ଆଜିଠୁ ‘ମୋ ସରକାର’

ଭୁବନେଶ୍ୱର : ଗାନ୍ଧୀ ଜୟନ୍ତୀ ଅବସରରେ ବୁଧବାରଠାରୁ ‘ମୋ ସରକାର’ ଯୋଜନା ଆରମ୍ଭ ହେଉଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଯୋଜନାର ଶୁଭାରମ୍ଭ କରିବାର କାର୍ଯ୍ୟକ୍ରମ ରହିଛି। ଭୁବନେଶ୍ୱର ସ୍ଥିତ ସହିଦନଗର ଥାନା ଓ କ୍ୟାପିଟାଲ ହସ୍ପିଟାଲରୁ ଏହି ଯୋଜନାର ଶୁଭାରମ୍ଭ କରାଯିବ।
ସୂଚନାଯୋଗ୍ୟ, ‘ମୋ ସରକାର’ ଯୋଜନା ଲାଗୁ କରିବା ପାଇଁ ଗତ ୧ ମାସ ହେଲା ପ୍ରସ୍ତୁତି ଚାଲିଛି। ଏହି ଯୋଜନା ଅନୁସାରେ, ସରକାରୀ ସେବା ସମ୍ପର୍କରେ ଲୋକଙ୍କ ମତାମତ ନିଆଯିବ। ତେଣୁ ପ୍ରାଥମିକ ପର୍ଯ୍ୟାୟରେ ଥାନା ଓ ଡାକ୍ତରଖାନାକୁ ଏଥିରେ ସାମିଲ କରାଯାଇଛି। ମୁଖ୍ୟମନ୍ତ୍ରୀ ନିଜେ ସିଧାସଳଖ ଲୋକଙ୍କ ସହ ଫୋନ୍‌ରେ କଥା ହେବେ। ଥାନାକୁ ଗଲେ ସେଠାରେ କିଭଳି ବ୍ୟବହାର କରାଯାଉଛି, ଏହାସହିତ ତଦନ୍ତ ଓ କାର୍ଯ୍ୟାନୁଷ୍ଠାନ ସଂକ୍ରାନ୍ତରେ ସେ ଲୋକଙ୍କୁ ପଚାରି ବୁଝିବେ। ସେହିପରି ଡାକ୍ତରଖାନାରେ ଚିକିତ୍ସା ସେବାକୁ ନେଇ ରୋଗୀ ଓ ରୋଗୀଙ୍କ ସମ୍ପର୍କୀୟଙ୍କଠାରୁ ମତାମତ ନିଆଯିବ। ଲୋକେ ଭଲ ମତ ଦେଲେ ଅଧିକାରୀଙ୍କ ପ୍ରଶଂସା ସାଙ୍ଗକୁ ପଦୋନ୍ନତି ମଧ୍ୟ ହେବ। ଏହାସହିତ କର୍ତ୍ତବ୍ୟରେ ଅବହେଳା ଜଣାପଡ଼ିଲେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ପୂର୍ବରୁ ପୁଲିସ ଡିଜି ବି.କେ ଶର୍ମା ଥାନାକୁ ଆସୁଥିବା ଅଭିଯୋଗକାରୀଙ୍କ ସହ କଥା ହୋଇ ସେମାନଙ୍କ ମତ ନେଇଥିଲେ।