ମୋହନା: ଆଦିବାସୀ ଅଧ୍ୟୁଷିତ ଦୁର୍ଗମ ଅଞ୍ଚଳ ତଥା ଗ୍ରାମାଞ୍ଚଳର ବିକାଶ ପାଇଁ କେନ୍ଦ୍ର ସରକାର ପ୍ରଧାନମନ୍ତ୍ରୀ ସଡକ ଯୋଜନା ମାଧ୍ୟମରେ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି । ହେଲେ ରାଜ୍ୟରେ ଗ୍ରାମ୍ୟ ଉନ୍ନୟନ ବିଭାଗର ବିଭାଗୀୟ ଅଧିକାରୀ, ଯନ୍ତ୍ରୀ ଓ ଠିକାଦାରଙ୍କ ମଧୁଚନ୍ଦ୍ରିକା ଯୋଗୁଁ ନିମ୍ନମାନର ରାସ୍ତା ନିର୍ମାଣ ହେଉଛି । ଯାହାଫଳରେ ପାଞ୍ଚ ବର୍ଷ ନହେଉଣୁ ରାସ୍ତା ପାଲଟୁଛି ମରଣଜନ୍ତା । ରାସ୍ତାଟି କେଉଁଠି ଖାଲଖମା ହୋଇଥିବା ବେଳେ କେଉଁଠି ପିଚୁ ଉଠି ଗଲାଣି ତ କେଉଁଠି ରାସ୍ତା କଡ଼ ଧୋଇଗଲାଣି । ଆଉ ଏ ଦୃଶ୍ୟ ହେଉଛି ଗଜପତି ଜିଲ୍ଲା ମୋହନା ବ୍ଲକ୍ ଡମ୍ବଗୁଡା ପଞ୍ଚାୟତ ଠାରୁ ବାଡେଗୁଡା ପଞ୍ଚାୟତକୁ ସଂଯୋଗ କରୁଥିବା ପ୍ରାୟ ୬ କିମି ପ୍ରଧାନମନ୍ତ୍ରୀ ସଡ଼କର ଅବସ୍ଥା । ଏହି ରାସ୍ତାକୁ କିଛି ବର୍ଷ ପୂର୍ବେ ମୋହନା ଗ୍ରାମ୍ୟ ଉନ୍ନୟନ ବିଭାଗର ଯନ୍ତ୍ରୀମାନଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ନିର୍ମାଣ କରାଯାଇଥିଲା ।
ହେଲେ ବର୍ତ୍ତମାନ ଏହି ରାସ୍ତାର ଅବସ୍ଥା ଏମିତି ଯେ ରାସ୍ତା ସାରା ଖାଲଖମାରେ ଭର୍ତ୍ତି ହେବା ସହ ଆପଣାଛାଏଁ ପିଚୁ ଉଠିଗଲାଣି । ଅନେକ ସମୟରେ ଦୂର୍ଘଟଣା ଘଟି ଯାତୟାତ କରୁଥିବା ଲୋକେ ବିକାଶ ବଦଳରେ ବିନାଶ ଆଡ଼କୁ ଗତି କରୁଛନ୍ତି । ରାସ୍ତାଟି ହରଗୁଡା ଠାରୁ ଆରମ୍ଭ ହୋଇ ତୁଆଗଡା ଗାଁରେ ସମାପ୍ତ ହୋଇଥିଲେ ମଧ୍ୟ ରାସ୍ତା ଆରମ୍ଭରେ କି ଶେଷରେ ସୂଚନା ଫଳକ ନାହିଁ । ଠିକାଦାରଙ୍କ ମନମୁଖୀ କାମ ଯୋଗୁଁ ଏଭଳି ସମସ୍ୟା ସୃଷ୍ଟି ହୋଇଥିବା ଅଭିଯୋଗ କରିବା ସହ ରାସ୍ତାର ପୁନଃ ମରାମତି କରିବା ପାଇଁ ଦାବି କରିଛନ୍ତି ପୂର୍ବତନ ସରପଞ୍ଚ ରମେଶ ମଳିକ, ମୁନା ମାଝି, ସୁରେଶ ଗମାଙ୍ଗ, ପ୍ରଶାନ୍ତ ମଳିକ ଓ ଅଞ୍ଚଳବାସୀ ।
ଅପରପକ୍ଷେ ଏହି ରାସ୍ତା ନିର୍ମାଣ ବେଳେ ରାସ୍ତାରୁ ବିଦ୍ୟୁତ୍ ଖୁଣ୍ଟକୁ ମଧ୍ୟ ଅନ୍ୟତ୍ର ସ୍ଥାନାନ୍ତର କରାଯାଇନାହିଁ । ଶିମିଳି ଗାଁ ସ୍କୁଲ ନିକଟ ଏହି ରାସ୍ତା ମଝିରେ ଏବେବି ବିଦ୍ୟୁତ୍ ଖୁଣ୍ଟ ଛିଡ଼ା ହୋଇଛି । ଫଳରେ ଅନେକ ସମୟରେ ବଡ଼ଗାଡି ଯିବା ବେଳେ ଅନେକ ସମସ୍ୟା ସୃଷ୍ଟି ହେଉଛି । ସେପଟେ କାର୍ଯ୍ୟାଳୟ ପକ୍ଷରୁ ମିଳିଥିବା ସୂଚନା ଅନୁସାରେ ଏହି ରାସ୍ତାକୁ ୫ କୋଟି ୯୨ ଲକ୍ଷ ୮୨ ହଜାର ଟଙ୍କା ବ୍ୟୟ ଅଟକଳରେ ଗଜେନ୍ଦ୍ର ପଣ୍ଡା ନାମକ ଜଣେ ଠିକାଦାର ୧୨/୦୯/୨୦୧୭ରେ ଆରମ୍ଭ କରି ୩୧/୦୭/୨୦୧୯ରେ ଶେଷ କରିଥିବା ଜଣାପଡିଛି । ତେବେ ଏହି ରାସ୍ତା ନିର୍ମାଣ ବେଳେ ଏଠାକୁ କୌଣସି ବିଭାଗୀୟ ଅଧିକାରୀ ଆସିନଥିବାରୁ ଠିକାଦାର ନିଜ ମନମୁତାବକ ଏମିତି ନିମ୍ନମାନର ରାସ୍ତା ନିର୍ମାଣ କରିଥିବା କହିଛନ୍ତି ଅଞ୍ଚଳବାସୀ ।
