ଗୁରୁଡିଝାଟିଆ: ସଂଘବଦ୍ଧ ଆକ୍ରମଣରେ ବାବୁଲା ନାଏକଙ୍କ ମୃତ୍ୟୁ ଘଟଣାର ମୁଖ୍ୟ ଅଭିଯୁକ୍ତ ହୃଦାନନ୍ଦ ନାଏକକୁ ଖୁଣ୍ଟୁଣୀ ପୁଲିସ ଗିରଫ କରିଛି । ଅନ୍ୟ ଅଭିଯୁକ୍ତକୁ ଖୁବଶୀଘ୍ର ଗିରଫ କରାଯିବ ବୋଲି ତଦନ୍ତକାରୀ ଅଧିକାରୀ ବିକାଶ ସେଠୀ ସୂଚନା ଦେଇଛନ୍ତି ।
ଖୁଣ୍ଟୁଣୀ ଥାନା ଅନ୍ତର୍ଗତ ରାଧାକୃଷ୍ଣପୁର ପଞ୍ଚାୟତ ଖଣ୍ଡୁଆଳୀ ଗ୍ରାମର ମୁଖ୍ୟ ଅଭିଯୁକ୍ତ ହୃଦାନନ୍ଦର ପୁଅ ନରେଶ ତା’ର ସ୍ତ୍ରୀକୁ ମାଡ଼ପିଟ କରୁଥିଲା। ମାଡ ଭୟରେ ସ୍ତ୍ରୀ ଗାଁ ଦାଣ୍ଡକୁ ଦୌଡି ଆସିଥିଲେ । ସେଠାରେ ବସିଥିବା ବାବୁଲା ଓ ଗାଁର ଅନ୍ୟଜଣଙ୍କ ଶରଣାପନ୍ନ ହୋଇଥିଲା ନରେଶର ସ୍ତ୍ରୀ। ନରେଶ କ’ଣ ପାଇଁ ମୋର ସ୍ତ୍ରୀକୁ ସୁରକ୍ଷା ଦେଉଛ ବୋଲି କହି ବାବୁଲାକୁ ଗାଳିଗୁଲଜ କରିବା ସହ ନିଜ ବାପା ହୃଦାନନ୍ଦକୁ ଡାକିଥିଲା । ଉଭୟ ନରେଶ ଓ ତା’ର ବାପା ହୃଦାନନ୍ଦ ମିଶି ବାବୁଲାକୁ ବାଉଁଶରେ ନିସ୍ତୁକ ମାଡ଼ ମାରିଥିଲେ। ଫଳରେ ବାବୁଲା ଗୁରୁତର ଆହତ ହୋଇଥିଲେ। ତାଙ୍କୁ ଚିକିତ୍ସା ପାଇଁ ପ୍ରଥମେ ଆଠଗଡ ଉପଖଣ୍ଡ ଚିକିତ୍ସାଳୟକୁ ନିଆଯାଇଥିଲା । ସେଠାରେ ଅବସ୍ଥା ସଙ୍କଟାପନ୍ନ ହେବାରୁ କଟକ ବଡ ଡାକ୍ତରଖାନାକୁ ନିଆଯାଇଥିଲା । କିନ୍ତୁ ଚିକିତ୍ସାଧୀନ ଅବସ୍ଥାରେ ବାବୁଲାଙ୍କ ମୃତ୍ୟୁ ଘଟିଥିଲା। ବାବୁଲାଙ୍କ ସ୍ତ୍ରୀ ସୁମତୀ ନାଏକଙ୍କ ଲିଖିତ ଅଭିଯୋଗ ପରେ ପୁଲିସ ହତ୍ୟା ମାମଲା ରୁଜୁ କରିଛି। ଚୌଦ୍ୱାର ଏସଡିପିଓ ଉମାକାନ୍ତ ନାୟକଙ୍କ ପ୍ରତ୍ୟକ୍ଷ ତତ୍ୱାବଧାନରେ ତଦନ୍ତକାରୀ ଅଧିକାରୀ ମୁଖ୍ୟ ଅଭିଯୁକ୍ତ ହୃଦାନନ୍ଦକୁ ଗିରଫ କରିଛନ୍ତି। ଅନ୍ୟତମ ଅଭିଯୁକ୍ତ ନରେଶ ଫେରାର ରହିଛି। ଖୁବଶୀଘ୍ର ତାକୁ ଗିରଫ କରାଯିବ ବୋଲି ପୁଲିସ କହିଛି।
