ସମ୍ବଲପୁର : ଅଞ୍ଚଳର ଅଧିଷ୍ଠାତ୍ରୀ ଦେବୀ ମାଁ ସମଲେଶ୍ୱରୀଙ୍କୁ ଅଭଦ୍ର ଭାଷାରେ ଟିପ୍ପଣୀର ବିରୋଧରେ ବିଭିନ୍ନ ଅନୁଷ୍ଠାନ ପକ୍ଷରୁ ଅଭିଯୁକ୍ତ ମାନଙ୍କୁ ଗିରଫ କରିବା ପାଇଁ ରାଜ୍ୟପାଳଙ୍କୁ ଶୁକ୍ରବାର ଏକ ଦାବିପତ୍ର ପ୍ରଦାନ କରାଯାଇଛି। ହୀରାଖଣ୍ଡ ସାମୁଖ୍ୟ ସଙ୍ଗଠନର ତତ୍ୱାବଧାନରେ ଉତ୍ତରାଞ୍ଚଳ ରାଜସ୍ୱ ଆୟୁକ୍ତ, ସମ୍ବଲପୁର ଜିଲାପାଳ ଓ ଜିଲା ପୁଲିସ ଆରକ୍ଷୀ ଅଧିକ୍ଷକଙ୍କୁ ଦାବିପତ୍ର ପ୍ରଦାନ କରିଛନ୍ତି। ପ୍ରଦତ୍ତ ଦାବିପତ୍ର ଅନୁଯାୟୀ, ଅଞ୍ଚଳର ଅଧିଷ୍ଠାତ୍ରୀ ଦେବୀ ମାଁ ସମଲେଶ୍ୱରୀ ତଥା ସମ୍ବଲପୁରୀ ଭାଷାର ଅପମାନ ଦୁର୍ଭାଗ୍ୟଜନକ ଅଟେ। ସମ୍ବଲପୁରୀ ଭାଷା ପଶ୍ଚିମ ଓଡିଶାର ସ୍ୱାଭିମାନ ହୋଇଥିବାରୁ ଏହାକୁ କଦାପି ବରଦାସ୍ତ କରାଯିବ ନାହିଁ।
କିଛି ଅସାମାଜିକବ୍ୟକ୍ତି ମାନେ ବିଭିନ୍ନ ସାମାଜିକ ଗଣମାଧ୍ୟମ ଜରିଆରେ ଅପମାନ କରୁଛନ୍ତି। ଏଣୁ ଅଭିଯୁକ୍ତ ମାନଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଆଇନ ଅନୁଯାୟୀ ଗ୍ରହଣ କରାଯିବା ଉଚିତ। ପଶ୍ଚିମ ଓଡିଶାର ୨ କୋଟିରୁ ଉର୍ଦ୍ଧ୍ବ ଜନତାଙ୍କ ଭାଷା ସମ୍ବଲପୁରୀ ହୋଇଥିବାରୁ ଏହାକୁ ସମ୍ବିଧାନର ଅଷ୍ଟମ ପରିଚ୍ଛେଦରେ ସାମିଲ କରାଯାଉ। ସମ୍ବଲପୁରୀ ଭାଷାରେ, କବିତା, ଗଳ୍ପ, ପ୍ରବନ୍ଧ ଡ୍ରାମା ଓ ଅନ୍ୟାନ୍ୟ ସାହିତ୍ୟିକ ରଚନା ରହିଛି। ପଶ୍ଚିମ ଓଡିଶାରେ କୋଶଳ ନାମରେ ଭ୍ରମ ସୃଷ୍ଟି କରାଯାଉଛି। କୋଶଳ ସହିତ ପଶ୍ଚିମ ଓଡିଶାର କୌଣସି ସମ୍ପର୍କ ନ ଥିବାରୁ ଏହାକୁ ସମ୍ପୁର୍ଣ୍ଣ ରୂପେ ଆମେ ବିରୋଧ କରୁଛୁ। ଉପରୋକ୍ତ ସଙ୍ଗଠନ ଦ୍ୱାରା ଶନିବାର ଆହୁତ କୋଶଳ ବନ୍ଦକୁ ସମ୍ପୁର୍ଣ୍ଣ ରୂପେ ବିରୋଧ କରୁଛୁ। ଓଡିଶାର ପଶ୍ଚିମାଞ୍ଚଳ ହୀରାଖଣ୍ଡ ରୂପେ ପରିଚିତ ଥିବା ବେଳେ ଏହା ଅତ୍ୟନ୍ତ ଅବହେଳିତ ରହିଛି। ଏ
ଣୁ ସୁନ୍ଦରଗଡ, ଝାରସୁଗୁଡା, ଦେବଗଡ, ସମ୍ବଲପୁର, ବରଗଡ, ବୌଦ୍ଧ, ସୁବର୍ଣ୍ଣପୁର, ବଲାଙ୍ଗୀର, ନୁଆପଡା ଓ କଳାହାଣ୍ଡି ଜିଲା ସମେତ ଅନୁଗୁଳ ଜିଲାର ଆଠମଲ୍ଲିକ ଉପଖଣ୍ଡକୁ ନେଇ ହୀରାଖଣ୍ଡ ରାଜ୍ୟ ଗଠନ କରାଯାଉ। ହୀରାଖଣ୍ଡ ରାଜ୍ୟ ଗଠନ ନ ହେବା ପର୍ଯ୍ୟନ୍ତ ସମ୍ବଲପୁରୀ ଭାଷାକୁ ରାଜ୍ୟର ଦ୍ୱିତୀୟ ଭାଷାର ମାନ୍ୟତା ପ୍ରଦାନ କରାଯାଉ ବୋଲି ଦାବିପତ୍ରରେ ଦର୍ଶା ଯିବା ସହିତ ସଙ୍ଗଠନ ମାନଙ୍କ ତରଫରୁ କୁହାଯାଇଛି। ଏଥି ସହ ଅଞ୍ଚଳର ସମସ୍ତ ବାସିନ୍ଦା, ବ୍ୟବସାୟୀ, ଦୋକାନୀ ଓ ବିଭିନ୍ନ ଧର୍ମର ଜନତାଙ୍କୁ ସେମାନଙ୍କର ଦୋକାନ, ବଜାର ଓ ରିତିନିତି ଜାରି ରଖିବାକୁ ଅନୁରୋଧ କରାଯାଇଛି।
