ନୂଆଦିଲ୍ଲୀ : ବହୁ ଚର୍ଚ୍ଚିତ କଠୁଆ ନାବାଳିକା ଗଣବଳାତ୍କାର ଓ ହତ୍ୟା ମାମଲାର ଅନ୍ୟତମ ମୁଖ୍ୟ ସାକ୍ଷୀ ତାଲିବ ହୁସେନ୍ଙ୍କୁ ହାଜତରେ ନିର୍ଯାତନା ଦିଆଯିବା ନେଇ ଜାମ୍ମୁ-କାଶ୍ମୀର ସରକାରଙ୍କଠାରୁ ସୁପ୍ରିମକୋର୍ଟ ମଙ୍ଗଳବାର ଜବାବ୍ ଲୋଡିଛନ୍ତି। ଏ ନେଇ ଅଗଷ୍ଟ ୨୭ ସୁଦ୍ଧା ଉତ୍ତର ଦାଖଲ କରିବାକୁ ପ୍ରଧାନ ବିଚାରପତି ଦୀପକ ମିଶ୍ର, ବିଚାରପତି ଏ.ଏମ୍. ଖାନ୍ୱିଲକର ଏବଂ ବିଚାରପତି ଡି. ୱାଇ ଚନ୍ଦ୍ରଚୂଡ ନିର୍ଦେଶ ଦେଇଛନ୍ତି। ଅଗଷ୍ଟ ୨୯ରେ ମାମଲାର ପରବର୍ତ୍ତୀ ଶୁଣାଣି ହେବ। ରାଜ୍ୟ ପୁଲିସ ଜେରା ବେଳେ ନିର୍ଯାତନା ଦେଇଥିବା ନେଇ ହୁସେନ୍ ଅଭିଯୋଗ କରିଥିଲେ। ହୁସେନ୍ ନିଜ ସମ୍ପର୍କୀୟାଙ୍କୁ ବଳାତ୍କାର କରିଥିବା ଅଭିଯୋଗ ହୋଇଥିଲା। ଏ ସମ୍ବନ୍ଧରେ ତାଙ୍କୁ ଜେରା କରିବା ବେଳେ ପୁଲିସ ନିର୍ଯାତନା ଦେଇଥିଲା ବୋଲି ସେ ଅଭିଯୋଗ କରିଥିଲେ।
