କେନ୍ଦୁଝରଗଡ:ନବଗଠିତ ଧରଣୀଧର ବିଶ୍ୱବିଦ୍ୟାଳୟ ଓ ଆନ୍ତଃ ବିଶ୍ୱବିଦ୍ୟାଳୟ ଗତିବର୍ଦ୍ଧକ କେନ୍ଦ୍ରର ମିଳିତ ଆନୁକୂଲ୍ୟରେ ସ୍ପେକ୍ଟ୍ରୋମେଟ୍ରି ଓ ଭୁ-କାଳାନୁକ୍ରମ ସମ୍ପର୍କିିତ କର୍ମଶାଳା ସୋମବାର ବିଶ୍ୱବିଦ୍ୟାଳୟ ଉତ୍ତର ପରିସରରେ ଅନୁଷ୍ଠିତ ହୋଇଯାଇଛି। ବିଶ୍ୱବିଦ୍ୟାଳୟ ଅନୁଦାନ ଆୟୋଗ ତରଫରୁ ପ୍ରତିନିଧିତ୍ୱ କରୁଥିବା ବୈଜ୍ଞାନିକ ଡ. ରଜବୀର ସିଂ ଓ ରାମଚରଣ ମୀନା, ରସାୟନ, ଭୂତତ୍ତ୍ୱ ଓ ପଦାର୍ଥବିଜ୍ଞାନ ଉପରେ ଅଧିକ ପ୍ରାଧାନ୍ୟ ଦେବା ସହିତ ଭୂର୍ଗରେ ଥିବା ବିଭିନ୍ନ ଶିଳା, ଜୀବାଶ୍ମ ଆଦିର ସମୟ ଓ ଆୟୁଷ ମାପିବା ପାଇଁ ସ୍ପେକ୍ଟ୍ରୋମେଟ୍ରିର ଉପାକଦେୟତା ସମ୍ପର୍କରେ ଆଲୋକପାତ କରିଥିଲେ। କେନ୍ଦୁଝର ଭଳି ଏକ ଖଣିଜ ସମୃଦ୍ଧ ଜିଲାରେ ଏହାର ବ୍ୟବହାର ଅଧିକ ଉପାଦେୟ ଉପାଦେୟ ହେବାସହ ଗବେଷଣାରେ ସହାୟକ ହୋଇପାରିବ ବୋଲି ଉଭୟ ବୈଜ୍ଞାନିକ ମତବ୍ୟକ୍ତ କରିଥିଲେ।
କେନ୍ଦୁଝରର ଅତିରିକ୍ତ ଜିଲାପାଳ ଯଦୁମଣି ମହଲା ମୁଖ୍ୟଅତିଥି ଭାବେ ଯୋଗଦେଇ ଏଭଳି କର୍ମଶାଳାର ଆୟୋଜନ ନବଗଠିତ ବିଶ୍ୱବିଦ୍ୟାଳୟର ଶୈକ୍ଷିକ ବାତାକରଣକୁ ଆହୁରି କ୍ରିୟାଶୀଳ କରିବାରେ ଯଥେଷ୍ଟ ସହାୟକ ହେବବୋଲି ଆଶାପୋଷଣ କରିଥିଲେ। ଏହି ଅବସରରେ ବିଶ୍ୱବିଦ୍ୟାଳୟର କୁଳପତି ତଥା ବିଶିଷ୍ଟ ବୈଜ୍ଞାନିକ ପ୍ରଫେସର ପ୍ରତାପ କୁମାର ମହାନ୍ତି ଅଧ୍ୟକ୍ଷତା କରି ସ୍ପେକ୍ଟ୍ରୋମେଟ୍ରିର ବହୁଳ ପ୍ରୟୋଗ ସମ୍ପର୍କରେ ବିଶ୍ଳେଷଣ କରି ବିଶ୍ୱବିଦ୍ୟାଳୟର ଏ ଦିଗରେ ଥିବା ଆବଶ୍ୟକତା ସମ୍ପର୍କରେ ଅବତାରଣା କରିଥିଲେ।
ପରେ ପରେ ଦୁୁଇଟି ପର୍ଯ୍ୟାୟରେ ବୈଷୟିକ ଆଲୋଚନା କରିଥିବା ବେଳେ ଆନ୍ତଃ ବିଶ୍ୱବିଦ୍ୟାଳୟ ତ୍ୱରିତ କେନ୍ଦ୍ର ତରଫରୁ ଯୋଗାଇ ଦିିଆଯାଉଥିବା ବିଭିନ୍ନ ସହଯୋଗ ସମ୍ପର୍କରେ ଆଲୋଚନା କରିଥିଲେ ଦୁଇ ସମ୍ବଳ ବିଶେଷଜ୍ଞ। ଧରଣୀଧର ବିଶ୍ୱବବିଦ୍ୟାଳୟ ସ୍ନାତକୋତ୍ତର ପରିଷଦ ଅଧ୍ୟକ୍ଷ ଡ. ପ୍ରଭୁପ୍ରସାଦ ଦାସ ଓ ଡ. ଯଶୋବନ୍ତ ନାରାୟଣ ସିଂବାବୁ ଯଥାକ୍ରମେ ଉପକୂଳ ଓଡିଶାର ଭୂତଳ ଜଳସ୍ତର ଓ ଦ୍ରବ୍ୟମାନ ସମ୍ପର୍କରେ ନିବନ୍ଧ ଉପସ୍ଥାପନ କରିଥିଲେ। ବିଶ୍ୱବିଦ୍ୟାଳୟ ଗବେଷଣା ଓ ବିକାଶ ସେଲ ନିର୍ଦ୍ଦେଶକ ଡ.ଶ୍ରୀଧର ସନ୍ୟାସୀ ବୈଷୟିକ ଆଲୋଚନା ପର୍ବରେ ସଭାପତିତ୍ୱ କରିଥିବା ବେଳେ କୁଳସଚିବ ନରେନ୍ଦ୍ର କୁମାର ସାହୁ, ଭୂତତ୍ତ୍ୱ, ରସାୟନ ଓ ପଦାର୍ଥ ବିଜ୍ଞାନ ଆଦି ବିଭିନ୍ନ ବିଭାଗର ମୁଖ୍ୟ ଓ ଅନ୍ୟ ଅଧ୍ୟାପକ ଅଧ୍ୟାପିକାଙ୍କ ସମେତ ଶତାଧିକ ଛାତ୍ରଛାତ୍ରୀ ଏହି କର୍ମଶାଳାରେ ଯୋଗ ଦେଇଥିଲେ।
