ସମାଜ ଡିଜିଟାଲ ଡେସ୍କ: ଅନ୍ଲାଇନରେ ଗୋଟିଏ ଜିନିଷ ଅର୍ଡର କରିଥିବା ବେଳେ ଅନ୍ୟ ଏକ ଜିନିଷ ଘରକୁ ଆସିବାର ବହୁ ଉଦାହରଣ ରହିଛି। ଏପରି ଏକ ଘଟଣା ମୁମ୍ବଇରେ ଘଟିଛି। ମୁମ୍ବଇ ବିଦ୍ୟୁତ୍ ବିଭାଗରେ ଯନ୍ତ୍ରୀ ଭାବେ କାର୍ଯ୍ୟ କରୁଥିବା ଅମର ଚଭନ ନାମକ ଜଣେ ବ୍ୟକ୍ତି ଅନ୍ଲାଇନରେ ୫୫ ହଜାର ଟଙ୍କାର ଏକ ଦାମୀ ମୋବାଇଲ ଫୋନ୍ ଅର୍ଡର କରିଥିଲେ। ସେଥିପାଇଁ ସେ ଅର୍ଥ ମଧ୍ୟ ପଇଠ କରିଥିଲେ। ତେବେ ତାଙ୍କ ନିକଟକୁ ଯେଉଁ ପାର୍ସଲଟି ପହଞ୍ଚିଥିଲା ତାହାକୁ ଦେଖି ତାଙ୍କ ହୋସ୍ ଉଡ଼ି ଯାଇଥିଲା। ଦାମୀ ମୋବାଇଲ ବଦଳରେ ପାର୍ସଲରେ ଏକ ଚା’ କପ୍ ସେଟ୍ ରହିଥିଲା। ଏ ନେଇ ଅମର ତୁରନ୍ତ ସଂପୃକ୍ତ ଅନ୍ଲାଇନ ସଂସ୍ଥା ସହ ଯୋଗାଯୋଗ କରିଥିଲେ। ତାଙ୍କ ସମସ୍ୟାର ସମାଧାନ କରାଯିବ ବୋଲି ସଂସ୍ଥା ତରଫରୁ ଆଶ୍ବାସନା ଦିଆଯାଇଥିଲା। ଦୀର୍ଘଦିନ ବିତି ଯିବା ପରେ ମଧ୍ୟ କୌଣସି ପଦକ୍ଷେପ ଗ୍ରହଣ କରାନଯିବାରୁ ଅମର ପୁନର୍ବାର ସେହି ସଂସ୍ଥାକୁ ଯୋଗାଯୋଗ କରିଥିଲେ। ତେବେ ତାଙ୍କୁ କୌଣସି ପ୍ରକାର ସହାୟତା ପ୍ରଦାନ କରିବାରେ ସଂସ୍ଥା ତରଫରୁ ଅସମର୍ଥତା ପ୍ରକାଶ କରାଯିବା ପରେ ଅମର ବାଧ୍ୟ ହୋଇ ପୁଲିସରେ ଅଭିଯୋଗ କରିଥିବା ଜଣାପଡ଼ିଛି। ପୁଲିସ ଘଟଣାର ତଦନ୍ତ କରୁଛି।
Comments are closed.