ବେଙ୍ଗାଲୁରୁ: କର୍ଣ୍ଣାଟକର ବେଙ୍ଗାଲୁରୁରେ ମଙ୍ଗଳବାର ରାତିରୁ ବୁଧବାର ଭୋର ପର୍ଯ୍ୟନ୍ତ ହିଂସା ଲାଗିରହିଥିଲା। ବଡ଼ ସଂଖ୍ୟାରେ ଉତ୍ତ୍ୟକ୍ତ ଲୋକେ ଜଣେ କଂଗ୍ରେସ ବିଧାୟକଙ୍କ ଘର ଉପରେ ଆକ୍ରମଣ କରିଥିଲେ। ଏହା ସହିତ ଡିଜେ ହାଲି ଏବଂ କେଜି ହାଲି ଥାନା ଉପରେ ବି ଆକ୍ରମଣ କରିଥିଲେ। ସହରର କିଛି ଅଂଶରେ ଏହି ହିଂସା ରାତି ତମାମ୍ ଜାରି ରହିଥିଲା। ପ୍ରଫେଟ ମହମ୍ମଦଙ୍କ ସମ୍ପର୍କରେ ଫେସବୁକରେ କିଛି ଆପତ୍ତିଜନକ ପୋଷ୍ଟ କରାଯିବାକୁ ନେଇ ଏହି ଘଟଣାର ସୂତ୍ରପାତ ହୋଇଥିଲା। ପୁଲକେଶିନଗର କଂଗ୍ରେସ ବିଧାୟକ ଶ୍ରୀନିବାସ ମୂର୍ତ୍ତିଙ୍କ ଭଣଜା ଏହି ପୋଷ୍ଟ କରିଥିଲେ। ତେବେ ଏହି ହିଂସା ସମୟରେ କିଛି ମୁସଲମାନ ଯୁବକ ଏକ ମନ୍ଦିରର ସୁରକ୍ଷା ଢାଲ ହୋଇ ଛିଡ଼ା ହୋଇଥିଲେ। ମନ୍ଦିର ବାହାରେ ହିଂସା ଏବଂ ଭଙ୍ଗାରୁଜା ଚାଲିଥିବାବେଳେ ଏହି ମୁଲସମାନ ଯୁବକମାନେ ମାନବ ଶୃଙ୍ଖଳ କରି ମନ୍ଦିର ଚାରିପଟେ ଛିଡ଼ା ହୋଇଥିଲେ, ଯାହା ଏକତାର ବାର୍ତ୍ତା ଦେଇଛି। ଏହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି। ଖବର ସରବରାହ ସଂସ୍ଥା ଏଏନଆଇ ସୂତ୍ରରୁ ଏହି ଭିଡିଓ ଜାରି କରାଯାଇଛି।
#WATCH Karnataka: A group of Muslim youth gathered and formed a human chain around a temple in DJ Halli police station limits of Bengaluru city late last night, to protect it from arsonists after violence erupted in the area. (Video source: DJ Halli local) pic.twitter.com/dKIhMjQh96
— ANI (@ANI) August 12, 2020
ସୂଚନାଯୋଗ୍ୟ, ମଙ୍ଗଳବାର ରାତିରେ ଘଟିଥିବା ହିଂସାରେ ୩ ଜଣଙ୍କର ମୃତ୍ୟୁ ଘଟିଛି। ହିଂସାକୁ ନିୟନ୍ତ୍ରଣ କରିବା ଲାଗି ପୁଲିସ ଗୁଳି ଚଳାଇବାରୁ ଏମାନଙ୍କ ମୃତ୍ୟୁ ଘଟିଛି। ହିଂସାରେ ୫୦ରୁ ଅଧିକ ପୁଲିସ ଏବଂ ଜନସାଧାରଣ ଆହତ ହୋଇଛନ୍ତି। ବୁଧବାର ସୁଦ୍ଧା ୧୧୦ ଜଣଙ୍କୁ ଗିରଫ କରାଯାଇଥିବା ବେଙ୍ଗାଲୁରୁ ପୁଲିସ କମିଶନର କମଲ ପନ୍ତ କହିଛନ୍ତି। ଏହା ସହିତ ଆପତ୍ତିଜନକ ପୋଷ୍ଟ କରିଥିବା କଂଗ୍ରେସ ବିଧାୟକଙ୍କ ଭଣଜା ନବୀନ ମୂର୍ତ୍ତିଙ୍କୁ ବି ଗିରଫ କରାଯାଇଛି।
