ଗୋରଖପୁର: ଉତ୍ତରପ୍ରଦେଶର ଗୋରଖପୁର ଜିଲାରେ ଘଟିଛି ଏକ ଆଶ୍ଚର୍ଯ୍ୟକର ଘଟଣା। ଖୋରାବାର ଥାନା ଅଧିନସ୍ଥ କୁସହ୍ମୀ ବଜାରରେ ଗତ ରାତିରେ ସିନେମା ଷ୍ଟାଇଲରେ ଜଣେ ପ୍ରେମିକ ମଣ୍ଡପରେ ପହଞ୍ଚି ବର ସାମ୍ନାରେ କନ୍ୟା ମଥାରେ ସିନ୍ଦୁର ପିନ୍ଧାଇଛି, ଯାହା ସମ୍ପୃକ୍ତ ଅଞ୍ଚଳରେ ହଇଚଇ ସୃଷ୍ଟି କରିଛି।
ମିଳିଥିବା ସୂଚନା ମୁତାବକ, କୁସହ୍ମୀ ବଜାର ନିବାସୀ ସୁଦାମା ବିଶ୍ୱକର୍ମାଙ୍କ ଝିଅର ବିବାହ ଦେଓରିଆ ଜିଲା ଛପରୌଲୀ ନିବାସୀ ଦୀପଚନ୍ଦ ବିଶ୍ୱକର୍ମାଙ୍କ ପୁଅ ଶିବ ନାଥ ବିଶ୍ୱକର୍ମାଙ୍କ ସହ ଠିକ୍ ହୋଇଥିଲା। ବୁଧବାର ବର ସହ ବରଯାତ୍ରୀ ପହଞ୍ଚିଥିଲେ। ରାତି ପ୍ରାୟ ୧୦ଟା ସମୟରେ ବରମାଳା ପାଇଁ ଉଭୟ ବର ଓ କନ୍ୟା ଷ୍ଟେଜ ଉପରେ ଚଢିଥିଲେ। ଏହି ସମୟରେ ବରୌଲୀ ନିବାସୀ କନ୍ୟାର ପ୍ରେମିକ ଗୋଲୁ ବିଶ୍ୱକର୍ମା ସେଠାରେ ପହଞ୍ଚିଥିଲେ। ଗୋଲୁ ସିନେମା ଷ୍ଟାଇଲରେ ଗୋଟିଏ ହାତରେ କୁରାଢୀ ଆଉ ଗୋଟିଏ ହାତରେ ସିନ୍ଦୁର ଧରି ଷ୍ଟେଜ୍ ଉପରେ ଚଢିଥିଲେ। କେହି କିଛି ବୁଝିବା ଆଗରୁ ବର ସାମ୍ନାରେ ଗୋଲୁ କନ୍ୟା ମଥାରେ ସିନ୍ଦୁର ପିନ୍ଧାଇ ଦେଇଥିଲେ। ଏହା ଦେଖି ସେଠାରେ ଉପସ୍ଥିତ ଥିବା ଲୋକ ଚକିତ ହୋଇଯାଇଥିଲେ। ଏହାପରେ କନ୍ୟା ପରିବାର ଲୋକ ପ୍ରେମିକ ଗୋଲୁଙ୍କୁ ଧରି ନେଇ ନିର୍ଦ୍ଧୁମ ମାଡ଼ ମାରିଥିଲେ। ଫଳରେ ଗୋଲୁ ଆହତ ହୋଇଥିଲେ। ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ଆହତ ପ୍ରେମିକକୁ ଉଦ୍ଧାର କରି ଡାକ୍ତରଖାନା ପଠାଇଥିଲା। ଏହାପରେ ବର ପକ୍ଷ କନ୍ୟାକୁ ନେବା ପାଇଁ ରାଜି ହୋଇ ନ ଥିଲେ। କିନ୍ତୁ ରାତି ସାରା ଅନେକ ଆଲୋଚନା ହେବା ପରେ ଶେଷରେ ବର ପକ୍ଷ ରାଜି ହୋଇଥିଲେ ଏବଂ ବିବାହର ସମସ୍ତ ରୀତି ନୀତି ସମ୍ପୂର୍ଣ୍ଣ କରି କନ୍ୟାକୁ ସାଥିରେ ନେଇଥିଲେ।
