ନୂଆଦିଲ୍ଲୀ : ଲୋକସଭା ବାଚସ୍ପତି ଓମ୍ ବିର୍ଲା କଂଗ୍ରେସରୁ ନିଲମ୍ବିତ ହୋଇଥିବା ୭ ଜଣ ସାଂସଦଙ୍କର ନିଲମ୍ବନକୁ ପ୍ରତ୍ୟାହାର କରି ନେଇଛନ୍ତି। ଲୋକସଭା କାର୍ଯ୍ୟଧାରା ଚାଲିଥିବାବେଳେ ଅଶାଳୀନ ବ୍ୟବହାର ପ୍ରଦର୍ଶନ ଯୋଗୁଁ ସେମାନଙ୍କୁ ନିଲମ୍ବନ କରାଯାଇଥିଲା।
ସୂଚନା ଯୋଗ୍ୟ, ଗତ ୫ ତାରିଖରେ କଂଗ୍ରେସର ୭ ଜଣ ଲୋକସଭା ସାଂସଦଙ୍କୁ ବଜେଟ୍ ଅଧିବେଶନ ଶେଷ ହେବା ପର୍ଯ୍ୟନ୍ତ ଲୋକସଭାର କାର୍ଯ୍ୟଧାରାରେ ଭାଗ ନେବାରୁ ନିଲମ୍ବନ କରାଯାଇଥିଲା। ସେମାନେ ଗୃହରେ ହଟ୍ଟଗୋଳ ସୃଷ୍ଟି କରୁଥିଲେ ଓ ବାଚସ୍ପତିଙ୍କ ପ୍ରତି ଅସମ୍ମାନ ପ୍ରଦର୍ଶନ କରିଥିବାରୁ ଏହି ପଦକ୍ଷେପ ନିଆଯାଇଥିଲା।
ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀ ନିୟମ ୩୭୪ ଅଧୀନରେ ଏକ ପ୍ରସ୍ତାବ ଆଗତ କରିଥିଲେ। ପୂର୍ବରୁ ବାଚସ୍ପତି ସଦସ୍ୟମାନଙ୍କର ଆଚରଣର ନିନ୍ଦା କରିଥିଲେ। ଲୋକସଭାରେ ଖଣିଜ ପଦାର୍ଥ ଆଇନ୍ ସଂଶୋଧନ ବିଲ୍ ୨୦୨୦ ଉପରେ ଆଲୋଚନା ଚାଲିଥିବା ବେଳେ ସେହି ସଦସ୍ୟମାନେ ବିଲ୍ର ନକଲକୁ ଚିରି ଫିଙ୍ଗିଦେଇଥିଲେ।
ନିଲମ୍ବିତ ହୋଇଥିବା ସଦସ୍ୟମାନଙ୍କ ମଧ୍ୟରେ ଗୌରବ ଗୋଗୋଇ, ଟି.ଏନ୍. ପ୍ରଥପନ, ଡିନ୍ କୁରିଆକୋଷେ, ମନିକମ୍ ଟ୍ୟାଗୋର, ଗୁରଜିତ ସିଂହ ଔଜଲା, ରାଜମୋହନ ଉନିଥନ ଓ ବେନି ବେହେନାନ ଥିଲେ। ଏଥର ସେମାନେ ଗୃହ କାର୍ଯ୍ୟରେ ଯୋଗ ଦେଇ ପାରିବେ।
