କୋଟିଆରେ ଆନ୍ଧ୍ର ଆୟୋଜିତ କଲା ‘ବିକଶିତ ଭାରତ ସଂକଳ୍ପ ଯାତ୍ରା’ ଅନୁପ୍ରବେଶ ନିନ୍ଦନୀୟ କହିଲା ଓଡ଼ିଆ ଅସ୍ମିତା ପରିଷଦ

ଭୁବନେଶ୍ୱର: ସରକାର ବଦଳିଥିଲେ ମଧ୍ୟ କୋଟିଆ ଦଖଲକୁ ନେଇ ଆନ୍ଧ୍ରର ମତିଗତିର କୌଣସି ପରିବର୍ତ୍ତନ ହୋଇନାହିଁ। ଗତ ଶନିବାର ଆର୍ଥିକ ସାକ୍ଷରତା ନାମରେ ଆନ୍ଧ୍ରର ଅଧିକାରୀମାନେ କୋଟିଆ ଗ୍ରାମପୁଞ୍ଜର ନେରେଡ଼ିବାଲସା ଗ୍ରାମରେ ଏକ ଶିବିର ଆୟୋଜନ କରିଥିଲେ। ଆଖପାଖ ଗାଁର ଶତାଧିକ ଲୋକଙ୍କୁ ବୋହିଆଣି ‘ବିକଶିତ ଭାରତ ସଂକଳ୍ପ ଯାତ୍ରା’ ଆୟୋଜନ କରିବା ସହିତ ବିଭିନ୍ନ ବ୍ୟାଙ୍କ କାରବାର ସମ୍ପର୍କରେ ସଚେତନତା ସୃଷ୍ଟି କରିଥିଲେ। କିନ୍ତୁ ଦୁଃଖର କଥା କୋଟିଆ ଥାନା ହେଉ କିମ୍ବା ପଟାଙ୍ଗୀ ବ୍ଲକ ଓ କୋରାପୁଟ ଜିଲ୍ଲା ପ୍ରଶାସନ ପକ୍ଷରୁ ଆନ୍ଧ୍ର ଅଧିକାରୀଙ୍କୁ ବାଧା ଦିଆନଯିବା କ୍ଷୋଭର ବିଷୟ ବୋଲି ଓଡ଼ିଆ ଅସ୍ମିତା ପକ୍ଷରୁ ଅଭିଯୋଗ କରାଯାଇଛି।

ଅସ୍ମିତା ପରିଷଦର ଆବାହକ ରବି ବେହେରା ରବିବାର ଟୁଇଟ୍ କରି ମାନ୍ୟବର ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ କହିଛନ୍ତି ଯେ, ମାନ୍ୟବର ମୁଖ୍ୟମନ୍ତ୍ରୀ ତୁରନ୍ତ ରାଜସ୍ୱମନ୍ତ୍ରୀଙ୍କୁ କୋଟିଆ ପଠାନ୍ତୁ। କୋଟିଆକୁ ନେଇ ଓଡ଼ିଶା ସରକାର ତୁରନ୍ତ ବିଭିନ୍ନ ରାଜନୈତିକ ଦଳ ଏବଂ ଓଡ଼ିଆ ଅସ୍ମିତାକୁ ନେଇ କାମ କରୁଥିବା ଗଣସଂଗଠନ ଗୁଡ଼ିକର ମତାମତ ନେଇ ଆନ୍ଧ୍ର ସରକାରଙ୍କ ସହିତ କୋଟିଆ ସମସ୍ୟାର ଆପୋଷ ସମାଧାନ ପାଇଁ ଉଦ୍ୟମ କରିବାକୁ ଶ୍ରୀ ବେହେରା ଆହ୍ୱାନ ଦେଇଛନ୍ତି।