କୋଚି: କେରଳର ଏର୍ନାକୁଲମସ୍ଥିତ କନ୍ଭେନ୍ସନ୍ ସେଣ୍ଟର ପ୍ରାର୍ଥନା ସଭାରେ ବୋମା ବିସ୍ଫୋରଣ ଘଟଣାରେ ଏକ ନୂଆ ମୋଡ଼ ସାମ୍ନାକୁ ଆସିଛି। ବିସ୍ଫୋରଣ ଘଟାଇଥିବା ଦାବୀ କରି ଜଣେ ବ୍ୟକ୍ତି କୋଡ଼ାକରା ଥାନାରେ ଆତ୍ମସମର୍ପଣ କରିଥିବା ସୂଚନା ମିଳିଛି।
କେରଳ ଏଡିଜିପି(ଆଇନ ଶୃଙ୍ଖଳା) ଏମଆର ଅଜିତ କୁମାର କହିଛନ୍ତି, ଜଣେ ବ୍ୟକ୍ତି କୋଡ଼ାକରା ଥାନାରେ ଆତ୍ମସମର୍ପଣ କରିଛି। ତା’ର ନାମ ଡୋମିନିକ ମାର୍ଟିନ। ଡୋମିନିକ ଏହି ବିସ୍ଫୋରଣ ଘଟାଇଥିବା ଦାବୀ କରିଛି। ସେ ସେହି ସଭାର ସମାନ ସମୁଦାୟର ବୋଲି ଜଣାପଡ଼ିଛି। ଆମେ ଏହାର ଯାଞ୍ଚ କରୁଛୁ। ଏଥିସହ ଘଟଣାର ପ୍ରତ୍ୟେକ ଦିଗରୁ ତଦନ୍ତ ଜାରି ରଖିଛୁ।
ସୂଚନାଯୋଗ୍ୟ, ରବିବାର ସକାଳେ କେରଳର ଏର୍ନାକୁଲମସ୍ଥିତ କଲାମସେରି ଅଞ୍ଚଳର ଏକ କନ୍ଭେନ୍ସନ୍ ସେଣ୍ଟରରେ ଯିହୋବାଙ୍କ ସାକ୍ଷୀଙ୍କ ପ୍ରାର୍ଥନା ସଭାରେ ଏକାଧିକ ବିସ୍ଫୋରଣରେ ଜଣଙ୍କର ମୃତ୍ୟୁ ଘଟିଥିବା ବେଳେ ଅନେକ ଲୋକ ଆହତ ହୋଇଥିଲେ। କଲାମାସେରି ସି.ଆଇ ଭିବିନ୍ ଦାସ କହିଥିଲେ ଯେ, ପ୍ରଥମ ବିସ୍ଫୋରଣ ସକାଳ ପ୍ରାୟ ୯ଟା ବେଳେ ହୋଇଥିଲା ଏବଂ ପରବର୍ତ୍ତୀ ଏକ ଘଣ୍ଟା ମଧ୍ୟରେ ଏକାଧିକ ବିସ୍ଫୋରଣ ହୋଇଥିଲା। ବିସ୍ଫୋରଣ ଘଟିବା ବେଳେ ୨ ହଜାରରୁ ଅଧିକ ଲୋକ ପ୍ରାର୍ଥନା ସଭାରେ ଯୋଗ ଦେଇଥିଲେ।
