ଭୁବନେଶ୍ୱର : ପାରମ୍ପରିକ ରୀତିନୀତି ଅନୁସାରେ ମଙ୍ଗଳବାର ମହାପ୍ରଭୁ ଶ୍ରୀଲିଙ୍ଗରାଜଙ୍କ ମଙ୍ଗନ ନୀତି ସମ୍ପନ୍ନ ହୋଇଛି। ଶ୍ରୀଜୀଉଙ୍କ ସନ୍ଧ୍ୟାଧୂପ ପରେ ମହାସୁଆର ସେବକ ମଙ୍ଗନ ହାଣ୍ଡି ପ୍ରସ୍ତୁତ କରିଥିଲେ। ପରେ ମଙ୍ଗନହାଣ୍ଡି ମନ୍ଦିର ଭିତରେ ବୁଲିବା ପରେ ଆଠଟି ମଙ୍ଗନ ହାଣ୍ଡିକୁ ସେବାୟତମାନେ ନେଇ ଅଷ୍ଟଚଣ୍ଡୀଙ୍କୁ ନିମନ୍ତ୍ରଣ କରିବାକୁ ବାହାରିଥିଲେ। ଅଷ୍ଟଚଣ୍ଡୀଙ୍କୁ ସେବାୟତ ଫୁଲ ଚନ୍ଦନ ଦେଇ ପୂଜାଚର୍ଚ୍ଚନା କରି ପୃଥକ ପୃଥକ ଭାବେ ନିମନ୍ତ୍ରଣ କରିଥିଲେ। ଶ୍ରୀଜୀଉଙ୍କ ବିବାହରେ ଯୋଗ ଦେବାଲାଗି ନିମନ୍ତ୍ରଣ କରି ମନ୍ଦିରକୁ ଫେରିବା ପରେ ଦିଅଁଙ୍କ ମଙ୍ଗଳକୃତ୍ୟ ନୀତି ସମ୍ପନ୍ନ ହୋଇଥିଲା।
ବୁଧବାର ଦିଅଁଙ୍କ ବିବାହ ଉତ୍ସବ ପାଳନ ହେବ। ପାଳିଆ ସେବାୟତ ଦିଅଁଙ୍କୁ ବିମାନ ପାଲିଙ୍କିରେ ବିଜେ କରାଇ କେଦାର ଗୌରୀ ମନ୍ଦିର ଅଭିମୁଖେ ଯିବେ। ରାତି ପ୍ରାୟ ୧୧ଟାରେ ଦିଅଁ ବାହାରି ରାତି ୧୧ଟା ୪୫ମିନିଟ୍ରେ କେଦାର ଗୌରୀ ମନ୍ଦିରରେ ପହଞ୍ଚିବେ। ନୀତିନିର୍ଘଣ୍ଟ ଅନୁସାରେ ଦିଅଁଙ୍କ ମଙ୍ଗଳକୃତ୍ୟ ସହ ବିବାହ ଉତ୍ସବ ପାଳନ ହେବ। ଦିଅଁଙ୍କ ବିବାହ ଉତ୍ସବରେ କୌଣସି ଶ୍ରଦ୍ଧାଳୁ ସାମିଲ ପ୍ରତି କଟକଣା ରହିଛି।
