ପାତ୍ରପୁର: ଗଞ୍ଜାମ ଜିଲ୍ଲା ପାତ୍ରପୁର ବ୍ଲକରେ ଦାଦନ ଶ୍ରମିକ ମୃତ୍ୟୁ ଘଟଣା ଅବିରତ ଲାଗି ରହିଛି। ଗତ ୭ ମାସ ମଧ୍ୟରେ ଏହି ବ୍ଲକର ଆଠ ଜଣ ଶ୍ରମିକଙ୍କ ଜୀବନ ଚାଲିଗଲାଣି। ଗତ ଶୁକ୍ରବାର ଏହି ବ୍ଲକ ଖରଣିପଡା ପଂଚାୟତ କୋଳିହଳା ଗ୍ରାମର ୫୦ ବର୍ଷୀୟ ବାବୁଲା ବାଡତ୍ୟାଙ୍କ ବେଙ୍ଗାଲୁରୁରେ ମୃତ୍ୟୁ ଘଟିଛି।
ବାବୁଲା ଗତ କିଛି ମାସ ଧରି ବେଙ୍ଗାଲୁରୁର ଦେଵନାଳୀ ଅଞ୍ଚଳରେ ଏକ ଘରୋଇ କମ୍ପାନୀରେ ଶ୍ରମିକ ଭାବେ କାର୍ଯ୍ୟ କରୁଥିଲେ। ଶୁକ୍ରବାର ଅପରାହ୍ନରେ କାମ କରୁଥିବାବେଳେ ଫେଭର ସ୍ଥାନାନ୍ତର ସମୟରେ ସେ ତଳେ ପଡି ଗୁରୁତର ଆହତ ହୋଇଥିଲେ। କମ୍ପାନୀ ପକ୍ଷରୁ ତୁରନ୍ତ ତାଙ୍କୁ ସ୍ଥାନୀୟ ହସ୍ପିଟାଲକୁ ନେଇ ଯାଇଥିଲା। କିନ୍ତୁ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ।
ବ୍ୟବଚ୍ଛେଦ ପରେ ରବିବାର ତାଙ୍କ ମୃତଦେହ ଗାଁକୁ ଫେରିବ ବୋଲି ସାଙ୍ଗମାନେ ଜଣାଇଛନ୍ତି। ବାବୁଲାଙ୍କ ପରିବାର ପାଇଁ ସରକାରୀ ସହାୟତା ଯୋଗାଇ ଦେବାକୁ ଦାବି ହୋଇଛି।
ଗତ ମାସରେ ମଧ୍ୟ ଏହି ବ୍ଲକର ବିଭିନ୍ନ ପଞ୍ଚାୟତରୁ ଗଦାଧର ଗୌଡ (ତିନିଘରିଆ), ଉଜ୍ଜଳ ପ୍ରଧାନ (ଭୈରପୁର), ବିଜୟ ଦଳାଇ (ରାଜପୁର), ତୁମ୍ବନାଥ ବେହେରା (ବାଦପୁର) ପ୍ରମୁଖଙ୍କ ମୃତ୍ୟୁ ଘଟିଥିଲା।
ସରକାର ମହାତ୍ମା ଗାନ୍ଧୀ ନରେଗା ଭଳି ଯୋଜନା ମାଧ୍ୟମରେ ଗ୍ରାମୀଣ ଜୀବନ ମାନକ ସୁଦୃଢ କରିବାକୁ ପଦକ୍ଷେପ ନେଇଥିଲେ ବି ଦଲାଲ ମାଧ୍ୟମରେ ଶ୍ରମିକମାନେ ନିୟମିତ ଭାବେ ରାଜ୍ୟ ବାହାରକୁ ଯାଉଛନ୍ତି। ସେଥିପାଇଁ ଆଞ୍ଚଳିକ ସ୍ତରରେ ସଂଗଠିତ ସଜାଗ ଅଭିଯାନ ଓ ଯୋଜନା ରୂପାୟନ ଦ୍ୱାରା ଦାଦନ ଚାଲାଣ ରୋକାଯାଇପାରେ ବୋଲି ସଚେତନ ମହଲରେ ମତ ପ୍ରକାଶ ପାଇଛି।
