ନବରଙ୍ଗପୁର: ନବରଙ୍ଗପୁର ଜିଲା ପାପଡାହାଣ୍ଡି ବ୍ଲକ ମାଝୀଗୁଡା ପଂଚାୟତର ମୁଣ୍ଡାଗୁଡ଼ା ଗ୍ରାମରେ ଦେଖିବାକୁ ମିଳିଛି ଏକ ଅଭାବନୀୟ ଘଟଣା। ରାସ୍ତାର ଅବସ୍ଥା ଶୋଚନୀୟ ଥିବାରୁ ୨କିମି ପର୍ଯ୍ୟନ୍ତ ଗୁରୁତର ରୋଗୀଙ୍କୁ ଗାଁଲୋକଙ୍କ ସହାୟତାରେ ଷ୍ଟେଚରରେ ବୋହି ନେବା ଘଟଣା ଏବେ ସୋସିଆଲ ମେଡ଼ିଆରେ ଭାଇରଲ ହେବାରେ ଲାଗିଥିବା ବେଳେ ଚର୍ଚ୍ଚାର ବିଷୟ ବସ୍ତୁ ପାଲଟିଛି।
ଗତ କିଛିଦିନ ତଳେ ପାପଡାହାଣ୍ଡି ଏବଂ ଉମରକୋଟ ଅଂଚଳରେ ଏପରି ଷ୍ଟ୍ରେଚର ଓ ଖଟିଆରେ ଗର୍ଭବତୀଙ୍କୁ ଆଣୁଥିବା ନେଇ ବିଭିନ୍ନ ଗଣମାଧ୍ୟମରେ ଚର୍ଚାର ବିଷୟ ହଇଥିବା ବେଳେ ଆଜି ପାପଡାହାଣ୍ଡି ବ୍ଲକର ମାଝୀଗୁଡା ଅଞ୍ଚଳରେ ଏପରି ଦୃଶ୍ୟ ଦେଖିବାକୁ ମିଳିଛି ।
ସୂଚନା ଅନୁସାରେ, ପାପଡାହାଣ୍ଡି ବ୍ଲକ ମାଝୀଗୁଡା ପଂଚାୟତ ଅନ୍ତର୍ଗତ ମୁଣ୍ଡାଗୁଡା ଗାଁକୁ ପକ୍କାରାସ୍ତା ନାହିଁ । ବର୍ଷା ହେବା ଯୋଗୁଁ ମାଟି ରାସ୍ତା କାଦୁଅ ହୋଇ ପୁରା ଶୋଚନୀୟ ଅବସ୍ଥାରେ ପଡିରହିଛି। ଆଜି ମୁଣ୍ଡାଗୁଡା ଗାଁର ରଇବାରି ଜାନୀ ହଟାତ ପାରାଲିସିସ ହେବାରୁ ୧୦୮ ଆମ୍ବୁଲାନ୍ସକୁ ଖବର ଦେଇଥିଲେ। ହେଲେ ରାସ୍ତା ଖରାପ ଥିବାରୁ ଗାଁକୁ ଆମ୍ବୁଲାନ୍ସ ଯାଇପାରି ନ ଥିଲା। ପରେ ଗାଁଲୋକେ ଏକ ଷ୍ଟ୍ରେଚରରେ ପ୍ରାୟ ୨କିମି ବୋହି ଅମ୍ଭୁଲାନ୍ସ ନିକଟକୁ ଆଣିଥିଲେ। ସ୍ୱାଧୀନତାର ୭୦ବର୍ଷ ବିତିଯାଇଥିଲେ ମଧ୍ୟ ମୁଣ୍ଡାଗୁଡା ଗ୍ରାମବାସୀ ପକ୍କା ରାସ୍ତା ମଧ୍ୟ ଦେଖିପାରିଲେ ନାହିଁ ଏଥି ପ୍ରତି ପ୍ରଶାସନ ଦୃଷ୍ଟି ଦିଅନ୍ତୁ ବୋଲି ଗାଁ ଲୋକ ଦାବି କରିଛନ୍ତି ।
