ତହସିଲ କାର୍ଯ୍ୟାଳୟ କର୍ମଚାରୀଙ୍କ ଭୁଲ ତଥ୍ୟ ଯୋଗୁଁ ତୃତୀୟ ବ୍ୟକ୍ତି ଏବଂ ଦଲାଲ ହେଲେ ମାଲାମାଲ

 ସ୍ବର୍ଗତ ସମନାଥ ଭତରାଙ୍କ ୫ ଏକର ୧୨ ସେଣ୍ଟ ଜମି ମଧ୍ୟରୁ ୭୪ ସେଣ୍ଟ ଜାଗାରେ ପୂର୍ତ୍ତ ବିଭାଗର ତରଫରୁ  ନବରଙ୍ଗପୁର, ରାଜୋଡା ପକ୍କା ରାସ୍ତା ନିର୍ମାଣ ହେବା ଦ୍ୱାରା ଜମି ମାଲିକଙ୍କୁ ୭୪ ସେଣ୍ଟ ଜମି ବାବଦକୁ ୨ କୋଟି ୩୫ ଲକ୍ଷ କ୍ଷତିପୂରଣ ଟଙ୍କା ଡମୁ ଭତରାର ଆକାଉଣ୍ଟକୁ ଯିବା ପରେ ଘଟଣା ପ୍ରଘଟ ହୋଇଥିଲା। ସମନାଥଙ୍କ ପ୍ରକୃତ ଉତ୍ତରାଧିକାରୀ ମାନେ ତାଙ୍କ ଜମିକୁ ଜାଲିଆତି କରି ଡମୁ ଭତରା ନିଜ ନାରେ କରାଇ ନେଇଥିବା ଜାଣିପାରିଥିଲେ । ଏହାପରେ ସମ୍ପୃକ୍ତ ପରିବାର ପକ୍ଷରୁ ନବରଙ୍ଗପୁର ଥାନାରେ ଏତଲା ଦେବା ସହ ନବରଙ୍ଗପୁର ତହସିଲଦାର ଓ ଜିଲ୍ଲାପାଳଙ୍କ ନିକଟରେ ଲିଖିତ ଅଭିଯୋଗ କରିଥିଲେ ପରିବାର ଲୋକେ । ଏହି ଅଭିଯୋଗକୁ ଭିତ୍ତି କରି ନବରଙ୍ଗପୁର ଥାନା ଅଧିକାରୀ ଡମୁର ବ୍ୟାଙ୍କ ଆକାଉଣ୍ଟକୁ ସିଜ କରିବା ପାଇଁ ସମ୍ପୃକ୍ତ ବ୍ୟାଙ୍କକୁ ଲେଖି ଜଣାଇଥିଲେ, ଏବଂ ସରଜମିନ ତଦନ୍ତ କରି ସମନାଥଙ୍କ ପ୍ରକୃତ ଉତ୍ତରାଧିକାରୀ କେଉଁମାନେ ଅଛନ୍ତି ରିପୋର୍ଟ ପ୍ରଦାନ କରିବାକୁ ନବରଙ୍ଗପୁର ତହସିଲକୁ ଲିଖିତ ଭାବେ ମାଗିଥିଲେ । ନବରଙ୍ଗପୁର ଥାନା ଅଧିକାରୀଙ୍କ ଚିଠି ଉପରେ ପ୍ରଥମେ ବର୍ତ୍ତମାନର ରାଜସ୍ୱ ନିରୀକ୍ଷକ ପୁରା ଠିକ ତଦନ୍ତ ରିପୋର୍ଟ ପ୍ରଦାନ କରିଥିଲେ କିନ୍ତୁ କୌଣସି କାରଣ ବଶତଃ ରାଜସ୍ୱ ନିରୀକ୍ଷକଙ୍କ ରିପୋର୍ଟକୁ ଅଗ୍ରାହ୍ୟ କରି ନବରଙ୍ଗପୁର ତହସିଲ ସୁପ୍ରଭାଇଜର  ନିଜେ ସରଜମିନ ତଦନ୍ତ ନକରି, ୨୦୦୬ ମସିହାର ରିପୋର୍ଟକୁ ନକଲ କରିବା ସହ ନବରଙ୍ଗପୁର ସହରରେ ରହୁନଥିବା ଲୋକଙ୍କୁ ସାକ୍ଷୀ ରଖି ସେମାନଙ୍କ ଦସ୍ତଖତ କରାଇ ଆଉ ଗୋଟେ ରିପୋର୍ଟ ପ୍ରସ୍ତୁତ କରି ଦେଇଥିଲେ । ଏହି ରିପୋର୍ଟରେ ମଧ୍ୟ ସମନାଥଙ୍କ ୩ ପିଢ଼ି ନଥିବା ଦର୍ଶାଯାଇଛି । ସରକାରୀ ବାବୁ ଓ ଦଲାଲ ମାନଙ୍କ ମଧୁ ଚନ୍ଦ୍ରିକା କାରଣରୁ ଏହିଭଳି ବାରମ୍ବାର ଭୁଲ ରିପୋର୍ଟ ପ୍ରଦାନ କରାଯାଉଛି ବୋଲି ପରିବାର ପକ୍ଷରୁ ଅଭିଯୋଗ ହେଉଛି । ଏପଟେ ଏହି ଘଟଣା ପରେ ନବରଙ୍ଗପୁର ତହସିଲଦାର ରବୀନ୍ଦ୍ର ରାଉତ, ଅତିରିକ୍ତ ତହସିଲଦାରଙ୍କୁ ତଦନ୍ତ ପାଇଁ ନିର୍ଦେଶ ଦେଇଥିବା କହିଛନ୍ତି।