କଣ୍ଟାବାଞ୍ଜି : କଣ୍ଟାବାଞ୍ଜି ପୁଲିସ ଏକ ବାଇକ ଲୁଟେରା ଗ୍ୟାଙ୍ଗକୁ ଧରିବାରେ ସଫଳ ହେବା ସହ ପୂର୍ବରୁ ବିଭିନ୍ନ ଥାନା ଅଞ୍ଚଳରୁ ଚୋରି ହୋଇଥିବା ବାଇକ ମଧ୍ୟରୁ ୭ଟି ବାଇକ ଉଦ୍ଧାର କରିବା ସହ ଆଜି ୩ ଜଣ ଅଭିଯୁକ୍ତ କୋର୍ଟ ଚାଲାଣ କରାଯାଇଥିବା ନେଇ ସ୍ଥାନୀୟ ପୁଲିସ ଏକ ସାମ୍ବାଦିକ ସମ୍ମିଳନୀ ପ୍ରେସ ଇସ୍ତାହାର ସୂଚନା ଦେଇଛି। ଗିରଫ ହୋଇଥିବା ୩ ଜଣ ହେଲେ ତୁରେକେଲା ଥାନା ରାମୋଡ ଗ୍ରାମର ଶିବ ପ୍ରଧାନ(୨୪), କଣ୍ଟାବାଞ୍ଜି ଥାନା କୁକୁଡାହାଡ ଗ୍ରାମର ପ୍ରଭାତ ବେହେରା (୨୬), ହୀରାଲାଲ ପୁଟେଲ (୨୦) ଓ ଏହି ଗ୍ୟାଙ୍ଗ ସହ ବାଇକ ଚୋରୀରେ ସଂପୃକ୍ତ ସୁରଥ ପୁଟେଲ, ଅନ୍ୟ ଚୋରୀ ମାମଲାରେ ସଂପୃକ୍ତ ଥିବାରୁ ଗତ ୧୨ ତାରିଖ କୋର୍ଟଚାଲାଣ ହୋଇ ଜେଲରେ ରହିଛନ୍ତି।
ଖବର ଦାତା ସମ୍ମିଳନୀରେ ପୁଲିସ ପକ୍ଷରୁ ଦିଆଯାଇଥିବା ସୂଚନା ମୁତାବକ କଣ୍ଟାବାଞ୍ଜି ଥାନା ଅଞ୍ଚଳରେ ୨ଟି ବାଇକ, ମୁରିବାହାଲ ଥାନା ଅଞ୍ଚଳରେ ୨ଟି ବାଇକ, ବେଲପଡା ଥାନାର ଗୋଟିଏ, ତୁରେକେଲା ଥାନା ଅଞ୍ଚଳ ଗୋଟିଏ ବାଇକ୍ ଏବଂ ଛତିଗଡ ରାୟପୁର ଅଞ୍ଚଳର ଗୋଟିଏ ବାଇକ ସେମାନଙ୍କ ଠାରୁ ଉଦ୍ଧାର କରିଛି। କଣ୍ଟାବାଞ୍ଜି ଏସ.ଡି.ପି.ଓ. ସରୋଜ ମହାପାତ୍ରଙ୍କ ନେତୃତ୍ୱ ଏବଂ ଥାନାଧିକାରୀ ସତ୍ୟଜିତ କନ୍ଦଲକେଲଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ବାଇକ ଲୁଟେରା ଗ୍ୟାଙ୍ଗର ସୁରାକ ମିଳିବା ପରେ ପୁଲିସ ସକ୍ଷମ ହୋଇଥିବା ଆଗାମୀ ଦିନରେ ଏହି ବାଇକ ଲୁଟେରା ଗ୍ୟାଙ୍ଗ ତରଫରୁ ଆହୁରି ଚୋରୀ ବାଇକ ମିଳିବା ସମ୍ଭାବନା ଥିବା ଏବଂ ଚୋରୀ ବାଇକ କିଣୁଥିବା ବ୍ୟକ୍ତିଙ୍କ ଠାବ କରିବା ପାଇଁ ପୁଲିସ ଅନସନ୍ଧାନ ଜାରୀ ରଖିଥିବା ଥାନା ଭାରପ୍ରାପ୍ତ ଅଧିକାରୀ ସୂଚନା ଦେଇଛନ୍ତି।
Comments are closed.