ଗୋପାଳପୁର : ଗୋପାଳପୁର ପର୍ଯ୍ୟଟନସ୍ଥଳକୁ ଅଧିକ ଆକର୍ଷଣୀୟ କରିବା ପାଇଁ କୋଟି କୋଟି ଟଙ୍କା ବିନିଯୋଗ ସତ୍ତ୍ୱେ ନିର୍ମିତ ହେଉଥିବା କାର୍ଯ୍ୟ ଗୁଡ଼ିକର ଉଚିତ ରକ୍ଷଣାବେକ୍ଷଣ ଅଭାବରୁ ଲକ୍ଷାଧିକ ଟଙ୍କା ପାଣିରେ ପଡୁଥିବା ଅଭିଯୋଗ ହେଉଛି । ୨୦୧୬ ରେ ‘ସ୍ବଦେଶ ଦର୍ଶନ’ ଯୋଜନାରେ ଗୋପାଳପୁରକୁ ପ୍ରାୟ ୬ କୋଟି ଟଙ୍କାର ପାଣ୍ଠି କେନ୍ଦ୍ର ସରକାରଙ୍କ ପକ୍ଷରୁ ପ୍ରଦାନ କରାଯାଇଥିଲା । ଉକ୍ତ ପାଣ୍ଠି ରାଜ୍ୟ ପର୍ଯଟନ ବିଭାଗକୁ ଆସିଥିବାବେଳେ ବ୍ରହ୍ମପୁର ଉନ୍ନୟନ କର୍ତ୍ତୃପକ୍ଷ ପକ୍ଷରୁ ଏହାକୁ ବିନିଯୋଗ ନିମନ୍ତେ ପ୍ରଦାନ କରାଯାଇଥିଲା ।
୨୦୨୦ ସୁଦ୍ଧା ବେଳାଭୂମିରେ ପର୍ଯ୍ୟଟକଙ୍କୁ ଆକୃଷ୍ଟ କରିବା ପାଇଁ ଅନେକ ଗୁଡ଼ିଏ ନିର୍ମାଣ କାର୍ଯ୍ୟ କରାଯାଇଥିଲା। ଏହା ସହିତ ଲକ୍ଷାଧିକ ଟଙ୍କା ବ୍ୟୟରେ ୧୦ ଟି ପ୍ଲାଇ ଓ ଲୁହାରେ ନିର୍ମିତ ଅସ୍ଥାୟୀ କାଫେ ଏବଂ ରେଷ୍ଟୁରାଣ୍ଟ ମଧ୍ୟ କିଣାଯାଇଥିଲା। ଏସବୁ ବେଳାଭୂମି ପରିସରରେ ସ୍ଥାପନ କରାଯାଇଥିଲା। କିନ୍ତୁ ଏହାକୁ ସ୍ଥାନୀୟ ବାସିନ୍ଦାଙ୍କ ପକ୍ଷରୁ ବିରୋଧ କରାଯିବାରୁ ପ୍ରଶାସନ ପକ୍ଷରୁ ଏଥି ମଧ୍ୟରୁ ୬ ଟି କ୍ୟାବିନକୁ ବିଜୁ ପଟ୍ଟନାୟକ ସାହସିକତା ପାର୍କ ପରିସରରେ ରଖାଯିବା ସହ ୨ ଟି କୁ ପାର୍କିଂ ସ୍ଥଳରେ ଏବଂ ଅନ୍ୟ ଦୁଇଟିକୁ ଇକୋ ରିଟ୍ରିଟ ସେଣ୍ଟର ପରିସରରେ ରଖାଯାଇଥିଲା।
ଇତି ମଧ୍ୟରେ ପାର୍କିଂ ଓ ଇକୋ ରିଟ୍ରିଟ ସେଣ୍ଟର ପରିସରରେ ରଖାଯାଇଥିବା କ୍ୟାବିନ ଗୁଡ଼ିକ ନଷ୍ଟ ହୋଇଯାଇଥିବାବେଳେ ପାର୍କ ପରିସରରେ ଥିବା କ୍ୟାବିନ ମଧ୍ୟରୁ ଗୋଟିଏ ଟିକଟ ବୁକିଂ କାଉଣ୍ଟର ଭାବେ ବ୍ୟବହୃତ ହେଉଥିବାବେଳେ ବାକି କୌଣସି କାମରେ ନଲାଗି ପଡ଼ି ରହିଥିବା ଦେଖିବାକୁ ମିଳିଛି । ଏଣୁ ପ୍ରଶାସନ ପକ୍ଷରୁ ତୁରନ୍ତ ନଷ୍ଟ ହେବାକୁ ବସୁଥିବା କ୍ୟାବିନ ଗୁଡ଼ିକର ମରାମତି କରି ତୁରନ୍ତ ଏହାକୁ ବ୍ୟବହାର କ୍ଷମ କରିବାକୁ ସାଧାରଣରେ ଦାବି ହେଉଛି ।
Comments are closed.