ନୂଆଦିଲ୍ଲୀ : କିଛିଦିନ ହେବ ଅକ୍ଷୟ କୁମାର ଚଳଚ୍ଚିତ୍ର ମାଧ୍ୟମରେ ଲୋକମାନଙ୍କ ମନରେ ଦେଶାତ୍ମକ ଭାବ ଜାଗ୍ରତ କରିବାକୁ ଉଦ୍ୟମ କରୁଛନ୍ତି ଓ ଏଥିରେ ବେଶ୍ ସଫଳ ହେଉଛନ୍ତି। ଟୟଲେଟ୍ ଏକ ପ୍ରେମ୍ କଥା, ରୁସ୍ତମ, ଗୋଲ୍ଡ ଭଳି ଚଳଚ୍ଚିତ୍ର ଏହାର ଜ୍ଵଳନ୍ତ ଉଦାହରଣ। ପୁନର୍ବାର ସେହି ଦେଶଭକ୍ତି ଭାବକୁ ଦର୍ଶାଇବା ପାଇଁ ଅକ୍ଷୟ ଏକ ଚଳଚ୍ଚିତ୍ର ସିନେ ପ୍ରେମୀଙ୍କୁ ଭେଟି ଦେବାକୁ ଯାଉଛନ୍ତି। ଚଳଚ୍ଚିତ୍ରର ନାଁ ‘ମିଶନ ମଙ୍ଗଲ୍’ ଯାହା ୨୦୧୯ର ସ୍ୱାଧୀନତା ଦିବସ ଅବସରରେ ମୁକ୍ତିଲାଭ କରିବ। ଟ୍ୱିଟର୍ ମାଧ୍ୟମରେ ଅକ୍ଷୟ ଏହି ସୂଚନା ଦେଇଛନ୍ତି। ସେ ଲେଖିଛନ୍ତି, “ଜଣେ ସାଧାରଣ ବ୍ୟକ୍ତିର ଅସାଧାରଣ ସ୍ୱପ୍ନ ଓ ଅସମ୍ଭବକୁ ସମ୍ଭବ କରି ଦେଖାଇବା ଉପରେ ଆଧାରିତ ଏକ କାହାଣୀ। ଏହି ଚଳଚ୍ଚିତ୍ର ୧୫ ଅଗଷ୍ଟ, ୨୦୧୯ରେ ମୁକ୍ତିଲାଭ କରିବ”।
ସୂଚନା ଅନୁସାରେ, ଏହି ଚଳଚ୍ଚିତ୍ରରେ ଶରମନ ଜୋଶୀ, କିର୍ତ୍ତୀ କୁହ୍ଲାରୀ, ତାପସୀ ପନ୍ନୁ, ବିଦ୍ୟା ବାଲନ, ସୋନାକ୍ଷୀ ସିହ୍ନା ଓ ନିତ୍ୟା ମେନନ ପ୍ରମୁଖଙ୍କୁ ଦେଖିବାକୁ ମିଳିବ। ଚଳଚ୍ଚିତ୍ରର ନିର୍ଦ୍ଦେଶନା ଭାର ଜଗନ ଶକ୍ତି ବହନ କରିଛନ୍ତି। ଏଥିସହିତ ଚଳଚ୍ଚିତ୍ରର ନିର୍ମାତା ଆର୍ ବାଲ୍କୀ ରହିଛନ୍ତି। ଚଳଚ୍ଚିତ୍ରରେ ଜଣେ ଭାରତୀୟର ମଙ୍ଗଳ ଗ୍ରହ ମିଶନର କାହାଣୀ ଦେଖିବାକୁ ମିଳିବ।
