କେନ୍ଦୁଝରଗଡ: ବେଅ।।ଇନ ଗୋଚାଲାଣକାରୀ ଓ ପୁଲିସ ମଧ୍ୟରେ ଗୁଳି ବିନିମୟ ଯୋଗୁଁ ଜଣେ ଗୋଚାଲାଣକାରୀ ଗୁରୁତର ହୋଇଥିବା ବେଳେ ୨ଜଣ ପୁଲିସ କର୍ମଚାରୀ ଆହତ ହୋଇଛନ୍ତି। ରବିବାର ଭୋର ସମୟରେ ବେଆଇନ ଗୋରୁ ଚାଲାଣ ସମ୍ପର୍କରେ ପୁଲିସ ଖବର ପାଇ ହରିଚନ୍ଦନପୁର ଥାନା ଅଞ୍ଚଳର କୁଲାଢାଙ୍କୁଣି ନିକଟରେ ଗୋଚାଲାଣ ଗାଡିକୁ ଅଟକାଇବାକୁ ଚେଷ୍ଟା କରିଥିଲେ। ଏହି ସମୟରେ ଗୋଚାଲାଣକାରୀ ପ୍ରଥମେ ପୁଲିସ ଉପରକୁ ଗୁଳି ଚାଳନା କରିବା ପରେ ବାଧ୍ୟ ହୋଇ ପୁଲିସ ପକ୍ଷରୁ ପାଲଟା ଗୁଳି ଚାଳନା କରାଯାଇଥିଲା। ଯେଉଁଥିରେ ଘଟଗାଁ ଥାନା ଅଧିନ ସାନ୍ତରାପୁର ଅଞ୍ଚଳର ଗୋଚାଲାଣକାରୀ ଆରିକ ଖାନ ଗୋଡରେ ଦୁଇଟି ଗୁଳି ବାଜିଛି। ଅପର ପକ୍ଷରେ ଗୋଚାଲାଣକାରୀଙ୍କ ଗୁଳିରେ ୨ଜଣ ପୁଲିସ କର୍ମଚାରୀ ମଧ୍ୟ ଆହତ ହୋଇଛନ୍ତି। ଗୁରୁତର ଆହତ ଗୋଚାଲାଣକାରୀ ଆରିକ ଖାନକୁ ପୁଲିସ ପକ୍ଷରୁ ଜିଲା ମୁଖ୍ୟ ଚିକିତ୍ସାଳୟରେ ପ୍ରାଥମିକ ଚିକିତ୍ସା ପରେ କଟକ ସ୍ଥାନାନ୍ତର କରାଯାଇଛି। ସେହିପରି ଆହତ ୨ପୁଲିସ କର୍ମଚାରୀ ହରିଚନ୍ଦନପୁର ସ୍ୱାସ୍ଥକେନ୍ଦ୍ରରେ ପ୍ରାଥମିକ ଚିକିତ୍ସା ପରେ ଛାଡ଼ି ଦିଆଯାଇଛି।
ଏ ସଂକ୍ରାନ୍ତରେ ହରିଚନ୍ଦନପୁର ଓ ପଣ୍ଡାପଡ଼ା ଥାନାରେ ପୃଥକ ପୃଥକ ମାମଲା ରୁଜୁ ହୋଇ ଅଧିକ ତଦନ୍ତ ଜାରି ରହିଥିବା ଅତିରିକ୍ତ ଆରକ୍ଷୀ ଅଧିକ୍ଷକ ଦିଲ୍ଲୀପ କୁମାର ନାୟକ ରବିବାର ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି। ଏଥିସହ ଏହି ମାମଲାରେ ପୁଲିସ ଗୋରୁ ବୋଝେଇ ୩ଟି ପିକଅପ ଭ୍ୟାନ ସହ ଗୋଟିଏ ଏକ୍ସୟୁଭି କାର, ଦୁଇଟି ଦେଶୀ ପିସ୍ତଲ ଜବତ କରିବା ସହିତ ୨୫ଟି ଗୋରୁଙ୍କୁ ପୁଲିସ ଉଦ୍ଧାର କରିଛି। ଏହି ମାମଲାରେ ପୁଲିସ ମୁଖ୍ୟ ଅଭିଯୁକ୍ତ ଆରିକ ଖାନ ସମେତ ସେକ୍ ହାକିମ, ସୋନୁ ମହମ୍ମଦ, ଦୀପକ କାଳନ୍ଦୀ ଓ ଦେବୁ କାଳନ୍ଦୀକୁ ଗିରଫ କରିଥିବା ଅତିରିକ୍ତ ଆରକ୍ଷୀ ଅଧିକ୍ଷକ ଶ୍ରୀ ନାୟକ ଏହି ସୂଚନା ଦେଇଛନ୍ତି।
