ଧର୍ମଗଡ/ଗୋଲାମୁଣ୍ଡା : ସ୍ତ୍ରୀକୁ ତଣ୍ଟି ଚିପି ହତ୍ୟା କରିଥିବା ଅଭିଯୋଗରେ ଗୋଲାମୁଣ୍ଡା ପୁଲିସ ସ୍ବାମୀକୁ ଅଟକ ରଖିଛି। ଅଟକ ବ୍ୟକ୍ତିଙ୍କ ନାଁ ବେଣୁଧର ହରପାଲ ବୋଲି ଜଣାପଡିଛି। ମାସକ ମଧ୍ୟରେ ଗୋଲାମୁଣ୍ଡା ଥାନା ଅଂଚଳରେ ଏହା ଦ୍ୱିତୀୟ ହତ୍ୟା କାଣ୍ଡ।
ମିଳିଥିବା ସୁଚନା ଅନୁଯାୟୀ, ଗୋଲାମୁଣ୍ଡା ଥାନା ଅନ୍ତର୍ଗତ ବୈଜଲପୁର ଗାଁର ବେଣୁଧର ହରପାଲ ସକାଳେ ପଡୋଶୀ ସମେତ ନିଜ ଶ୍ୱଶୁର ଘର ଲୋକଙ୍କୁ ଫୋନ କରି ତା’ ସ୍ତ୍ରୀ ଶୋଇବା ଅବସ୍ଥାରେ ମରିଯାଇଛି ବୋଲି ଖବର ଦେଇଥିଲା। ଶ୍ୱଶୁର ଘର ଲୋକ ଆସି ଦେଖିଲାବେଳକୁ ଯୁବତୀଙ୍କ ବେକ ଓ ଦେହରେ ବିଭିନ୍ନ କ୍ଷତ ଦେଖିବାକୁ ପାଇଥିଲେ। ମନରେ ସଂଦେହ ହେବାରୁ ଶ୍ୱଶୁର ଘର ଲୋକେ ଗୋଲାମୁଣ୍ଡା ଥାନାରେ ଏତଲା ଦେଇଥିଲେ। ଏତଲା ପରେ ଧର୍ମଗଡ ଏସଡିପିଓ ନାରାୟଣ ନାଏକ, ଗୋଲାମୁଣ୍ଡା ଆଇଆଇସି ଯୁଗଳ ଶବର ସାଇଣ୍ଟିଫିକ ଟିମ୍ ସହ ଘଟଣାସ୍ଥଳ ପରିଦର୍ଶନ କରି ତଦନ୍ତ ଆରମ୍ଭ କରିଥିଲେ। ତେବେ ପ୍ରାଥମିକ ତଦନ୍ତରୁ ଏହା ଏକ ହତ୍ୟାକାଣ୍ଡ ବୋଲି ପୁଲିସ ସଂଦେହ କରି ମୃତକଙ୍କ ସ୍ୱାମୀ ବେଣୁଧର ହରପାଲଙ୍କୁ ଅଟକ ରଖିଛି।
