ କରି ଅଦାଲତ ମହିଳା ଡାକ୍ତରଙ୍କୁ ୬ ମାସ ଜେଲ ଦଣ୍ଡାଦେଶ ଶୁଣାଇଥିଲେ।
