ଆଠଗଡ – ମହାନଦୀରେ ଗାଧୋଇବାକୁ ଯାଇଥିବା ଆଠଗଡ଼ ଥାନା ଅନ୍ତର୍ଗତ ମେଘା ପଞ୍ଚାୟତର କାଇପୁଡିଆ ଗ୍ରାମର ଜଣେ ଛାତ୍ର ନିଖୋଜ ହୋଇ ଯାଇଥିଲେ । କାଇପୁଡିଆ ଗ୍ରାମର ଅକ୍ଷୟ କୁମାର ଓଝାଙ୍କ ପୁଅ ଅନିଶ ଗତ ସେପ୍ଟେମ୍ବର ୩୦ ତାରିଖରେ ମହାନଦୀରେ ନିଖୋଜ ହେବା ଖବର ଜଣାପଡିବା ପରେ ଉଦ୍ଧାର ପାଇଁ ଅଗ୍ନିଶମ ବାହିନୀ ଓ ଓଡ୍ରାଫ ଦଳ ଦିନ ତମାମ ଉଦ୍ୟମ କରିଥିଲେ ମଧ୍ଯ ସନ୍ଧାନ ମିଳିନଥିଲା ।
ଅଗ୍ନିଶମ ବାହିନୀର ସ୍କୁବା ଡାଇଭର ଅନୁଜ କୁମାର ସେଠୀ ନଦୀର ଗଭୀର ଜଳରେ ବାରମ୍ବାର ବୁଡି ଖୋଜାଖୋଜି କରିଥିଲେ ମଧ୍ଯ ନିଖୋଜ ଛାତ୍ରଙ୍କୁ ଉଦ୍ଧାର କରିବା ସମ୍ଭବ ହୋଇନଥିଲା । ପରଦିନ ସକାଳେ ପୁନର୍ବାର ଅଗ୍ନିଶମ ବାହିନୀ ଖୋଜାଖୋଜି କରି ସେ ଗାଧୋଉଥିବା ସ୍ଥାନରୁ ପ୍ରାୟ ଏକ କିଲୋମିଟର ଦୂରରେ ଭାସୁଥିବା ଅନିଶଙ୍କ ମୃତଦେହ ଉଦ୍ଧାର କରିଥିଲେ । ଏ ସମ୍ପର୍କରେ ଆଠଗଡ ପୁଲିସ ଏକ ଅପମୃତ୍ୟୁ ମାମଲା ରୁଜୁ କରି ଘଟଣାସ୍ଥଳରେ ପହଞ୍ଚି ଶବ ଜବତ କରିବା ସହିତ ଆଠଗଡ଼ ଉପଖଣ୍ଡ ଚିକିତ୍ସାଳୟରେ ବ୍ୟବଚ୍ଛେଦ କରାଇ ପରିବାରକୁ ହସ୍ତାନ୍ତର କରିଥିଲେ।
