ଲଡୁଗାଁ: କଳାହାଣ୍ଡି ଜିଲା କୋକସରା ବ୍ଲକର ପ୍ରତ୍ୟେକ ଦିଗରୁ ପ୍ରଭାବଶାଳୀ ବୋଲାଉଥିବା ଏହି ଲଡୁଗାଁକୁ କାହାର ନଜର ଲାଗିଲା କେଜାଣି । କେହି ଏଠି ଶାନ୍ତିରେ ରହିପାରୁ ନାହାନ୍ତି କି ସମସ୍ୟା ଲୋକଙ୍କ ପିଛା ଛାଡୁନି । ଯଦି କେହି କାଗଜ କଲମ ଧରି ବସେ ତେବେ ସମସ୍ୟାର ଲମ୍ବା ତାଲିକା ଆଉ ଦୁର୍ନୀତିଖୋର ଓ ଅତ୍ୟାଚାରୀଙ୍କ କାହାଣୀରେ ଖାତା ପୁରିଯିବ । ଏଇ ଦେଖୁ ନାହାନ୍ତି ଅଞ୍ଚଳର ସବୁଠାରୁ ପ୍ରଭାବଶାଳୀ, ଶିଳ୍ପପତି, ରାଜନେତା, କୁଜିନେତା, ଏପରିକି ଛଦ୍ମବେଶୀ ନେତାଙ୍କ ପେଣ୍ଠସ୍ଥଳୀ ବା ମିଲର୍ସ, ବିଲ୍ଡର୍ସଙ୍କ ନଗରୀ ବୋଲାଉଥିବା ଏହି ଲଡୁଗାଁର ଦୃଶ୍ୟ । ଏପଟେ ପିକଅପକୁ ସେପଟେ ମିଲର୍ସଙ୍କ ଟ୍ରକ । ଫସିଲା ଗାଡ଼ି ଆଉ ଫସିଗଲା ମଣିଷ । ଆଉ ଯିବାକୁ ବାଟଘାଟ ନାହିଁ । ପ୍ରାୟ ଅଧ ଘଣ୍ଟା ଲୋକେ ଅପେକ୍ଷା କରି ରହିଥିଲେ । ପରେ ବାଟ ଫିଟିଥିଲା । ଅଭିଯୋଗ ହୁଏ, ବାରମ୍ବାର ଲଡୁଗାଁ ବସ୍ତିରେ ଲୋକେ ଟ୍ରାଫିକ ସମସ୍ୟାର ସମ୍ମୁଖୀନ ହେଉଛନ୍ତି । ଏତେ ପ୍ରତିଷ୍ଠିତ ପ୍ରଭାବଶାଳୀ ବ୍ୟକ୍ତି ବିଶେଷ ଥିବାସତ୍ତ୍ୱେ କେହି ଏହି ସମସ୍ୟାର ସମାଧାନ କରି ପାରୁନାହାନ୍ତି । ଯାହାକି ତାଙ୍କ ପାରିବା ପଣିଆକୁ ପଦାରେ ପକାଉଛି । ଅନ୍ୟପଟେ ରାସ୍ତା ଉପରେ ଜବର ଦଖଲକାରୀଙ୍କ ଉତ୍ପାତ । ଲୋକେ ଯିବେ ତ ଯିବେ କୁଆଡେ । ଯେଉଁ ବିଭାଗୀୟ ଅଧିକାରୀ ଆସନ୍ତି କିଛି କିଛି ହାତଗୁଞ୍ଜା ଆଦାୟ କରି ଚାଲିଯାଆନ୍ତି । ପୁଣି ଯେସାକୁ ତେସା ।
ସୂଚନାଯୋଗ୍ୟ ଯେ, ଦିନେ ଲଡୁଗାଁ ବାନେର ରାସ୍ତା ପାଇଁ ଜନସାଧାରଣ ଆନ୍ଦୋଳନ କରିଥିଲେ । ତାହା ବି ଫସର ଫାଟିଗଲା । ପୁଣି ଏବେ ଅତିଷ୍ଟ ହୋଇ ଏହି ଲଡୁଗାଁ ଟ୍ରାଫିକ ସମସ୍ୟା ଓ ରାସ୍ତା ସମସ୍ୟା ଦୂର କରିବା ସହ ଜବରଦଖଲକାରୀଙ୍କ ପ୍ରତି ବିଭାଗ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ନେଇ ଲୋକେ ଦାବୀ କରୁଛନ୍ତି । ନଚେତ୍ ଆଗାମୀ ଦିନରେ ଭୟଙ୍କର ଜନ ଅସନ୍ତୋଷ ବାତାବରଣ ସୃଷ୍ଟି ହେବାସହ ଆନ୍ଦୋଳନ କରିବାକୁ ଜନସାଧାରଣ ଚେତାବନୀ ଦେଇଛନ୍ତି ।
Comments are closed.