ହରଭଙ୍ଗା : ଚଳିତବର୍ଷ ରାଜ୍ୟର ସମଗ୍ର ଜଙ୍ଗଲରେ ମନୁଷ୍ୟକୃତ ଜଙ୍ଗଲ ପୋଡି ଘଟଣା ସରକାରଙ୍କୁ ବିବ୍ରତ କରିଛି। ମନୁଷ୍ୟକୃତ ନିଆଁକୁ ଆୟତ କରିବା ପାଇଁ ରାଜ୍ୟ ସରକାର କଠୋର ଆଭିମୁଖ୍ୟ ଗ୍ରହଣ କରିଛନ୍ତି। ଜଙ୍ଗଲରେ ନିଆଁ ଲଗାଉଥିବା ଅଭିଯୁକ୍ତଙ୍କୁ ଗିରଫ କରିବାକୁ ବିଭାଗୀୟ ଅଧିକାରୀଙ୍କୁ କଡା ନିର୍ଦ୍ଦେଶ ଦେଇଛନ୍ତି। ସରକାରଙ୍କ କଡାଆଭିମୁଖ୍ୟକୁ ଅନୁପାଳନ କରି କୁଶଙ୍ଗ ବନ୍ୟପ୍ରାଣୀ ବିଭାଗ ଜଙ୍ଗଲରେ ନିଆଁ ଲଗାଉଥିବା ଘଟଣାରେ ବୁଧୁବାର ଅପରାହ୍ନରେ ଦୁଇ ଜଣଙ୍କୁ ଗିରଫ କରିଛି। ଦୁଇ ଗିରଫ ଅଭିଯୁକ୍ତହେଲେ ହରଭଙ୍ଗା ଥାନା ଅର୍ନ୍ତଗତ ଘୁମୁରିପଡା ଗ୍ରାମର ମୋହନ ଦେହୁରୀ(୩୬)ଏବଂ ଫକୀର ନାଏକ(୪୨)ବୋଲି ସୂଚନା ମିଳିଛି। ମିଳିଥିବା ସୂଚନା ଅନୁସାରେ ଗତକାଲି କୁଶଙ୍ଗ ବନ୍ୟପ୍ରାଣୀ ରେଞ୍ଜର ପଦ୍ମତୋଳା ଅଭୟାରଣ୍ୟ ଜଙ୍ଗଲରେ ନିଆଁ ଲଗାଉଥିବା ସମୟରେ ବନ୍ୟପ୍ରାଣୀ ବିଭାଗ ଏମାନଙ୍କୁ କାବୁ କରିଥିଲା। ଦୁଇ ଅଭିଯୁକ୍ତଙ୍କୁ ଜଙ୍ଗଲ ସୁରକ୍ଷା ଆଇନରେ ଗିରଫ କରି ଗୁରୁବାର କୋର୍ଟ ଚାଲାଣ କରିଥିବା କୁଶଙ୍ଗ ବନ୍ୟପ୍ରାଣୀ ରେଞ୍ଜର ପ୍ରଦୀପ ଭୂତିଆ ସୂଚନା ଦେଇଛନ୍ତି। ପ୍ରଥମଥର ପାଇଁ ଜଙ୍ଗଲରେ ନିଆଁ ଲଗାଉଥିବା ଘଟଣାରେ ବନ୍ୟପ୍ରାଣୀ ବିଭାଗର ଏଭଳି କଠୋରନୀତି ସାରା ଅଂଚଳରେ ଭୟର ଗୁଞ୍ଜରଣ ସୃଷ୍ଟି କରିଛି।। ଏଭଳି କାର୍ଯ୍ୟାନୁଷ୍ଠାନ ଆଗକୁ ଜଙ୍ଗଲରେ ମନୁଷ୍ୟକୃତ ନିଆଁକୁ ବହୁମାତ୍ରରେ ହ୍ରାସ କରିବ ବୋଲି ମତ ପ୍ରକାଶ ପାଉଛି।
Comments are closed.